7
1 ह म्हारा प्यारा भायाओ आपण्अ कन्अ परमेसर का करेड़ा ये करार छ ई बजेसुं आपान्अ परमेसर को ड़र मानर काया अर आत्मा न्अ सुगली चीजा सुं आंतरअ रेर पवितर राखणो चायजे।पौलुस को आण्द
2 थांका मन मं म्हान्अ ठोर द्यो। मै न्अ तो कोई की लार अन्याय कर्या अर न्अ कोईको कांई बगाड़या, अर न्अ'ई मं कोईको फाईदो उठायो। 3 म ये बाता थान्अ निचो दखाबा बेई कोन खियो पण जस्यान पेली म थान्अ बतायो छो क थे म्हारा हीया मं बसर्या छो। अर म्हे थांकी लार मरबा जीबा बेई बी त्यार छा। 4 मन्अ थाप्अ घणु भरोसो, मन्अ थांप्अ घणु गरव छ, थे म्हारी हिम्मत बन्धाया छो। अर दुख मं बी थे मन्अ राजी कर्या छो।
5 aअर जद्या मै मकिदुनिया मं आया छा जद्या बी म्हाकी काया न्अ आराम कोन मल्यो, पण म्हाकी काया तो बारअ का लड़ाई झगड़ा सुं अर मन मं ड़र की बजेसुं केई तरा सुं दुख भोगणो पड़यो। 6 पण दुख्या न्अ सान्ति देबाळो परमेसर तीतुस न्अ म्हाखन्अ खन्दार म्हाकी हिम्मत बंधायो छ। 7 अर उंक्अ अण्डअ आबासुं बढ़र तो मै या सुण्या क थे उंकी चोखी आवभगत कर्या तो म्हारी ओर बी हिम्मत बंधगी। वो म्हान्अ बतायो क थे थांका खिया प सरमिन्दा छो अर मंसुं मलबा बेई कतरा उत्यावळा छो। थे म्हारी चन्ता करो छो अस्यान सुण'र म ओर बी राजी होयो।
8 जद्या म थान्अ कागद माण्ढर दुखी कर्यो छो, पण मन्अ उं कागद न्अ माण्ढबा को कतेई पछतावो कोन्अ। जस्यान पेली मन्अ ई बात को दुख छो पण अब मन्अ तोल पड़ग्यो क थान्अ उं कागद सुं थोड़ी बगत'ई दुख होयो छो। 9 म ई बजेसुं राजी कोन्अ क थान्अ दुखी कर्यो छो पण ई बात सुं राजी छु क उं दुख की बजेसुं थे थांका हीया न्अ पाप सुं फराया। थान्अ वो दुख परमेसर की ओड़ी सुं होयो छ जिसुं क म्हाकी बजेसुं थांको नुकसाण कोन होव्अ। 10 क्युं क ज्यो दुख परमेसर की ओड़ी सुं होव्अ छ उंको फळ पाप सुं मन फराबो होव्अ छ उंको मकसद छूटवाड़ो छ जिसुं अफसोस कोन होयो। पण ज्यो दुख संसार सुं मल्अ छ, उंको फळ मोत छ। 11 बतावो ज्यो दुख परमेसर थान्अ दियो छ उंकी बजेसुं थाम्अ कतरो उछ्याव छ, खुदका भोळापणा की सम्भाळ करबा को, दूसरा बेई कळसबा को, अर जिसुं थे बात का खरा, म्हासुं मलबा की मन्सा राखबाळा, हिम्मत राखबाळा अर पापी को न्याय करबाळा होग्या। थे अस्यान करर सबळी बाता म या दखा दिया, क थे कतरा नरदोष छो।
12 पण म्हारो थान्अ कागद मांडबा को मकसद यो बताबो कोन छो क थे गलती कर्या छ अर न्अ उंक्अ बेई जिका बिरोध मं कर्यो छो। पण यो छो क परमेसर क साम्अ थे खुद देख सको क थे म्हाक्अ बेई कतरी चन्ता करो छो। 13 अर ई बजे सुंई म्हान्अ हिम्मत मली छ।
म्हान्अ हिम्मत मलबा क अलावा तीतुस का राजी होबासुं ओर बी साऊटी खुसी मली छ, क्युं क थांकी बजेसुं उंकी आत्मा न्अ सांति मली। 14 क्युं क म उंक्अ आग्अ थांकी खुब बड़ाई कर्यो छो, पण मन्अ निचो कोन देखणो पड़्यो। जस्यान म्हे थान्अ सांची-सांची खिया छा, वस्यानई थांका बारा म म्हाको घमण्ड तीतुस क साम्अ सचाई की लार परगट होयो। 15 उंको परेम थांक्अ बेई ओर बी साउटो उमड़्अ छ। जद्या बी वो या याद करअ छ क थे कस्यान उंकी बात मान्या अर डरता होया कस्यान उंकी मनवार कर्या छा। 16 अर म खुस छु क सबळी बाता म, मं थाप्अ भरोसो कर सकु छु।