2
1 ई बजेसुं म यो पक्को कर मेल्यो छु क म थां कन्अ फेरू कोन आंउ अर थान्अ दकालु जिसुं थे दुखी होवो। 2 अर ज्यो म थान्अ दुखी करू तो थे मन्अ राजी करअ सको छो कांई? नही। 3 जिसुं ई तो म थान्अ मांड्यो छो क जद्या म थां कन्अ आंउ तो अस्यान कोन होणी चायजे क ज्यांसुं मन्अ सुख मल्अ छ वां सुं म दुखी होऊं। क्युं क मन्अ थांक्अ उपरअ बस्वास छ क म्हारी खुसी मं ई थांकी खुसी छ। 4 क्युं क म ये बाता दुखी मन सुं अर आंसुवा की लार थान्अ मांड्यो छो। ईको मतलब यो कोन्अ क म थान्अ दुखी करबो चाऊ छु पण ई बजेसुं मांड्यो छु क ज्यो परेम म थां सुं करू छु उन्अ थे जाणल्यो।बरो करबाळा न्अ माफ करो
5 पण ज्यो कोई-कोई न्अ बी दुख देव्अ छ उसुं म ई नही पण थे सबळा बी थोड़ाघणा दुखी होया छो। पण म अबार थांकी लार कळ्डाई कोन करबो चाऊ। 6 अस्यान पाप करबाळा मनख न्अ बस्वास्या की टोळी ज्यो सजा देव्अ छ वाई खुब छ। 7 पण अब थे उंको भलो करो अर उं मनख न्अ माफ करो अर उंकी हिम्मत बढाओ जिसुं आग्अ चालर वो दुख म्अ कोन डुब्यो रेव्अ। 8 ई बजेसुं म थान्अ खेऊ छु क थे उन्अ सांचो परेम दखाओ। 9 म थान्अ जिसुं माण्ढ्यो छो क थे सबळी बाता म म्हारी आज्ञा मानो छो क कोन मानो, ईको मन्अ तोल पड़ सक्अ। 10 पण ज्यो थे कोई न्अ कसी बी बात बेई माफ करो छो तो म बी उन्अ माफ करू छु। अर ज्यो कांई न्अ बी म माफ करू छु वो मसी क साम्अ थांक्अ बेई ई करू छु। 11 जिसुं क सेतान को दाव आपण्अ उपरअ कोन चाल्अ। क्युं क आपा उंकी चाला सुं अण्जाण कोन्अ।
त्रोआस मं पौलुस की चन्ता
12 aजद्या मं मसी का चोखा समचार को परचार करबा त्रोआस गियो छो तो परबु म्हारअ बेई गेलो खोल दियो। 13 पण जद्या उण्डअ मन्अ भायो तीतुस कोन लाद्यो तो म्हारा मन मं चेन कोन आयो। अर म उण्डअ सुं विदा होर मकिदुनिया ओड़ी चाल पड़यो।
14 परमेसर को धन्यवाद होव्अ क वो आपान्अ मसी की बजेसुं सदाई जीत का गेला प लेर जाव्अ छ। अर परमेसर मसी की बाता का ज्ञान न्अ च्यारूमेर फेलाबा बेई आपान्अ अन्तर की जस्यान काम म्अ लेव्अ छ। 15 क्युं क वा बेई ज्यो अबार नास कर्या जाव्अ अर बचाया जाव्अ छ वाम्अ आपा उं धूप की सुगन्ध की जस्यान छा ज्यांन्अ मसी परमेसर क चढ़ाव्अ छ 16 पण ज्यो मोत का गेला प नास होबा बेई जार्या छ वां बेई मोत की सुगन्ध छ अर ज्यो छूटवाड़ा का गेला प जार्या छ वा बेई जन्दगी की सुगंध छा पण ई काम बेई काबिल कुण छ? 17 मे वां जस्यानका कोन्अ ज्यो खुदका फायदा बेई परमेसर का बचना मं मलावट करअ छ। पण मै तो परमेसर क साम्अ परमेसर का खन्दायेड़ा मनखा की जस्यान मसी म उबा होर सचाई सुं बोला छा।