कुरिन्थ नगर का बस्वास्या की टोळी क नांऊ पौलुस को दूसरो कागद
1
1 bया चिट्ठी परमेसर की इच्छा सुं म, मसी ईसु को थरपेड़ो चेलो पौलुस अर आपणो भाई तीमुथियुस परमेसर की कुरिन्थ नगर का बस्वास्या की टोळी का मनखा न्अ अर अखाया का सबळा परमेसर का मनखा न्अ माण्ढा छा। a 2 आपणा पिता परमेसर अर परबु ईसु मसी की दीया अर सांति थां सबळा न्अ मल्अ।पौलुस को परमेसर न्अ धन्यवाद देबो
3 आपणा परबु ईसु मसी को बाप, दीया करबाळो अर आराम देबाळो परमेसर धनै छ। 4 अर आपा प कळेस आव्अ छ तो वे आपान्अ हिम्मत बंधाव्अ छ। जिसुं आपा बी परमेसर की उं हिम्मत क जरिये वां मनखा न्अ ज्यो कळेस मं पड़या छ हिम्मत बंधा सका। 5 क्युं क जस्यान मसी दुख भोग्यो छ उम्अ मे बी पांतिदार छा जिसुं आपा मसी क जरिये परमेसर की उं महान सायता का बी पांतिदार छा। 6 ज्यो मै सताया जांवा छा तो वो थान्अ हिम्मत बंधाबा अर थांका छूटवाड़ा बेई होव्अ छ। ज्यो म्हान्अ हिम्मत बंधाई जाव्अ छ तो थान्अ बी हिम्मत बंधाई जाव्अ छ अर जस्यान को कळेस मै भोगा छा वो कळेस थरचा सुं भोगबा बेई तागत दी जाव्अ छ। 7 म्हान्अ थाप्अ पक्की आस छ क्युं क मै जाणा छा क जस्यान थे म्हारा कळेस मं पांतिदार छो वस्यानई सांति मं बी पांतिदार छो।
8 cक्युं क भायाओ मे या छावा छा क जस्यानकी पीड़ा मै एसिया मं भोग्या छा उंका बारा मं थे जाणो। उण्डअ मै म्हाकी सेनसक्ति सुं बी साउटी पीड़ा भोग्या छा। अण्डअ ताणी क मरया'ई कोन्अ बअस। 9 अर मे हीया मं या बी बच्यार लिया छा क म्हान्अ मौत की सज्या होगी जिसुं म्हे खुद प भरोसो कोन करर उं परमेसर प भरोसो कर्या ज्यो मरेड़ा न्अ बी फेरू जुवाव्अ छ। 10 अर वोई म्हान्अ उं भियानक मोत सुं बचायो। अर वोई म्हान्अ बचाव्अ छ। क्युं क म्हान्अ उंप्अई आस छ क आग्अ बी वोई म्हान्अ बचावलो। 11 थे मलर म्हारअ बेई परातना करर म्हारी सायता करो छो। यो उंकोई नतिजो छ क म्हान्अ खतरा सुं बचायो जाव्अ छ। अर परमेसर म्हारअ बेई ज्यो कर्यो छ उंकी बजेसुं घणा मनखा न्अ परमेसर को धन्यवाद करबा को मोको मल्यो छ।
पौलुस की योजना मं फेर-बदल
12 म्हान्अ गरव छ क म्हे साफ हीया सुं या खे सका छा, क म्हे ई दुनिया का मनखा की लार अर खास तो थारी लार परमेसर की खराई अर ईमानदारी सुं रिया छा। अस्यान म्हे परमेसर सुं मलबाळी दीया सुं कर्या छा न्अ की दनीयादारी सुं मलबाळी बुद्धि सुं। 13 म्हे थान्अ अस्यान की बाता मांडर्या छा ज्यांन्अ थे बाच सको अर समझ सको। म आस करू छु क थे म्हान्अ पूरी तरा समझ जाव्अला। 14 जस्यान कुछ हदताणी थे म्हान्अ समझो छो। थे सबळा म्हाप्अ वस्यान ई घमण्ड कर सको छो जस्यान म्हे थां बेई उं दन घमण्ड करअला जद्या परबु ईसु फेरू पाछो आवलो।
15 अर ई बस्वास की बजे सुंई म थां कन्अ आबा को मन कर्यो छ जिसुं थान्अ फेरू आसीर्वाद को फायदो मल सक्अ। 16 dअर म सोचु छु क मकिदुनिया जाती बगत थासुं मलर जाऊ अर मकिदुनिया सुं पाछो आती बगत थां कन्अ फेरू आंउ जिसुं थे यहूद्या नगर का म्हारा सफर बेई जुरत की चीजा देर मन्अ बद्या करो। 17 ई बजेसुं जद्या म या बाता की ईछ्या कर्यो छु तो म उपरला मन सुं कर्यो छु कांई? म ई दनीया का मनखा की जस्यान छु कांई ज्यो एक बगत म हां-हां बी करअ अर ना-ना बी करअ? 18 पण परमेसर बस्वास करबा जस्यान को छ अर वो ईको गुवा छ क थां बेई म ज्योबी संदेस सुणाया छो वे सांचा छ। 19 eक्युं क परमेसर का छोरा ईसु मसी जिको परचार म, तीमुथियुस अर सिलवानुस कर्या छा वो हां अर ना दोनी एकलार कोन्अ। पण ईसु मसी म वो हां मं छो। 20 क्युं क ईसु मसी मं परमेसर का सबळा करार हां छ अर आपा बी ई बजेसुं खेवां छा क अस्यान'ई होव्अ अर यो परमेसर की मेमा बेई होव्अ छ। 21 ज्यो ईसु मसी की बजेसुं म्हान्अ थांकी लार जोड़र थरप्यो छ। वो परमेसर'ई छ। 22 वो खुदकी छाप आपण्अ लगायो छ, वो आपणा हीया म पवितर-आत्मा दियो छ। याई बात की साई छ क वो वे सबळी आसिस आपान्अ देव्अ ज्यांन्अ देबा बेई वो करार कर्यो छ।