अबराम को उदारण
4
1 तो फेर म्हे कांई खेवां क आपणो काया को आग्लाबड़ा बाप अबराम ई धार्मिकता का बारा मं कांई समझ्यो? 2 क्युं क अबराम न्अ उंका कामा की बजेसुं धरमी ठेरायो जातो तो उंक्अ घमण्ड करबा की बात छी। पण परमेसर क साम्अ वो घमण्ड कोन कर सक्अ। 3 aपवितर सास्तर खेव्अ छ, “अबराम परमेसर मं बस्वास कर्यो अर वो बस्वास उंक्अ बेई धार्मिकता गण्यो गियो।”4 काम करबाळा न्अ मजुरी देबो कोई दान कोन्अ, वो तो उंको हक छ। 5 पण ज्यो कोई मनख काम करबा की बेई उं परमेसर मं बस्वास करअ छ ज्यो पापी मनखा न्अ बी धरमी बणाव्अ छ तो उंको बस्वास ई बीकी धार्मिकता की बजे बणजाव्अ छ। 6 जिन्अ परमेसर कामा क बनाई धरमी बणाव्अ छ। उन्अ दाऊद बी भागआळो खेव्अ छ।
7 “भागहाळा छ वे ज्यांका बना बेवस्था
का कामा न्अ छमा मली छ अर
ज्यांका पाप ढ़क्या गिया छ!
8 भागआळो छ वो मनख
जिका पाप परबु कोन गण्यो!”
9 तो कांई यो भागहाळा खुवाबो वांक बेई छ, ज्यांको खतनो होयो छ, या फेर वांक बेई बी ज्यांको खतनो कोन होयो। हां, यो वाप्अ बी लागू होव्अ छ ज्यांको खतनो कोन होयो। क्युं क आपा खिया छा क अबराम को बस्वास ई उंक्अ बेई धार्मिकता गण्यो गियो। 10 तो उंको बस्वास धार्मिकता कद्या गण्यो गियो? जद्या उंको खतनो हो चुक्यो छो या फेर जद्या वो बना खतना को छो। खतनो होया पाछ्अ नही पण खतनो होबा क पेली। 11 अर फेर एक नसाण की जस्यान वो खतनो मान्यो। ज्यो उं बस्वास की धार्मिकता प छाप हो जाव्अ। ज्यो वो उं बगत दखायो छो जद्या उंको खतनो कोन होयो छो। जिसुं वो वां सबळा को बाप छ ज्यो बना खतना का छ पण बस्वासी छ। जिसुं वे बी धरमी मान्या जाव्अला। 12 यहूदी मनख खतनो कराबो ही नही पण अबराम खतनो करबा सुं पेली जस्यान को बस्वास कर्यो छो वस्यान को बस्वास करअ तो अबराम वांको को बी आग्लाबड़ा बाप छ।
बस्वास अर परमेसर को वादो
13 bअबराम अर उंका बंस का न्अ यो वादो क वे संसार का वारिस होव्अला, बेवस्था सुं कोन मल्यो छो पण उं धार्मिकता सुं मल्यो छो ज्यो बस्वास सुं मल्अ छ। 14 cअर ज्यो बेवस्था न्अ मान्अ छ, वे संसार का वारिस होव्अ तो बस्वास को कोई मतलब कोन्अ अर वादो बी फालतु हो जाव्अ छ। 15 लोगबाग बेवस्था न्अ कोन मान्अ तो परमेसर को रोष आव्अ छ पण जण्ढ्अ बेवस्था छ्अई कोन्अ उण्डअ बेवस्था न्अ तोड़बा को कोई मतलब कोन्अ।
16 dजिसुं यो साबित होव्अ छ क परमेसर को वादो बस्वास को फळ छ अर यो वादो उंकी दीया सुं मल्अ छ। अस्यान उंको बचन अबराम का सबळा बंसहाळा बेई निस्चित छ, ज्यो बेवस्था न्अ मान्अ छ खाली वां बेई नही पण ज्यो अबराम की न्याई बस्वास करअ छ, वा बेई बी छ। अबराम आपा सबळा को बाप छ। 17 जस्यान सास्तर मं मण्ढरी छ, “म थन्अ घणी जात्या को बाप बणायो छु।” जि परमेसर प्अ अबराम बस्वास कर्यो छ ज्यो मरया न्अ जीव देव्अ छ अर ज्यो बाता छ्अई कोन्अ वांको नांऊ अस्यान लेव्अ छ जाण्अ वे छ। उं परमेसर की नजरा मं वो अबराम आपणो बाप छ। 18 जण्ढ्अ आस करबा की बी ठोर कोन छी उण्डअ अबराम आस रखाणर बस्वास कर्यो। जिसुं उं वादा की जस्यान वो घणी जात्या को बाप बण्यो, जस्यान सास्तर मं मण्ढर्यो छ क “थारअ अणगणती की ओलाद होव्अली।” 19 या जाणता होया क बीकी काया सौ बरस की बुढ़ी अर कमजोर छ अर सारा की कोख की मरी दसा देखर बी वो खुदका बस्वास न्अ कोन छोड़यो। 20 अर परमेसर का वादा मं बस्वास बणाया रखाण्यो। अर परमेसर का वादा प संका कोन कर्यो। अतरोई नही बस्वास न्अ ओर गाढो करता होया परमेसर न्अ महमा दियो। 21 उन्अ पूरो भरोसो छो क परमेसर ज्यो वादो उन्अ दियो छ, उन्अ पूरो करबा मं बी सामर्थी छ। 22 जिसुं, “यो बस्वास उं बेई धार्मिकता गण्यो गियो।” 23 सास्तर को यो बचन क बस्वास उं बेई धार्मिकता गण्यो गियो छ, खाली अबराम बेई कोन माण्ढ्यो गियो। 24 पण आपण्अ बेई बी छ। परमेसर आपान्अ, ज्यो उंप्अ बस्वास रखाण्अ छ, धरमी मान्अलो। वो आपणा परबु ईसु न्अ मरया मंसुं जीवतो कर्यो छ। 25 ईसु जिन्अ आपणा पापा की बेई मरबा बेई सुंप्या अर आपान्अ धरमी बणाबा बेई मरया मंसुं फेरू जीवतो कर्या।