रोमियों 3

1 फेर यहूदी होबा को कांई फायदो अर खतना को कांई मोल छ? 2 सांच्याई सब तरा सुं खुब मोल छ। क्युं क सबळा सुं पेली परमेसर को बचन तो वान्अई सुप्यो गियो छो। 3 अर ज्यो वाम्अ सुं एकात बस्वासघाती होबीग्या तो कांई? वांको बस्वासघाती पण परमेसर की बस्वास योग्यता न्अ बेकार कर देव्अलो कांई? 4 एकधम नही, ज्यो हरेक मनख झूंटा होव्अ तोबी परमेसर सांचो छ। जस्यान सास्तर मं मण्ढरी छ,

“जिसुं तु खुदकी बाता सुं धरमी ठेरअ

अर न्याय करती बगत तु जै पाव्अ।”

5 अर ज्यो आपणा बरा काम परमेसर की धार्मिकता न्अ साबित करअ छ तो म्हे कांई खेवां? कांई या क वो खुदका रोष आपा प परगट कर अन्याय करअ छ? म एक मनख की न्याई खुदकी बात खेर्यो छु। 6 एकधम नही, तो फेर परमेसर जगत को न्याय कस्यान करअलो?

7 “पण म्हारा झूंट की बजेसुं परमेसर को सांच ओर साऊटो होव्अ छ तो इसुं बीकी महमा'ई होव्अ छ, तो फेर मन्अ दोषी लगार पापी कोन ठेरायो जाणो चायजे।” 8 फेर अस्यान क्युं कोन खेव्अ “आओ बरा काम करां जिसुं भलाई होव्अ।” जस्यान म्हाका बारा मं बराई करता होया एकात मनख आपा प दोष लगाव्अ छ क आपा अस्यान खेवां छा। तो अस्या मनखा न्अ डण्ड देबो स'ई छ।

कोई बी धरमी कोन्अ

9 तो फेर आपा कांई खेवां? कांई आपा यहूदी गेर यहूद्‍या सुं कस्यान बी चोखा छा, नही एकधम नही। क्युं क आपा या पेलीसुंई दर्सा चुक्या क छाव्अ यहूदी छाव्अ गेर यहूदी सबळा पाप का बसम्अ छ। 10 सास्तर खेव्अ छ,

“कोई बी धरमी कोन्अ, एकबी कोन्अ।

11 कोई बी समझदार कोन्अ एकबी कोन्अ

कोई अस्यानको कोन्अ ज्यो परमेसर न्अ हेरतो होव्अ।

12 सबळा भटकग्या,

वे सबळा बगड़ग्या,

कोई बी भलाई करबाळो कोन्अ एकबी कोन्अ।

13 वांका मुण्ढा खुली कबरा जस्या छ,

वे खुदकी जीभ सुं छळ करअ छ।

वांका होठा प्अ सांपा को जैर छ,

14 सराप सुं अर कड़वाहट सुं वांका मुण्ढा भरया रेव्अ छ।

15 हत्या करबा बेई वे हर बगत उत्यावळा रेव्अ छ।

16 वांका गेला मं नास अर कळेस छ।

17 वान्अ सान्ति का गेला को तोल कोन्अ।

18 वांकी आंख्या मं परमेसर को ड़र कोन्अ।”

19 अब आपा या जाण्अ छा क बेवस्था मं ज्योबी खियो गियो छ, वो वान्अ बताव्अ छ ज्यो बेवस्था म बन्धया छ। जिसुं हरेक मुण्ढा न्अ बन्द कर्यो जा सक्अ अर सबळो जगत परमेसर की सज्या जस्यान को बण्अ। 20 बेवस्था का कामा सुं कोई बी मनख परमेसर क साम्अ धरमी कोन ठेर सक्अ। क्युं क बेवस्था सुं तो पाप की पेचाण होव्अ छ।

धार्मिकता बस्वास सुं आव्अ छ

21 पण अब मनखा बेई यो दर्सायो गियो छ क परमेसर बना बेवस्था क वान्अ खुद बेई सई कस्यान बणाव्अ छ जिकी गुवाई बेवस्था अर परमेसर की ओड़ी सुं बोलबाळा देव्अ छ। 22 सबळा बस्वास करबाळा बेई ईसु मसी मं बस्वास करबा सुं परमेसर की ओड़ी सुं मलबाळी धार्मिकता बना कोई फरक कर्या परगट करी गई छ। 23 क्युं क सबळा पाप कर्या छ अर सबळा परमेसर की महमा सुं आंतरअ छ। 24 पण बीकी दीया सुं अर उं छूटवाड़ा सुं ज्यो मसी ईसु म छ सितमात धरमी ठेराया छ। 25 ईसु मसी की मोत मं बस्वास करबा सुं पापा की छमा पाबा बेई परमेसर ईसु मसी न्अ एक बलिदान का रूप मं देदियो। अस्यान परमेसर खुदकी धार्मिकता न्अ परगट कर्यो। क्युं क परमेसर मनखा का पेली का पापा न्अ खुदकी सेनसीलता सुं अनदेखा कर दियो। 26 क आज वो ई बगत मं खुदकी धार्मिकता न्अ परगट करअ जिसुं वो खुद धरमी अर ज्यो ईसु मसी मं बस्वास रखाण्अ छ वान्अ धरमी ठेराव्अ।

27 तो फेर घमण्ड करबो कढ्अ रियो? बीकी तो ठार'ई कोन्अ। कसी बेवस्था की बजेसुं? कांई करमा की बेवस्था की बजेसुं? नही, पण बस्वास की बेवस्था की बजेसुं। 28 जिसुं म्हे ई नतिजा प्अ पुच्या छा क कोई बी मनख बेवस्था का कामा की जस्यान चालर नही, पण बस्वास सु'ई धरमी बण सक्अ छ। 29 कांई परमेसर यहूदी मनखा कोई छ? वो गेर यहूदी को कोन्अ कांई? हां, वो गेर यहूद्‍या को बी परमेसर छ। 30 क्युं क परमेसर एक छ। वोई वान्अ ज्यांको बस्वास सुं खतनो होयो छ, अर ज्यांको खतनो कोन होयो उई बस्वास सुं धरमी ठेराव्अलो। 31 तो कांई आपा बस्वास की बजेसुं बेवस्था न्अ मानबो छोड़र्या छा? एकधम नही। पण आपा तो बेवस्था न्अ ओर साऊटी तागतहाळी बणारया छा।