रोमियों 2

परमेसर को न्याय

1 तो न्याय करबाळा म्हारा भायला तु छाव्अ कोई बी होव्अ, थार कन्अ कोई भायनो कोन्अ। क्युं क जि बात बेई तु दूसरा न्अ दोषी मान्अ छ, उसुं'ई तु खुदन्अ बी दोषी साबित करअ छ। क्युं क तु ज्यां कामा को न्याय करअ छ, वान्अ खुद बी करअ छ। 2 अब आपा या जाण्अ छा क ज्यो मनख अस्यान का काम करअ छ वांकी लार परमेसर सांचो न्याय करअलो। 3 पण ह म्हारा भायला तु कांई बच्यार करअ छ क तु ज्यां कामा बेई दूसरा न्अ दोषी ठेराव्अ छ अर खुद'ई वस्यान का काम करअ छ तो तु परमेसर का न्याय सुं बच जाव्अलो कांई? 4 या फेर तु बीकी महान करपा, सेनसक्‍ति अर थरचा न्अ नीच समझ्अ छ कांई? अर या बात तो थे जरूर जाणो छो क परमेसर की दीया थान्अ परास्चित की ओड़ी ले जाव्अ छ।

5 पण खुदकी कळ्डाई अर कद्‍या बी पचतावो कोन करबाळा मन की बजेसुं, उंका रोष न्अ खुद बेई उं दन ताणी भेळो करर्यो छ जद्‍या परमेसर को सांचो न्याय परगट होव्अलो। 6 परमेसर हरेक न्अ खुदका कामा की जस्यान फळ देव्अलो 7 ज्यो मनख थरचा सुं लगतमार चोखा काम करता होया महमा, आदर अर सदामेस की जन्दगी की खोज मं छ, वान्अ बदला मं परमेसर कद्‍या नास कोन होबाळी जन्दगी देव्अलो। 8 पण ज्यो स्वार्थी छ वे सांच प कोन चालर बराई प चाल्अ छ वाप्अ परमेसर को रोष अर झाळ पड़्अलो। 9 वां हरेक मनखा प दुख अर संकट आवला ज्यो बुराई प चाल्अ छ। पेली यहूदी प अर फेर बना यहूदी प। 10 अर ज्यो कोई बी भला काम करअ छ वान्अ महमा, आदर अर सान्ति मल्अली। पेली यहूदी न्अ अर फेर बना यहूदी न्अ 11 क्युं क परमेसर कोईको पक्षपात कोन करअ।

12 ज्यो मूसा की बेवस्था न्अ जाण्या बना पाप कर्या छ, वे बना बेवस्था क्अ नास बी हो जाव्अला। अर ज्यो बेवस्था न्अ जाणता होया पाप कर्या छ वान्अ बेवस्था की जस्यानई सज्या मल्अली। 13 क्युं क वे ज्यो खाली बेवस्था की कथा सुण्अ छ परमेसर की नजरा म धरमी कोन्अ। पण ज्यो बेवस्था प चाल्अ छ वे ही धरमी ठेराया जाव्अला।

14 तो जद्‍या बना यहूदी मनख ज्यां कन्अ बेवस्था कोन्अ अर सुभाऊ सु'ई बेवस्था की बाता प चाल्अ छ तो छाव्अ वां कन्अ बेवस्था कोन्अ फेरबी वे खुदकी बेवस्था खुद छ। 15 वांका काम या दखाव्अ छ क बेवस्था वांका मना मं मण्ढ मेली छ। वांकी समझ बीकी गुवाई देव्अ छ। अर वांका मन का बच्यार कद्‍या-कद्‍या वान्अ अपराधी खेव्अ छ अर कद्‍या-कद्‍या वान्अ नरदोष खेव्अ छ। 16 ये बाता उं चोखा समचार की जस्यान जिको मं उपदेस देऊ छु उं दन होव्अली जद्‍या परमेसर मनखा की लुखी बाता को मसी ईसु क जरीये न्याय करअलो।

यहूदी अर बेवस्था

17 अर ज्यो तु खुदन्अ यहूदी खेव्अ छ अर बेवस्था मं थारो बस्वास छ अर परमेसर प थन्अ घमण्ड छ। 18 अर तु परमेसर की मन्सा न्अ जाण्अ छ अर चोखी बाता न्अ मान्अ छ, क्युं क थान्अ बेवस्था सुं सकाया छ, 19 तु या मान्अ छ क तु आन्धा न्अ गेलो बताबाळो छ, अर ज्यो अंधेरा मं छ वां बेई तु उजाळो छ। 20 मूरखा न्अ सखाबाळो, बाळका को गरूजी छ। क्युं क बेवस्था सुं थन्अ सबळो ज्ञान अर सांच खुब मल्यो छ, 21 तु ज्यो दूसरा न्अ सखाव्अ छ, खुदन्अ क्युं कोन सखाव्अ? तु ज्यो चोरी कोन करबा की सीख देव्अ छ, खुद चोरी क्युं करअ छ? 22 तु खेव्अ छ क व्यभिचार कोन करणी चायजे, फेर खुद व्यभिचार क्युं करअ छ? तु मूरत्या सुं नफरत करअ छ फेर मन्दर को धन क्युं लूट्अ छ? 23 तु तो बेवस्था प घमण्ड करअ छ, फेर बेवस्था न्अ तोड़र परमेसर को अपमान क्युं करअ छ? 24 जस्यान सास्तर मं मण्ढरी छ क “थांकी बजे सुंई गेर यहूदी मं परमेसर का नांऊ को अपमान होव्अ छ।”

25 अर ज्यो थे बेवस्था न्अ मानता जद्‍याई खतना को मतलब छ, पण थे बेवस्था न्अ तोड़ो छो जिसुं थे खतनाळा होबा क बाद बी बना खतनाळा क बरयाबर छो। 26 अर ज्यो कोई गेर यहूदी जिको खतनो कोन होयो अर वो बेवस्था का निमा प चाल्अ छ तो बना खतना को होता होया बी परमेसर उन्अ खतनाळो मान्अलो। 27 वो गेर यहूदी मनख जिको खतनो कोन होयो अर ज्यो बेवस्था न्अ मान्अ छ, थान्अ अपराधी ठेरावला। क्युं क थां कन्अ माण्ढेडी बेवस्था का निम छ, अर थांको खतनो बी होयो छ, अर थे बेवस्था न्अ तोड़ो छो, 28 ज्यो कोई बी मनख दखावटी रूप सुं ही यहूदी छ, वो सांच्याई यहूदी कोन्अ। काया को खतनो हकीकत मं खतनो छ्अई कोन्अ। 29 सांचो यहूदी वोई छ ज्यो मन सुं यहूदी छ। सांचो खतनो आत्मा सुं मन को होव्अ छ, न्अ की मण्ढेड़ी बेवस्था सुं। अस्यान का मनखा की बढ़ाई मनखा सुं नही पण परमेसर की ओड़ी सुं करी जाव्अ छ।