मरकुस 11

ईसु जीत सुं यरूसलेम म उळबो

(मत्ती 21:1–11; लूका 19:28–40; यूहन्‍ना 12:12–19)

1 फेर जद्‍या वे यरूसलेम क सांकड्अ जैतून डुंगर की ढ़ाळ म बैतफगे अर बैतनिय्याह क सांकड्अ पुच्या तो ईसु चेला मंसुं दो न्अ 2 या खेर सामला गांव म खन्दायो, “जावो जस्यानई थें गांव म घुस्अला थान्अ एक गद्‍दी को बछेरो बंधयो मललो जीक्अ उपरअ हालताणी कोई कोन चढ़यो। बिन्अ उण्डअ सुं खोलर लियाओ। 3 अर थांन्अ कोई बुजे क ‘थें यो कांई करर्या छो?’ तो थें खिज्यो, ‘परबु न्अ इसुं काम छ। अर फेर वो बेगोसोक ईन्अ पाछो दे देलो।’”

4 जद्‍या वे उण्डअ सुं चलग्या अर वान गळी म एक बाण्णा कन्अ गद्‍दी को बछेरो बंध्यो मल्यो। अर जद्‍या वे बिन्अ खोलर्या छा। 5 तो एकात मनख ज्यो उण्डअ उबा छा, वान बुज्या, “थें कांई करर्या छो अर ई गद्‍दी का बछेरा न्अ क्युं खोलर्या छो?” 6 वे वान वाई खिया ज्यो ईसु वान बतायो छो। जिसुं वे वान जाबा दिया। 7 वे गद्‍दी का बछेरा न्अ ईसु क सांकड्अ लीयाया। वे उंक्अ उपरअ वांका लत्ता पटक दिया। अर फेर ईसु उंक्अ उपरअ बेठग्यो। 8 घणासारा मनख वांका लत्ता अर घणा मनख खेता मंसुं खजूरां की डाळ्यां काटर ईसु को सुवागत करबा बेई गेला म बछा दिया। 9 वे मनख ज्यो आग्अ छा अर वे मनख ज्यो पाछ्अ छा, जैकारा लगारया छा, “हौसन्‍ना! परबु परमेसर की जै हो! वो धनै छ ज्यो परबु परमेसर का नांऊ सुं आर्यो छ! 10 आपणा बाप-दादा दाऊद को राज ज्यो आर्यो छ उन्अ परमेसर आसीर्वाद दे। सरग म परबु की जै हो!” 11 फेर वो यरूसलेम म पूछ्‍यो अर मन्दर म गियो। वो च्यारूमेर सबळी चीजान्अ देख्यो, अर दन आथबा की बजेसुं चेला की लार बैतनिय्याह की ओड़ी चलग्यो।

ईसु गूलर का रूंखड़ा न्अ सराप दियो

(मत्ती 21:18, 19)

12 आग्लअ दन जद्‍या वे बैतनिय्याह मंसुं नखळर जार्या छा, तो ईसु न्अ भूख लागी। 13 थोड़ोसोक आंतरअ बिन्अ गूलर को हर्यो सकन एक रूंखड़ो दिख्यो। या देखबा बेई वो रूंखड़ा कन्अ गियो क उम्अ कोई फळ मल जाव। पण जद्‍या वो उण्डअ गियो तो बिन्अ पत्ता न्अ छोड़र कांई बी कोन मलयो क्युं क वा गूलरां की रूत कोन छी। 14 जद्‍या वो रूंखड़ा न्अ खियो, “आज पाछ्अ थारा फळ न्अ कोई बी कोन खावला।” उंका चेला बी या सुण्या।

ईसु मन्दर म गियो

(मत्ती 21:12–17; लूका 19:45–48; यूहन्‍ना 2:13–22)

15 जद्‍या वे यरूसलेम पुछया। अर ईसु मन्दर म घुस्यो तो वा मनखा न्अ ज्यो मन्दर म बोपार करर्या छा, बाण्अ नखाळबो सरू कर दियो। वो पिसा को लेण-देण करबाळा की छोकट्‍या उल्ट-पुल्ट कर दियो। कबुतर बेचबाळा का तखता उलाळ दियो। 16 अर वान्अ मन्दर का आंगणा मंसुं कांई कोन ले जाबा दियो। 17 फेर सक्ष्या देर ईसु वान्अ खियो, “परमेसर का बचन म या कोन मण्ढरी कांई, ‘म्हारो घर सबळा देसा का मनखा बेई परातना करबा को घर खुवावलो?’ पण थें बिन्अ चोरा को ठकाणो बणा दिया।” 18 जद्‍या प्रधान याजक अर मूसा का निमा न्अ सखाबाळा या सुण्या तो वे बिन्अ मारबा को गेलो हेरबा लागग्या पण वे उसुं ड़रप छा। क्युं क सबळी भीड़ उंका उपदेसा सुं अचम्बो करअ छी। 19 फेर जद्‍या दनात्यो तो ईसु अर उंका चेला नगर क बारे नखळग्या।

गूलर का रूंखड़ा सुं सक्ष्या

(मत्ती 21:20–22)

20 आग्लअ दन दनुग्या की ईसु चेला की लार जार्यो छो तो वे उं गूलर का रूंखड़ा न्अ जड़ ताणी सूको देख्या। 21 जद्‍या पतरस याद कर ईसु न्अ खियो, “गरूजी, देख! जि गूलर का रूंखड़ा न्अ तु सराप दियो छो, वो सुखग्यो!” 22 ईसु वान्अ खियो, “परमेसर प बस्वास रांखो। 23 मं थान्अ सांची खेऊ छु क कोई ई डुंगर न्अ या खेव्अ, ‘क तु उपड़र समदर म पड़ जा’ अर उंका मन म कस्यान को बी बेम कोन पण बस्वास हेवे क जस्यान वो खियो छ वस्यान ही हे जावलो तो उंक्अ बेई हे जावलो। 24 ई बजेसुं म थान्अ बताऊ छु क थें परातना म ज्योबी मांग्अला, बस्वास करो वो थान्अ मलग्यो, जद्‍या थें ज्योबी मांग्अला वो थान्अ मल जावलो। 25 अर जद्‍या थें परातना करो तो पेली वान्अ माफ करद्‍यो ज्यो थांको बरो कर्या छ तो सरग मं बेठ्‍यो थांको परमेसर थांका पापा न्अ माफ कर देलो। 26 पण थें माफ कोन कर्या तो थांको परमेसर बाप ज्यो सरग म बेठ्‍यो छ थांका पाप माफ कोन करअलो।”

ईसु का अधिकारा क उपरअ सुवाल

(मत्ती 21:23–27; लूका 20:1–8)

27 फेर वे पाछा यरूसलेम आग्या। ईसु जद्‍या मन्दर म फरर्यो छो तो परमुख याजक, मूसा का निमा न्अ सखाबाळा अर बड़ा-बुढ़ा यहूदी नेता उकन्अ आया। 28 अर खिया, “तु या कामा न्अ कांई अधिकार सुं करअ छ? वान्अ करबा को अधिकार तन्अ कुण दियो छो?” 29 ईसु वान्अ खियो, “म थान्अ एक सुवाल बुजु छु, अर ज्यो मन्अ जुवाब देद्‍यो तो म थान्अ बता द्‍युलो क म यो काम कस्या अधिकार सुं करू छु। 30 ज्यो बतिस्मो यूहन्‍ना देव्अ छो, वो अधिकार उन्अ परमेसर सुं मलयो छो या मनखा सुं? मन्अ जुवाब द्‍यो!” 31 जद्‍या वे आमा-सामा बतळाबा लागग्या क, “अर ज्यो आपा या खेवां छा क, ‘यो उन्अ परमेसर सुं मलयो छो, तो यो खेवलो, फेर थें उंको बस्वास क्युं कोन करो?’ 32 अर आपा या खेव्अ छा, ‘वो मनखा सुं मल्यो छो,’ तो लोगबाग आपण्अ उपरअ रोष करअला।” वे वा मनखा सुं ड़रप छा क्युं क सबळा मनख या मान्अ छा क यूहन्‍ना सांच्याई एक परमेसर की ओड़ी सुं बोलबाळो छ। 33 ई बजेसुं वे ईसु न्अ जुवाब दिया, “मे कोन जाणा।” या बात सुणर ईसु वान खियो, “तो फेर म बी थांन्अ कोन बताऊ क म यो काम कस्या अधिकार सुं करू छु।”