ईसु बैतनिय्याह मं
12
1 फसह का तुंवार सुं छह दन पेली ईसु बैतनिय्याह मं बी लाजर क घरा आयो, जीन्अ वो मरेड़ा मंसुं जीन्दो कर्यो छो। 2 वे बीक्अ ताणी ब्याळू बेई रोठ्या बणालिया, अर मारथा सेवा कर'री छी। अर बीकी लार ब्याळू करबाळा मं लाजर बी बेठ्यो छो। 3 aफेर मरियम एक बण्णी सुद्ध जटामांसी को घणा मेंगामोल को अन्तर लेर आई, जिन्अ वा ईसु का पगा प्अ लगाई, अर खुदका बाळा सुं बीका पगा न्अ पुंछी। अर सबळा घर मं अन्तर की खुसबु फेलगी। 4 पण बीका चेला मंसुं यहूदा इस्करियोती नांऊ को एक चेलो ज्यो बीन्अ पकड़ाबाळो छो खियो, 5 “ई अन्तर न्अ तीन सौ चांदी का कल्दार मं बेचर गरीबा न्अ क्युं कोन्अ दिया।” 6 वो या बात ई बजेसुं कोन्अ खियो क बीन्अ गरीबा की चन्ता छी, पण ई बजेसुं क वो चोर छो। बी कन्अ रप्या की कोथळी रेव्अ छी, अर बीम्अ ज्योबी मेल्अ छा वो बीन्अ नखाळ लेव्अ छो।7 पण ईसु बोल्यो, “बीन्अ मत रोको, मन्अ गाड़बा का दन की तियारी मं या अस्यान करी छ। 8 क्युं क गरीब तो थांकी लार सदाई रेव्अला, पण मं थांकी लार सदाई कोन रेऊ।”
लाजर न्अ मारबा की जुगत
9 घणासारा मनख या सुण्या क ईसु अण्डअ छ तो वे बड़्अ भेळा होगा। वे खाली ईसु की बजे सुंई नही पण लाजर न्अ देखबा बेई बी भेळा होया छा, जीन्अ ईसु मरया मंसुं जीन्दो कर्यो छो। 10 ई बजेसुं परमुख याजक या जुगत बठाण्या क लाजर न्अ बी मार नाखां, 11 क्युं क बीकी बजेसुं घणा यहूदी मनख बान्अ छोड़र ईसु माळ्अ बस्वास कर लिया छा।
जैजैकार सुं ईसु को यरूसलेम मं उळबो
12 दूसरअ दन फसह का तुंवार मं आई भीड़ या सुण्या क ईसु यरूसलेम मं आयो छ। 13 जिसुं वे खजूर की डाळ्यां हाथा मं लेर बीसुं मलबा आया, अर जोरसुं खिया,
“परमेसर की जै हो!
इजरायल का राजा न्अ आसीर्वाद मल्अ,
ज्यो परबु का नांऊ सुं आर्यो छ!”
14 ईसु न्अ एक गद्दी को बछेरो मल्यो, अर वो बीक्अ माळ्अ सवार होगो। 15 जस्यान पवितर सास्तर मं लख्यो छ क,
“ओ सीयोन की छोरी, डरप्अ मत;
देख थारो राजो,
गद्दी का बछेरा माळ्अ बेठर आर्यो छ।”
16 सरू मं बीका चेला क ये बाता समझ मं कोन्अ आई, पण जद ईसु की महमा परगटी, तो बान्अ याद आई क ये बाता बीका बारा मं लखेड़ी छ। अर लोगबाग बीकी लार अस्यानको बेवार कर्या छा। 17 फेर भीड़ मं सुं ज्यो लोगबाग बीकी लार छा या गुवाई दिया क वो लाजर न्अ कबर मं सुं बलार मरेड़ा मं सुं पाछो जिन्दो कर्यो छो। 18 ई बजेसुं लोगबाग बीसुं मलबा आया छा क्युं क वे या सुण्या छा क वो यो चमत्कार कर्यो छ। 19 जद्या फरीसी आमा-सामा बतळाबा लाग्या क, “सोचो तो स'ई सारो संसार बीक्अ पाछ्अ चालर्यो छ अर आपा कांई बी कोन्अ कर सक्या।”
ईसु न्अ यूनानी हेरया
20 ज्यो लोगबाग तुंवार मं भजन करबा आया छा बाम्अ एकात यूनानी मनख बी छा। 21 वे गलील का बैतसैदा मं रेबाळा फिलिप्पुस कन्अ आर अरदास कर्या क, “साब, म्हे ईसु सुं मलबो चावां छा।”
22 फिलिप्पुस आर अन्द्रियास न्अ खियो, जद्या अन्द्रियास अर फिलिप्पुस ईसु कन्अ आर बताया।
23 ई बात प ईसु बान्अ खियो, “मनख का छोरा की महमा होबा की बगत आगी। 24 म थान्अ सांची-सांची खेऊ छु क जद ताणी गेऊ को दाणो जमी मं पड़र मर कोन्अ जाव्अ तो वो ऐकलो रेव्अ छ पण जद मर जाव्अ छ तो घणा दाणा पदा करअ छ। 25 bज्यो खुदका जीव सुं हेत राख्अ छ, वो बीन्अ गमा देव्अलो। अर ज्यो ई संसार मं खुदका जीव सुं हेत कोन्अ राख्अ वो बीन्अ सदामेस की जन्दगी बेई बचावलो। 26 कोई म्हारी सेवा करबो छाव्अ तो उन्अ म्हारअ पाछ्अ आणो पड़्अलो, जिसुं जड़अ म छु बड़अ म्हारो सेवक बी रेव्अलो। कोई म्हारी सेवा करअ तो म्हारो परमेसर बाप बी बीको आदरमान करअलो।”
ईसु खुदकी मोत का बारा मं खियो
27 “अब म्हारो जीव घबरार्यो छ। ई बजेसुं अब म कांई बोलु? कांई म या खेऊ, ‘ह पिता, मन्अ ई दुख की बगत सुं बचाल्अ?’ नही, पण म ई बगत ताणी जिसुं पूछ्यो छु क म यो दुख उठाऊ। 28 ह पिता थारा नांऊ की महमा होबा द्अ।”
उई बगत सरग मंसुं या आवाज आई क, “म म्हारी महमा दखायो छु, अर फेर दखाऊलो।”
29 जद्या ज्यो लोगबाग उण्डअ उबा छा अर सुणरया छा, वे अस्यान खिया क, कोई बादळो गाज्यो छ।
अर दूसरा बोल्या क, “सरगदूत बीसुं बोल्यो छ।”
30 पण ईसु खियो, “या आवाज म्हारअ बेई कोन्अ पण थांका फायदा की छ। 31 अब ई जगत का न्याय की बगत आगी, अर ई जगत मं राज करबाळा सेतान न्अ बारअ नखाळ फेक्यो जाव्अलो। 32 अर जद्या म धरती सुं ऊंचो कर्यो जाऊलो, तो सबळा को ध्यान खुद ओड़ी खींच लेऊलो।” 33 अस्यान खेर वो या जणा दियो क बीकी मोत कसीक होव्अली। 34 ई बात प लोगबाग बीन्अ खिया, “म्हे व्यवस्था की या बात सुंण्या छा क मसी सदा जीव्अलो, फेर तु कस्यान खेव्अ छ क मनख को छोरो ऊंचो कर्यो जाव्अलो? यो मनख को छोरो कुण छ?”
35 ईसु बोल्यो, “अब उजाळो थोड़ी बगत ओर थांक्अ बीच मं छ, जद ताणी उजाळो थांकी लार छ चालता रेवो। अस्यान कोन होव्अ क थां माळ्अ अंधेरो आ पड़अ। क्युं क ज्यो अंधेरा मं चाल्अ छ वो कोन्अ जाण्अ क कढ्अ जार्यो छ। 36 जद ताणी उजाळो थांकी लार छ उजाळा माळ्अ बस्वास करो क थे उजाळा की ओलाद बण सको।” या खेर ईसु उण्डअ सुं चलग्यो अर खुदन्अ वांसुं छुपा लियो।
बस्वास कोन्अ करबो
37 अर वो बांक्अ साम्अ अतरा चमत्कार दखायो पण वे बीको बस्वास कोन्अ कर्या। 38 जिसुं परमेसर की ओड़ी सुं बोलबाळा यसायाह को यो बचन पूरो हो जाव्अ क,
“ह परबु, म्हाका समचार को कुण बस्वास कर्यो?
अर परमेसर की सक्ति कुण माळ्अ परगट करी गई छ?”
39 ई बजेसुं वे बस्वास कोन्अ कर सक्या। क्युं क यसायाह दुबारा खियो छो,
40 “वो बांकी आंख्या न्अ आंधी
अर मन न्अ कळ्डो कर्यो छ,
जिसुं क वे खुदकी आंख्या सुं कोन देख सक्अ,
अर मन सुं कोन समझ सक्अ,
अर म्हारी ओड़ी कोन फरअ,
क म बान्अ नीका कर द्यु।”
41 यसायाह ये बाता ई बजेसुं बोल्यो छो, क्युं क वो ईसु की महमा देख्यो छो अर वो बीका बारा मं बाता कर्यो छो।
42 फेरबी यहूद्या का घणा नेता ईसु प्अ बस्वास कर लिया। पण फरीस्या की बजेसुं चोड़ा मं कोन्अ मान्अ छा क अस्यान कोन हो जाव्अ क बान्अ परातना करबा की ठोर सुं बारअ नखाळ दियो जाव्अ। 43 क्युं क वान्अ मनखा की बढाई परमेसर की बढाई सुं साऊटी प्यारी छी।
ईसु का बचना सुंई मनखा को न्याय
44 ईसु जोरसुं बोल्यो, “म्हारो बस्वास करबाळो, म्हारअ माळ्अ ई नही पण मन्अ खन्दाबाळा माळ्अ बस्वास करअ छ। 45 अर ज्यो मन्अ देख्अ छ वो मन्अ खन्दाबाळा न्अ देख्अ छ। 46 म संसार मं उजाळो बणर आयो छु, क ज्योबी म्हारो बस्वास करअ वो अंधेरा मं कोन रेव्अ।”
47 “कोई म्हारी सुणर बस्वास कोन करअ तो म बीन्अ दोषी कोन्अ ठेराऊ क्युं क म संसार न्अ दोषी ठेराबा कोन्अ पण बीको उद्धार करबा आयो छु। 48 ज्यो मन्अ अर म्हारी बाता न्अ कोन्अ मान्अ बीन्अ दोषी ठेराबाळो तो एक छ, मतलब म्हारो खियेड़ो बचन। बोई बीन्अ आखरी दन मं दोषी ठेराव्अलो। 49 क्युं क म खुदकी ओड़ी सुं कोन्अ बोल्यो, पण मन्अ खन्दाबाळो बाप मन्अ आज्ञा दियो छ क कांई खेऊ अर कांई सखाऊ। 50 अर म जाणू छु क बीकी आज्ञा सदामेस की जन्दगी ओड़ी लेजाव्अ छ। ई बजेसुं परमेसर बाप मन्अ बोल्अ छ वस्यानई म खेऊ छु।”