काना नगर मं बियाऊ
2
1 गलील का काना नगर मं तीसरअ दन कोई क बियाऊ छो। ईसु की माई बी उण्डअ मेजुद छी, 2 अर बियाऊ मं ईसु अर उंका चेला न्अ बी बलाया छा। 3 जद्या उण्डअ दाखरस बितग्यो तो ईसु की माई उन्अ खेई, “वां कन्अ ओर दाखरस कोन्अ।”4 ईसु उन्अ खियो, “ह माई, या तु मन्अ क्युं खेरी छ? हालताणी म्हारी बगत कोन आयी।”
5 फेर उंकी माई सेवा करबाळा न्अ खेई, “थे वाई करो ज्यो यो थान्अ खेव्अ छ।”
6 उण्डअ पाणी भरबा बेई भाटा का बड़ा-बड़ा छह मटका छा। ये मटका वस्यान काई छा जस्यानका यहूदी पवितर स्नान बेई काम मं लेव्अ छा। हरेक मटका मं अन्दाजन दो-तीन मण पाणी माव्अ छो।
7 ईसु सेवा करबाळा न्अ खियो, “यां मटका न्अ पाणी सुं भरद्यो।” अर सेवा करबाळा वां मटका न्अ तरांतर भर दिया।
8 फेर वो वान्अ खियो, “अब थोड़ो बारअ नखाळो अर दावत को अन्तज्याम करबाळा परधान कन्अ ले जावो।”
अर वे उन्अ लेग्या। 9 फेर दावत को अन्तज्याम करबाळो उं पाणी न्अ चाख्यो ज्यो दाखरस बणग्यो छो। उन्अ तोल ही कोन पड़यो क यो दाखरस कढ्अ सुं आयो छ। पण वां सेवा करबाळा न्अ ईको तोल छो ज्यो पाणी नखाळर ल्याया छा। फेर दावत को अन्तज्याम करबाळो लाड़ा न्अ बलायो। 10 अर उन्अ खियो, “हर कोई पेली चोखो दाखरस परोस्अ छ अर पेर जद्या पावणा पीर धाप जाव्अ छ तो बेकार। पण तु तो चोखो दाखरस हालताणी बी बचार रखाण मेल्यो छ।”
11 ईसु गलील का काना गांव मं यो पहलो अचम्बा को काम कर्यो छो। जिसुं उंका चेला उम्अ बस्वास कर्या छा।
12 aउंक्अ पाछ्अ ईसु खुदकी माई, भाई अर चेला की लारा कफरनहूम चलग्यो जण्ढ्अ वे थोड़ा दना ताणी रूक्या।
ईसु को मन्दर मं जाबो
13 यहूद्या को फसह को तुंवार सांकड्अ'ई छो, जि बजेसुं ईसु यरूसलेम गियो। 14 उण्डअ मन्दर का आंगणा मं ईसु देख्यो क लोगबाग ज्यानबर, लळ्डया, कबुतर अर रप्या पिसा की लेवाळी देवाळी करबाळा खुदकी दुकाना लगामेल्या छा। 15 जिसुं ईसु जेवड़ा को कोवडो बणार सबळा का ज्यानबर, लळ्डया समेत मन्दर क बारअ नखाळ दियो। अर पाछो मुड़र रप्या पिसा की लेवाळी देवाळी करबाळा का पिसा बखेर दियो अर वांकी चोक्या उलाळ दियो। 16 कबुतर बेचबाळा न्अ वो खियो, “वान्अ अण्डअ सुं बारअ ले जावो। म्हारा परम-पिता का घर न्अ बजार मत बणाओ!”
17 जद्या उंका चेला न्अ सास्तर मं मण्ढी वा बात याद आई क, “थारा घरको परेम म्हारअ मायन्अ आग की न्याई बळर्यो छ।”
18 यहूदी नेता ईसु कन्अ आर बुज्या, “तु म्हान्अ कस्यो चमत्कार दखा सक्अ छ, जिसुं यो साबित होव्अ क थन्अ अस्यान करबा को अधिकार छ?”
19 bईसु वान्अ खियो, “ई मन्दर न्अ ढसाद्यो अर म तीन दन मं ईन्अ फेरू बणा द्युलो।”
20 तो यहूदी उन्अ खिया, “ई मन्दर न्अ बणाबा म्अ छियाळीस बरस लाग्या छा, तु ईन्अ तीन दन मं कस्यान बणा देव्अलो?”
21 पण ईसु जि मन्दर की बात करर्यो छो वोतो उंको खुदको सरीर छो। 22 अर जद्या वो मरया मंसुं जीवतो होग्यो, तो उंका चेला न्अ याद आयो क ईका बारा मं वो वान्अ खियो छो, अर सास्तरा प अर ईसु ज्यो खियो छो उंप्अ वे बस्वास कर्या।
मनखा का बेवार का बारा मं ईसु को ज्ञान
23 फसह का तुंवार की बगत जद्या ईसु यरूसलेम मं छो, घणा लोगबाग उंका अचम्बा का कामा न्अ देखर उम्अ बस्वास कर्या। 24 पण ईसु खुदन्अ वाक्अ भरोसअ कोन्अ छोड़यो, क्युं क वो सबळा लोगबागा न्अ जाण्अ छो। 25 उन्अ ई बात की कोई जुरत कोन छी क कोई आर उन्अ लोगबागा बेई बताव्अ, क्युं क लोगबागा का मन मं कांई छ, उन्अ वो जाण्अ छो।