2
Iŋ'ite ho h'eene fu it'ibin t'aruun,
kaanuku atum'aŋk'arisooñ áritaañian.
2 Ábuki if'íhinuun áriitaañian,
at'asooñ abajee an éeyinie káhinu hikawam heetoof,
ábuki arireyi fe káataañianin.
3 Iŋ'ite ho h'ibine fu íkiñjinuun yaayu eleetara,
ábuki ímaŋiit bibin t'aruun,
n'íŋaabein bakan keeware ku yéeni káhinu hikawam heetoof ni káhinam íitaañian.
Múniyo bukuuramkuur kaanuku hikawam ufu hutoof,
arireyi fe koonuun ku yooŋ uŋu kutoof.
4 Ítaañianataañian dómbokun h'ibine hu íkiñjinuun,
ehelam ehabanahabano yooŋ fe,
abe iyiyayiy dómbokun.
Ímaŋiituun káhinu áriitaañian,
bare ikiñjuunkiñj kaanuku áriimeyi naane ímaŋiuun i ariike.
Pool n'aane aboŋketa an eehoofooro u
5 Arko ake t'aruun áhinahin ésuk i kéetaañian,
íñjeiit a átumbe fu áhin íitaañian,
bare aruun arireyi fe,
man yooŋ bakaake t'aruun — abe bondu bijarut kahahan.
6 Ániine ondu,
naane keehooje t'aruun kakamoore i te o,
bondu bifamofam.
7 Iŋ'ite ho aamo fu hahiyu ariwarowar kaboŋket,
abe n'ariwuno yooŋ ehel kaanuku man kátaañian ku itim kíhin ehelo yéebujo.
8 Náami íñj'endu ti kaanuuun áriwufooro kaanuku árimaŋiomaŋi.
9 Béekinineŋe bu n'íkiñjinuun haahu beemo fu bonde:
kaanuku iijuk buŋ bi siheluun seemo fu ariike,
man aŋ'árijeŋginam tu doon areyi.
10 Af'ariboŋket an u,
íñje yooŋ iboŋketoboŋket.
Ábuki if'iboŋket an ondu ti b'ibaje bu bite kaboŋketo,
aruun árikinineŋe fu n'íhin bo,
abe íhina bo tu buhooŋu *Kiris.
11 Íhinahin bo kaanuku Setani atum'abin ahaŋ úne sembe.
Múniyo úmoomi jak bamb'aŋes.
Pool ajahalajahale dómbokun t'ésuk ite Trowas
12 H'ije hu Trowas kaanuku iiwaare bo Hirim Heetoofe hite hu *Kiris,
n'ijuk kaanuku Anahaan u áfeŋginamfeŋgin bo bítim kaanuku iirok.
13 Bare ehelam ebebut,
ábuki ijukut bo ati úne Tit.
Iŋ'ite ho h'eene fu bakate ku Trowas *kéeyilene ku iriwasoor,
abe n'ija Maseduwanb.
Yesu Kiris n'áhin núuriiŋan
14 Bare úene Atambatun eyeehen,
ábuki aŋ'aja n'úne ko kireyi fe kaanuku núumaat tu búriiŋan bite *Kiris.
Úne k'ásike fu kaanuku núuhin Kiris éemeyiee tánotan,
naane mátiso meehundane tánotan.
15-16 Ábuki t'Atambatun úne úemo fu naane haaw heetoofe hite hu Kiris hihi hireeŋ ésuk i.
Ti keeemo ku ti kafaku ku,
úne haaw heejake hite buroŋ hihi hibin nu buroŋ bu;
bare ti keeemo ku tu bútowuto bu,
úne haaw heejakut hite eket hihi hibin n'eket i.
Aañ áyinie káhinu burok naane bondu?
17 Irinooto naane bakaaku keehooje kaa kiŋki kájula Hirim hite Atambatun.
Uni iŋ'írihamin boone bu ajoŋoor júl,
abe yooŋ tu buhooŋio naane eroka bakate Kiris,
ábuki akina Atambatun aboñe fu uni.