Pool n'awaare bite eket ite Kiris t'ekuruwa i
2
Kújakuwe,
h'ibine hu t'aruun kaanuku iiwaareuun b'Atambatun ánuusaanie bu,
iŋesut ariibin ariene ímoomi báhamin ihaban,
man yooŋ íñje an eejaŋgee.
2 Ábuki h'ibine hu t'aruun,
íhabaneinohabanein kaanuku it'isok bike fe,
kane arko bite bu Yesu *Kiris eeyoolee u *t'ekuruwa i.
3 Iŋ'ite ho h'ibine fu t'aruun ni kabajaate kúuma sembe,
ti kábitu yooŋ ekoloowe yéekinineŋa.
4 B'isoke bu ni b'iwaare bu,
íhinut bo ni kirim keetoofe kite búwesinato bite húŋgowulan.
Bare Atambatun áwufooruunwufoor ni sembe site Búwejet boone kaanuku b'isoke bu bite toko.
5 Iŋ'ite ho aamo fu káyilen koonuun kúnuutinoot tu búwesinato bite húŋgowulan,
bare ti sembe site Atambatun tu kúnuutina fu.
Atambatun af'awun búwesinato
6 Bare keeemo ku káyilen kooniin kiyanayan,
iŋ'iriwaareiin búwesinato bu.
Búwesinato bite bíiit t'etaam ye,
bite bíiit yooŋ bakan kómbokun ku bakate ku t'etaam ye keeemo ku bakate bútowuto.
7 Aaa,
iŋ'iriwaare búwesinato b'Atambatun ánuusaanie bu,
abe kúŋgowulan ku kánandinut bo.
Atambatun afiyafiya afare búwesinato bondu t'etaam i éwuwanoorutee,
bija ti kánikan kite k'úne.
8 Mayet afeeneŋ ti bakan kómbokun ku bakate ku t'etaam ye ámeyie búwesinato bondu.
Kane kámeyi bo,
man katib yéeni *t'ekuruwa i Anahaan éenike u.
9 Bare *Míkiñjin mu meenaan:
«B'an ámusut bu kajuku,
b'an yooŋ ámusut bu kajamu,
ni b'an ámusut bu kayinoor,
Atambatun afarafare bo bija ti bakan kéemaŋio kub.»
10 Abe úne k'Atambatun áwufoore fu bondu,
áŋaasann bo tu Búwejet Beenabe bu.
Múniyo Búwejet bu uŋu bujondoman tu doon areyi fe,
bija yooŋ biyinoor bite Atambatun beehaŋe bu kásuli.
11 Aañ ámeyie beeemo bu tu húŋgowulan,
t'arkut búwejet boone akina humuumo?
An yooŋ ayinaat kámeyi beeemo bu t'Atambatun,
kane arko Búwejet bite Atambatun humuumo taŋ.
12 Úne bare úmoomi buroon b'Atambatun awune bu úne,
ábuki búwejetiit bite t'etaam ye b'úbaje fu,
bare Búwejet béenuutina bu t'Atambatun.
13 Abe uŋ'úsok bo,
káanukiiit man ni báhamin béenuutina tu búwesinato bite húŋgowulan,
bare ni báhamin bu Búwejet bite Atambatun biliikene bu úne.
Iyu uf'úkam buroon bite Atambatun keebaje ku Búwejet boone.
14 Bare húŋgowulan héeyekiit Búwejet bite Atambatun iŋi hiteñeko buroon bu Búwejet bondu bumbu buwun:
te o bondu buñunut.
Ayinaat kánandin bo,
ábuki nu Búwejet Beenabe bu taŋ n'an ayino fu bo kánandin.
15 Húŋgowulan heebaje Búwejet bite Atambatun húnooni kánandin doon areyi fe,
bare akina,
an ayinaat kánandin boone bu.
16 Míkiñjin mu meenaan:
«Aañ ámeyie biyinoor bite Atemit?
Aañ áyinio karimuc?»
Úne bare biyinoor bite *Kiris b'úbaje fu.