Buroŋ bíyeni ni Kiris
12
Náami kújakuwe,
makamu Atambatun aŋ'ayubiyen úne dómbokun,
íñj'endu ti kaanuuun waasi,
ariwuno siniuun naane *kaasarah keeroŋe,
keenabe yooŋ,
abe nu kutoofo.
Iyu a ariwaro fu kasayi ti hiñaawu nu múniyo.
2 Atum'ariliikool ni máhinar mite mu bakate ku t'etaam yea;
ariwas Atambatun eewunuun biyinoor bíyeni,
man n'áriyemi bakan kíyeni.
Af'árihin iyu,
n'aŋ'áriyini kánandin b'ámaŋie bu.
Bo beemo fu beejake bu,
ni beetoofo bu,
ni beekuure bu but.
3 Makamu Atambatun áwufooramwufoor kajaku koone,
iisokuun bonde arireyi fe:
an t'aruun atum'ayitooro.
Árimeyi kep buŋ b'ariemo fu ariike,
huruw fe t'aruun aliik ti káyilen k'Atambatun awuno ku.
4 Eni yite húŋgowulan efeeneŋ,
bare ebajabaj buroon beehooje,
abe dóonodoon fe nu burok bite te do.
5 Iyu yooŋ u úemo fu:
naane úhooje i fe,
úmoomi naane eni efeeneŋ,
ábuki úhinahin t'afeeneŋ ni *Kiris.
Újokoorajokoor naane buroon beeemo t'eni efeeneŋ.
6 Atambatun awunawun úne huruw fe éeyini káhinu buroon beewayee,
aliik ti kajaku koone k'áwufoore ku úne.
Náami an eewunee kaanuku aŋ'abin ayiŋan bite b'Atambatun,
áhin bo aliik ti káyilen k'abaje ku.
7 An eewunee kaanuku aŋ'abin áyokunan bakaaku,
ajok te bo.
An eewunee kaanuku aŋ'abin aliiken bakaaku,
ajok te bo.
8 An eewunee kaanuku aŋ'abin ayaŋganan bakaaku kikaw,
ajok te bo.
An aa awun ebaj yeene,
ajok te bo n'ehol yeekuure.
An eewunee kaanuku aŋ'ágilan *kéeyilene ku,
ajok te bo alitee.
An eewunee kaanuku aŋ'ayubiyen bakaaku,
atoofan te bob.
9 Kámaŋi koonuun kíyemi kite nu múniyo.
Ariteñeko meejakut mu,
abe n'arijok ti meejake mu.
10 Árimaŋioori naane bakati.
Árihabanein ti kájeŋgin kite bakaaku.
11 Áriyemi éñiŋkaana,
abe atum'áriyemi biñek.
Ñúwejet ñooniin ñíhabanein tu burok bite Anahaan u.
12 Kikawuun kutoof iŋ'ite eyakar y'aribaje i.
Árimuñ ti sílaam sans'arijuk,
abe n'aŋ'áriñiŋkaan ti kalawu ku.
13 Áriyokunan bakanuun kéeyilene ku keebaje ku bisawula,
abe n'aŋ'arijok áwariee kiŋki kawanan t'aruun.
14 Arilaw Atambatun éesoniyan kiŋki káhihinooruun;
arilawo éesoniyaniin,
atum'arieno áwuumiinc.
15 Aritoofan ni keeemo ku ti katoofu ku,
abe n'ariyiy ni keeemo ku ti biyiy bu.
16 Arijok ésuk i fe kare.
Atum'ariyitooro,
bare arijokoor ni bakan keejokutee ku doon fe.
Atum'arijokooro bakan kéewesinateed.
17 An af'áhinuun meejakut,
atum'aribatikano meejakut.
Ariŋes káhinu b'ésuk i fe eene bu bijakajak.
18 Af'aribaj bítim,
árihin wáhowah ariijamoor n'ésuk i fe.
19 Kújakuwe,
aruun k'ímaŋie-maŋie ku,
atum'aŋ'arinukan aruun kumuumuun t'an éehinuun meejakut,
bare ariwas Atambatun eebin eenij te o,
ábuki Atemit aanaan ti *Míkiñjin mu:
«Íñje ija fu kanukan ku,
íñje yooŋ ija fu kabatikaniin doon di karoke due.»
20 N'asooñ yooŋ aane:
«Anatoora úuwe af'ajoñjolat,
a̱wuno eeñoofo;
búhujo nu bujoko,
a̱wuno éehujo.
Af'á̱hin iyu,
anokooreenokoor kite awe á̱sike kíjeget kéetife a̱naŋ ti hikawof.»
21 Atum'ariwas meejakut mu meehaŋuun sembe.
Arijaaŋo mo ti káhinu kite meejake mu.