Pool n'aane kaja ne o t'áyi ómbokun eeemo u Rom éekotiniin
25
Hi Festus áreeŋina hu Sesare abaj kunak kíhaaji,
n'anuut bo eeja Serusalem.
2 Areeŋ,
eseef ite *esaraha i,
n'Esuwif i keeemo ku kikaw kite hikinu hu ni kakalame Pool te o.
Ni káwasiyanooro
3 kaano waasi,
áyokunaniin eebin nu Pool Serusalem.
Kámaŋamaŋi káhinu iyu,
ábuki kajamoorajamoor kaanuku keebin kéewufoo ti bítim bu keeyoolo.
4 Bare Festus n'aaniin:
—Pool ondu Sesare t'ekulu i,
abe íñje humuumam memee n'iŋ'ibatuko.
5 Eseef yeenuun káriboorin n'íñje bija bo,
abe arko ániine ondu áhinahin bike beejakut,
n'iŋi kakalamoo bo.
6 Festus n'abaj tu boko kunak hutok ni kíhaaji man yooŋ sumoŋu,
abe n'abatuko Sesare.
Tifiit,
n'ariiko ti báajoonanum bu,
abe n'aboñ bite Pool.
7 Hi Pool áreeŋina hu,
Esuwif i kéenuutina ku Serusalem ni kákuuto,
abe ni kasok kaanuku áhinahin buroon beehooje beejakut,
bare kayinaat káwufoor múniyo mite te bo.
8 Pool n'áhamin kaanuku eeramooro.
N'aane:
—Itinut mayet t'Eluwa yite Esuwif i,
íhinut beejakut *t'Enuuf ite Atambatun,
isokut yooŋ *t'áyi ómbokun eeemo u Rom.
9 Festus ámaŋamaŋi káhinu Esuwif i kikawiin keetoof te o.
Náami eeene Pool:
—Kaanuku a̱aja Serusalem a̱ajoonanee bo tu buhooŋiam iŋ'ite hu bonde,
n'aŋ'a̱ane hee?
10 Pool n'aano:
—Íñj'endu ti báajoonanum bite áyi ómbokun eeemo u Rom;
toko t'iware fu kajoonanee.
Awe humuumi á̱moomi akuur but kaanuku itinut t'Esuwif i.
11 Arko itinatin,
íhinahin bike beejare n'iyoolee,
iteñekeit eket i.
Bare arko bimbi katinanam ii te bo bíteiit toko,
an awarutam kásiku asaaniin.
Ímaŋamaŋi áyi ómbokun eeemo u Rom ajoonanama.
12 Festus n'ajab áhamin n'erima yeene,
ahaban n'ásafin aane:
—A̱ane á̱maŋamaŋi áyi ómbokun eeemo u Rom ajoonani?
Kame awe bija t'áyi ómbokun eeemo u Rom.
Pool hágila Agiripa ni Berenis
13 Abaj kunak,
áyi u Agiripa ni Berenis ni káreeŋin Sesare,
bibin káhamin ni Festus.
14 Náami makamu boko bifiyo bo,
Festus n'asok áyi u bite bu Pool.
N'aano:
—Abajeebaj diye ake ániine i Felikis akule.
15 H'ije hu Serusalem,
eseef ite *esaraha i,
ni *sifaaf site Esuwif i ni kakalamoo t'íñje,
kaane ineyano.
16 N'isokiin kaanuku bakate ku *Rom kásikaariit an eetinanee kasaan bakan,
t'ajabut asiiŋo hágila keekalamoo ku eekam,
eeramooro ti bi kasejano bu.
17 Ni káriboorin n'íñje bibin beebe.
Íkurioorut yooŋ:
hi tifiite hu,
n'iriiko ti báajoonanum bu,
abe n'iboñ bite ániine u.
18 Keekalamoo ku ni kasiiŋo,
abe kasejanuto mayet bifeeneŋ béekojie ti b'ifooge bu yéeni.
19 Bi kabajoore bu ne o bite ti bítim booniin taŋ,
ni bite yooŋ ake ániine eekete iŋi kaano Yesu,
abe Pool n'aŋ'aane ondu tu buroŋ.
20 Ímeyiit yooŋ naane iware i káhinu íikotin báhamin naane bondu.
Náami íikandijen Pool man aanaan hee eeja Serusalem kaanuku man n'ajoonanee bo iŋi báhamin bondu.
21 Bare Pool n'alaw aane *áyi ómbokun eeemo u Rom eebin eejoonano.
N'isok eene akulee bija kóyin k'ija ku káyini kaboñio áyi ómbokun eeemo u Rom.
22 Agiripa n'aane Festus:
—Íñje humuumam yooŋ ímaŋamaŋi kajamatan ániine ondu.
Festus n'aano:
—Kuwaatu awe kajamatano.
23 Náami hi tifiite hu,
Agiripa ni Berenis ni kabin ánik,
abe ni kayooso t'enuuf i tindi kakuukanooro,
boko n'eseef ite esulaan i,
ni bakan kómbokun ku bakate hikinu hu.
Festus n'aboñ keebin nu Pool.
24 Ahaban n'aane:
—Maan Agiripa,
n'aruun fe keeemo ku diye,
ániine u ondu,
Esuwif i kareyi fe kabinabin t'íñje Serusalem ni beebe keekalamoo,
iŋi kayiy-yiy kaane awarut karoŋu.
25 Íñje bare ijukut b'áhine beejakut beejare n'ayoolee.
Bare makamu aanaan ámaŋamaŋi áyi ómbokun eeemo u Rom ajoonano,
n'eene kame íñje kaboñioo.
26 Ibajut te o bike beekuure b'iware kakiñju áyi ómbokun eeemo u Rom.
Iŋ'ite ho h'isooñe fu ibin ne o tu buhooŋuuun,
áhaŋum t'awe maan Agiripa,
kaanuku man af'ákandijenee ahaban,
n'ibaj b'iware bu kakiñju.
27 Ijukajuk kaanuku nu múniyo ajeitee an eekulee n'aboñee ake,
ti béekinineŋe bu n'akalamee busokutee bukuur.