Omusimbe omukuru na ogutyenyi ogukangaaru
17
Kimwi, oumwi wa bhamaraika muhungati bhanú bhaaringa na amabhakuri ga enkoro ya Waryubha garya, akaaja akankeerya ega, “Nuuje, nkoorokye obhujibhu bhunú arihaanwa omusimbe omukuru unú yeekeeri kumanji amaaru. 2 Abhakama bha ekyaro bhaakora nawe obhusimbe, na abhantu bhanú bhareekara mukyaro, bhonse bhaarehwa amarwa gaaye, ngo gaakora bhakore obhusimbe nawe.”3 Mbe, Omutima Omurabhu akanyituumira. Maraika akanyorokererya okuhikira kukibhara. Nkarora eyo omukari, yeekeeri eguru ya ogutyenyi ogunene ogukangaaru. Ogutyenyi guyo gwaringa na emitwe muhungati na amatira ekumi. Omubhiri gwago gwaringa gungʼoorerwe-ko amariina amaaru ga okumujabhura Waryubha. 4 Omukari uyo yaaringa yeebhoheri emyenda emijomu gya erangi ya jambaraawe na enkangaaru. Na yaaringa yeejomerye kwa egijahaabhu, amagina ga obhwera obhunene na egiruru. Mukubhoko kwaye, yaaringa agwatiri ekikombe kya egijahaabhu, kinú kyaringa kiijwiri amangʼana ga okumujimya Waryubha, na ebhintu ebhinyanku bhya obhusimbe bhwaye. 5 Kukisyusu kyaye, bhwaringa bhungʼoorerwe-ko eriina rinú ensonga yaaryo yaaringa ibhisiri. Eriina eryene n-dinu,
omugi omukuru gwa bhabheri,
ngʼina waabho abhasimbe
na ngʼina waabho obhujimya bhwa ekyaro.
6 Nkarora omukari uyo, areherwe kwa okunywa amanyinga ga abhantu bha Waryubha, bhanú bheetwa kwa okubha bhaaringa abheemiririri bha Yeesu.
Hanú naamurora, nkaruguura bhukongʼu, 7 nawe, maraika urya akambuurya ega, “Kwaki oruguuriri? Tiga nkukeerye ensonga ya ekinyerera kya omukari uyo na ogutyenyi gwa emitwe muhungati na amatira ekumi, gunú gwaringa gumugegeri. 8 Ogutyenyi ogunene gunú waarora, gwaringa oguhoru, nawe, bhoono gukwiri. Bhoono, guringi haangʼi okurwa mwituko rya ekibhohe kya amasambwa, nawe, Waryubha arigusikya. Na abhantu bhonsego bha mukyaro bhanú amariina gaabho gataangʼoorwa mukitabho kya obhuhoru bhwa koko eribhaga rinú ekyaro kyabhumbwa, bhariruguura okurora ogutyenyi guyo, kwa okubha akare gwaringa-ho, kimwi gukakwa na bhoonwego guramaahikana kweki.”
9 Maraika uyo akagendererya okugamba ega, “Eringʼana rinu rireenda egintungwa. Waarora emitwe muhungati. Emitwe giyo, gireemiririra eginkuku muhungati ginú omukari urya yaaringa yeekariiri. 10 Kweki emitwe muhungati giyo, gireemiririra abhakama muhungati. Gati ya abhakama muhungati bhayo, abhataanu bhamariri okukwa, oumwi akyatunga. Omukama oundi aritunga eribhaga erindi na hanú ariija, aritunga kwa eribhaga ekego. 11 Na ogutyenyi ogunene gunú gwaringa oguhoru kimwi gukakwa, m-mukama wa munaane. Uyo, ngʼ-umwi wa abhakama muhungati bharya, nawe, Waryubha arimusikya.
12 “Na amatira ekumi ganú waarora gareemiririra abhakama ekumi bhanú bhakyari okutunga. Bhayo bhonsego bharihaanwa obhuturo bhwa okutunga hamwi na ogutyenyi ogunene guyo, nawe, kwa eribhaga rya ensa eimwi ego. 13 Abhakama ekumi bhayo bharibha na ensonga eimwi, bhonse bhariguhaana ogutyenyi ogunene guyo, obhutungi bhwabho na obhuturo bhwabho bhonsego. 14 Bharigwatana nago okukora eriihe na Omwana wa Eringʼondi. Nawe, Omwana wa Eringʼondi hamwi na abhantu bhaaye, aribhahiga, kwa okubha weeki m-Mukuru wa abhakuru bhonsego na Omukama wa abhakama bhonsego. Abhantu bhaaye bhayo, m-banú bhaabhirikirwa na okusorwa na Waryubha, bhonse m-baheene.”
15 Maraika akagendererya okugamba ega, “Amanji ganú omusimbe urya yeekeeri-ko, gareemiririra abhantu bha amakabhira gonsego, abha egihamati gyonsego, abha ebhyaro bhyonsego na abha ebhigambo bhyonsego. 16 Amatira ekumi ganú waarora na ogutyenyi ogunene guyo, bharimubhihirirwa omusimbe urya. Bharigega ebhintu bhyaye bhyonsego na okumutiga kinaabhi. Bharirya enyama yaaye, na amasaagyo, bharigeesa mumururo. 17 Waryubha omwene abhakoreri bhakunaanʼye ensonga yaaye. Abhakoreri okuhaana ogutyenyi ogunene guyo, obhuturo bhwabho bhwa okutunga. Bheeki bharikora ego, okuhikira hanú amangʼana ga Waryubha garikunaana. 18 Omukari urya waarora ngʼo omugi omukuru gunú guuna obhutungi eguru ya abhakama bhonsego bha mukyaro.”