16
Kimwi, nkeegwa eriisi erinene okurwa mwisyengerero erikuru rya Waryubha muyo, rirabhakeerya bhamaraika muhungati bharya ega, “Mugende muhumirire mukyaro amabhakuri muhungati garya ga enkoro ya Waryubha.” 2 Nho, maraika wa okwamba akagya, akahumirira mukyaro eribhakuri ryaye rya enkoro ya Waryubha. Hayohayo, abhantu bhonsego bhanú bhaaringa bhatemerwe orubhaaso rwa ogutyenyi ogunene na okusyengera ekisusano kyago, bhakarwara amahute amabhiibhi ga okwatya bhukongʼu.3 Maraika wa kabhiri wonse akahumirira eribhakuri ryaye munyanja. Na amanji gakakyuka gakabha amanyinga kya aga omuku na ebhibhumbwa bhyonsego bhya obhuhoru munyanja bhikakwa.
4 Kweki, maraika wa kasatu wonse akahumirira eribhakuri ryaye muginyuji na ebhisekaani bhya amanji, na amanji gayo gonse gakakyuka gakabha amanyinga. 5 Nho, nkeegwa maraika omwimiririri wa amanji aragamba ega,
“Ee Waryubha Omurabhu,
uuwe unú oriho, unú waaringa-ho okurwa obhusimuka,
uuwe nuuwe omuheene,
na obhubhuturi bhwa ekiina bhwaho bhuyo, m-bwa heene.
6 Abhantu abhasarya bheetira amanyinga ga abhantu bha emitima emirabhu na abharooti bhaaho,
uuwe Omukuru obhaheeri amanyinga, bhanywe.
Na obhujibhu bhuyo mbo bhareenderwa!”
7 Nho, nkeegwa eriisi okurwa ahasi ha okumwensera riragamba ega, “Ee, Omukuru Waryubha wa obhuturo bhonsego, obhubhuturi bhwa ekiina bhwaho m-bwa heene na bhwa obhuheene.”
8 Nho, maraika wa kane akahumirira eribhakuri ryaye kuryubha. Eryubha rikeekiriribhwa okusamba abhantu kwa omururo gwaye. 9 Abhantu bhakasambwa na eribhiriira bhukongʼu. Bhakatuka eriina rya Waryubha owa obhutungi eguru ya egingʼanga giyo, nawe, bhataamwihunjurira okurwa mubhusarya bhwabho kora bhataamugungya.
10 Na maraika wa kataanu akahumirira eribhakuri ryaye, kukitumbi kya ekikama, kya ogutyenyi ogunene gurya. Rumwigo, ekisunte kikakundikirya obhukama bhwago, na abhantu bhakeerumaruma egindimi gyabho, kwa obhururu. 11 Bhakamujabhura Waryubha wa murwire kwa ekisigo kya obhururu obhuhaari bhunú bhaaringa bhareegwa, na amahute amabhiibhi gaabho. Kora bhataamwihunjurira Waryubha okurwa kumakorwa gaabho amabhiibhi.
12 Maraika wa kasansabha wonse akahumirira eribhakuri ryaye muruuji orukuru rwa Efurate. Oruuji ruyo rukooma, naho enjira erosibhwe kubhakama bhwa okurwa bhuturira-ryubha.
13 Nho, nkarora ebhihwi ebhibhiibhi bhisatu bhinú bhihunkeeni kya ebhikere. Ekihwi ekimwi kyarwanga mumunwa gwa erijoka rirya, ekihwi ekindi kyarwanga mumunwa gwa ogutyenyi ogunene gurya, na ekindi kyarwanga mumunwa gwa omurooti urya wa obhubheehi.a 14 Ebhihwi ebhibhiibhi bhiyo bhyaringa na obhuturo bhwa okukora ebhimanyiiriryo, na emirimu gyabhyo n-kugya kubhakama bhonsego mukyaro, okubhakumanʼya bhakore eriihe orusiku orukuru rwa Waryubha wa obhuturo bhonsego.
15 Omukuru Yeesu aragamba ega, “Maaha! Ndiija kya omwibhi. Anonkerwe unú aratengeeja na okwibhoha emyenda gyaye, naho atariija okugenda kinaabhi na okusuuka.”
16 Mbe, ebhihwi bhiyo bhikakumanʼya abhakama bhonsego na abhasirikare bhaabho, ahasi hanú harabhirikirwa Harimagedoni mu Kiebhurania.
17 Nho, maraika wa muhungati akahumirira eribhakuri ryaye kurwire. Na oni nkeegwa eriisi erinene okurwa kukitumbi kya ekikama kya mwisyengerero erikuru rya Waryubha, riragamba ega, “Gonsego gahweri!” 18 Hakabha na egimesyo, eriisi rya orukubha, na ekirigiti kya erirobha. Ekirigiti kiyo kyaringa na eginguru bhukongʼu, okukira ebhirigiti bhyonsego okwambira okubhumbwa kwa abhantu. 19 Nho, omugi omukuru gwa Bhabheri gukaahukana mbaara esatu, na emigi emikuru gya ebhyaro gikahaanyuka gyonsego. Waryubha wonse ataarabhirwa amakorwa amabhiibhi ga omugi omukuru gwa Bhabheri. Akagubhandirirya gunywere mukikombe kya amarwa ga enkoro yaaye. 20 Ekirigiti kya erirobha kirya, kikakora amaginga gonsego gakatubhira, na eginkuku gyonsego gitaamaahikana kweki. 21 Embura ya omusoke ekatwa. Amagina amanene ga omusoke ganú gaaringa na egikiro muna mirongo etaanu kira erimwi, gakagwira abhantu okurwa murwire. Abhantu bhakamujabhura Waryubha kwa ekisigo kya engʼanga iyo, ya embura ya omusoke, kwa okubha yaaringa engʼanga embiibhi bhukongʼu.