Eriimbo rya Omwana wa Eringʼondi na Musa
15
Kimwi, nkarora ekimanyiiriryo ekindi murwire. Ekimanyiiriryo kiyo kyaringa ekinene na kya okuruguurya. Naarora bhamaraika muhungati, bharareeta egingʼanga muhungati gya obhuteero. Egingʼanga giyo, gyaringa gya okukunaanʼya enkoro ya Waryubha. 2 Kweki, nkarora ekintu kinú kyaringa kya enyanja ya ekirore kinú kisanganiibhwe na omururo. Na embarika hayo, abhantu bhaaringa bheemiriiri bhanú bhaaringa bhahigiri ogutyenyi ogunene gurya, ekisusano kyago, hamwi na erisaabhu rya eriina ryago.a Abhantu bhayo bhaaringa bharagwata amatungu mumabhoko gaabho ganú bhaaringa bhaheerwe na Waryubha, naho bhamusyengere. 3 Bhaaringa bhareemba eriimbo rya Musa omugaya wa Waryubha, erya Omwana wa Eringʼondi, bharagamba ega,“Omukuru Waryubha wa obhuturo bhonsego,
amakorwa gaaho m-marito na ga okuruguurya.
Uuwe nuuwe Omukama wa ebhyaro bhyonsego,
na eginjira gyaho n-gya heene na n-gya obhuheene.
4 Ee Omukuru, abhantu bhonsego bharikwigwa,
na okugungya eriina ryaho,
kwa okubha uuwe omwenego nuuwe omurabhu.
Abhantu bha ebhyaro bhyonsego bhariija na okukusyengera,
kwa okubha amakorwa gaaho ga heene gabheeri kubhurabhu.”
Bhamaraika muhungati bha egingʼanga
5 Hanú gayo gaahwa, nkarora erisyengerero erikuru risiikwirwe murwire, riyo ndyo eribhuru rinú riroorokya okubha-ho kwa Waryubha.b 6 Bhamaraika muhungati abha egingʼanga muhungati bharya bhaarwa mwisyengerero muyo. Bhaaringa bheebhoheri emyenda emirabhu gya obhuguri obhunene ginú girangʼesangʼesa, na emichipi emigari gya egijahaabhu mubhikubha bhyabho. 7 Oumwi wa ebhibhumbwa ebhina bhya obhuhoru bhirya, akabhahaana bhamaraika muhungati bharya kira oumwi eribhakuri rya egijahaabhu rinú riijwiri enkoro ya Waryubha unú aringi omuhoru koko na koko. 8 Mwisyengerero muyo, hakeejura-mo engesi okurekana na obhukuru bhwa Waryubha na obhuturo bhwaye. Na atariho unú yaatura okusoha mwisyengerero erikuru rya Waryubha, okuhikira egingʼanga muhungati gya bhamaraika bharya gikunaane.