Maraika wa kataanu aratema enkombi yaaye
9
Kimwi, maraika wa kataanu wonse, akatema enkombi yaaye. Rumwigo, nkarora enjota inú yaaringa egwiri eguru wa ekyaro okurwa murwire. Ekahaanwa orufunguro rwa okusiikurira erituko rya ekibhohe kya amasambwa.a 2 Ekasiikura erituko riyo. Niigo yaamara okurisiikura ego, engesi enjaru bhukongʼu, kya eya eritanuuru erinene, ekeegunda okurwa mwituko muyo. Eryubha na amasaaru bhitaamaahikana okurekana na obhwaru bhwa engesi iyo. 3 Mbe, egingige gikarwa mungesi muyo, na okunyaragana mukyaro. Gikahaanwa obhuturo bhwa okuruma kya ebhitoromooni. 4 Egingige giyo, gikakeeribhwa ega, gitasarya obhunyanki, ebhiimerya bhyobhyonse kora emiti gyogyonse. Nawe, ginyahaare abhantu bhanú bhataana orubhaaso rwa Waryubha kukisyusu.b 5 Kweki, gikeekiriribhwa ega, gibhanyankye kwa eribhaga rya emyeri etaanu nawe gitabheeta. Obhururu bhunú bheegwanga, bhwaringa kya hanú omuntu arumirwe na ekitoromooni. 6 Kuginsiku giyo, abhantu bhariigombanga okukwa, nawe bhatarikwa. Bhariigombanga okukwa, nawe oruku ruribhangʼosa.7 Ensusumi ya egingige giyo, yaaringa kya egifaraasi ginú giseemiibhwe okugya mwiihe. Emitwe gyagyo, gyaringa na ebhintu kya amataaji ga egijahaabhu, na obhusu bhwagyo bhwaringa bhuratuubhana na bhwa abhantu. 8 Egingige giyo, gyaringa na egintuukya egintambi, kya egya abhakari. Na ameeno gaagyo gaaringa kya aga endwi. 9 Gyaringa na egingubha kya egya ekyuma kubhikubha, na omuhiriro gwa amabhabha gaagyo, gwaringa kya omuhiriro gwa emikokoteeni gya okurutwa na egifaraasi emyaru, ginú girakenya okugya mwiihe. 10 Emikira gyagyo, gyaringa na amahwa ga okurumira kya egya ekitoromooni, eginguru gyagyo gya okunyahaara abhantu kwa eribhaga rya emyeri etaanu, gyaringa kumikira. 11 Egingige giyo, gyaringa na omukama waagyo. Omukama uyo, yaaringa m-maraika omukuru wa erituko rya ekibhohe rirya. Eriina ryaye mu Kiebhurania yaabhirikirwanga ega, Abhadoni, na mu Kiyunani arabhirikirwa ega, Aporioni, ensonga yaaye niiga, “Omusikya.”
12 Mbe bhoono, engʼanga ya mbere emariri okuhita, nawe mumanye ega, egingʼanga ebhiri gikyaaja.
Maraika wa kasansabha aratema enkombi yaaye
13 Kimwi, maraika wa kasansabha wonse, akatema enkombi yaaye. Rumwigo, nkeegwa eriisi riragamba okurwa kumbaara ena gya ahasi ha okumwensera aha egijahaabhu, hanú haaringa embere ya Waryubha. 14 Eriisi riyo, rikakeerya maraika wa kasansabha unú yaaringa na enkombi, ega, “Sibhura bhamaraika bhane bhanú bhabhoherwe muruuji orunene orwa Efurate.” 15 Mbe, bhamaraika bhane bhayo bhakasibhurwa, naho bheete eimwi ya esatu eya abhantu bhonsego mukyaro. Bheeki bhaaringa bhaseemiibhwe kurusumo rwa eribhaga riyo, orusiku ruyo, omweri guyo, na omwaka guyo. 16 Kweki nkeegwa ega, erisaabhu rya emiganda gyabho egya abhasirikare bha egifaraasi, bharahika egimirioni magana gabhiri (200,000,000). 17 Mubhurori bhwani, naarora egifaraasi giyo, na bhanú bhaaringa bhariiniri-ko eguru. Bheeki bhaaringa bheebhoheri egingubha kubhikubha bhyabho. Egingubha giyo, gyaringa eginkangaaru kya omururo, egya obhururu, na egya mayaayi. Emitwe gya egifaraasi, gyaringa kya emitwe gya egindwi. Eminwa gyagyo, gyaruusyanga egindimi gya omururo, engesi na omururo omuhaari. 18 Bhakeeta eimwi ya esatu eya abhantu, kwa egingʼanga esatu giyo. Egingʼanga esatu giyo, n-gindimi gya omururo, engesi na omururo omuhaari, bhyonsego bhiyo bhyarwanga muminwa gyagyo. 19 Obhuturo bhwa egifaraasi giyo, bhwaringa muminwa na kumikira gyagyo, kwa okubha emikira gyagyo gyaringa kya eginjoka ginú giina emitwe gya okunyahaarira abhantu.
20 Abhantu bhanú bhataakwa okurekana na egingʼanga giyo, bhataamwihunjurira Waryubha okurwa kumakorwa gaabho amabhiibhi. Bhaagendererya okusyengera ebhihwi na ebhisusano, bhinú bheekoreranga abheene kwa egijahaabhu, ebhigera bhya egimbirya, eshabha, amagina na emiti. Ebhisusano bhiyo, bhitakurora, bhitakwigwa, kora bhitakugenda. 21 Abhantu bhayo bhataamwihunjurira Waryubha, na okutiga amakorwa gaabho ga obhwiti, obhuturutumbi, obhusimbe na obhwibhi.