Maraika na ekitabho ekike
10
Kimwi, nkarora maraika oundi wa obhuturo, areetuuma okurwa murwire. Maraika uyo, yaaringa akundikiriibhwe na amasaaru, na omutwe gwaye, gwaringa gwinaarirwe na eritaabhasi. Obhusu bhwaye bhwaringa bhurangʼesangʼesa kya eryubha, amaguru gaaye gaaringa kya egintimu ginú girooka omururo. 2 Mukubhoko kwaye, yaaringa na ekitabho ekike kinú kikundukwirwe. Maraika uyo, akeemirira okuguru kwa obhuryo kutajiri munyanja, okwa obhumosi kutajiri kukyaro ekyomu. 3 Akakunga kwa eriisi erinene, kya ekirumo kya endwi. Hanú yaakunganga, orukubha rukabharuka mara muhungati. 4 Hanú orukubha rwabharukanga, nkeenda okungʼoora ganú egimbaruko giyo gyagambanga, nawe nkeegwa eriisi okurwa murwire riragamba ega, “Otangʼoora amangʼana ganú gagambirwe na egimbaruko giyo! N-kibhisire!”5 Kimwi maraika unú yaaringa yeemiriiri okuguru okumwi kutajiri munyanja, okundi kukyaro ekyomu, akeenura okubhoko kwaye kwa obhuryo eguru, okubhata murwire. 6 Akateena kwa eriina rya Waryubha unú aringi omuhoru koko na koko, unú yaabhumba orwire na ebhintu bhinú bhirimo, ekyaro na ebhintu bhinú bhirimo, na enyanja na ebhintu bhinú bhirimo. Maraika uyo, akagamba ega, “Eribhaga erindi rya okuganyirira ritariho. 7 Hanú maraika wa muhungati yaakateme enkombi yaaye, nho Waryubha yaakakunaanʼye ekinyerera kyaye, kya ego yaaraarikira abhagaya bhaaye, abharooti.”
8 Nho, eriisi rirya naaringa nigwiri okurwa murwire, rikankeerya kweki ega, “Genda kumaraika unú yeemiriiri okuguru kwa obhuryo kutajiri munyanja, na okundi kukyaro ekyomu, ogege mukubhoko kwaye ekitabho ekike kinú kikundukwirwe.”
9 Mbe, nkagya nkamukeerya yangʼaane ekitabho kiyo, wonse akagamba ega, “Gega n-kinu hanu! Okirye. Kiraabhe ekijomeereru kya obhuuki, mumunwa gwaho, nawe kiraabhe ekiruru munda yaaho.” 10 Mbe, nkakigega okurwa mukubhoko kwa maraika uyo, nkakirya. Kikabha ekijomeereru kya obhuuki, mumunwa gwani, nawe hanú naakimira, nkeegwa obhururu munda yaani.
11 Nkakeeribhwa ega, “Oreenderwa okuruusya obhurooti kweki, kugihamati eginjaru, mubhyaro ebhyaru, kubhigambo ebhyaru na kubhakama abhaaru.”