Omwana wa Eringʼondi arasibhura orubhaaso rwa muhungati
8
Mbe, kweki nkarora Omwana wa Eringʼondi, arasibhura orubhaaso rwa obhurimbo orwa muhungati. Rumwigo, murwire eyo hakakira kiri, kwa eribhaga rya muna etuugati rya ensa eimwi. 2 Nkamara nkarora bhamaraika muhungati, bhanú bhareemirira embere ya Waryubha, kira oumwi akahaanwa enkombi.3 Maraika oundi akaaja, yaana akabhakuri ka egijahaabhu aka okutuutira-mo ekurusu, akeemirira embere ya ahasi ha okumwensera. Akahaanwa ekurusu enjaru airuusye hamwi na amasabho ga abhantu bhonsego bha Waryubha, eguru ya ahasi ha okumwensera aha ejahaabhu, embere ya ekitumbi kya ekikama. 4 Engesi ya ekurusu hamwi na amasabho ga abhantu bha Waryubha, bhikariina eguru embere ya Waryubha, okurwa mukubhoko kwa maraika uyo.
5 Nho, maraika uyo, akagega akabhakuri akeejurya-mo omururo okurwa ahasi ha okumwensera, akagwesa mukyaro. Eriisi rya orukubha rikabharuka mukyaro, hakabha na egimesyo, na ekirigiti kya erirobha kikeebhuka mukyaro.
Bhamaraika bhane bharatema eginkombi gyabho
6 Kimwi bhamaraika bharya muhungati bhanú bhaaringa na eginkombi, bhakeeseemya okutema eginkombi gyabho.
7 Maraika wa mbere akatema enkombi yaaye. Rumwigo, embura ya omusoke, na omururo gunú gwisangeenʼye na amanyinga, bhikeeswa mukyaro. Omururo guyo, gukasikya eimwi ya esatu eya ekyaro, gukasikya eimwi ya esatu eya emiti na obhunyanki obhubhisi bhonsego.
8 Maraika wa kabhiri wonse, akatema enkombi yaaye. Rumwigo, ekintu kya enkuku enene bhukongʼu inú yookanga omururo, kikeeswa munyanja. Niigo kyeeswa munyanja ego, eimwi ya esatu eya enyanja, ekabha amanyinga. 9 Ebhibhumbwa ebhihoru eimwi ya esatu bhikakwa munyanja, na eimwi ya esatu eya amaato gakanyamuka.
10 Maraika wa kasatu wonse, akatema enkombi yaaye. Rumwigo, enjota enene bhukongʼu, inú yookanga kya ekorobhoi, ekagwa okurwa murwire. Yaagwira eimwi ya esatu eya eginyuji na ebhisekaani bhya amanji. 11 Enjota iyo, yaabhirikirwanga ega, Obhusungu. Ekakora eimwi ya esatu eya amanji, ekabha obhusungu. Mbe, abhantu abhaaru bhakakwa okurekana na amanji gayo, kwa okubha gaaringa ga obhusungu.
12 Maraika wa kane wonse akatema enkombi yaaye. Rumwigo, eimwi ya esatu eya eryubha, eimwi ya esatu eya omweri, na eimwi ya esatu eya eginjota bhikatemwa, bhikabha ekisunte. Kwa ego, eimwi ya esatu eya omubhasu ekabhura obhurabhu, na eimwi ya esatu eya obhutiku yonse, ekabhura obhurabhu.
13 Kimwi nkarora na okwigwa ekikoona ekinene kireebhururuka gatigati ya orwire, enu kirakuura kwa eriisi erinene ega, “Murikirora-ko! Murikirora-ko! Murikirora-ko, bheenyu bhanú mumenyeri mukyaro, hanú eginkombi esatu ginú gitamiri giritemwa! Bhamaraika bhasatu bhanú bhatamiri, bheeseemerye okugitema!”