Abhantu bha Waryubha bharatemwa orubhaaso
7
Hanú gayo gaahwa, nkarora bhamaraika bhane bheemiriiri kumbaara ena gya ekyaro, bhararibhira omuyaga okurwa mbaara ena gya ekyaro, naho gutahuuta okusoha mukyaro ekyomu, munyanja, na kora kumuti gogonse. 2 Bhamaraika bhayo, bhaaringa bhaheerwe obhuturo bhwa okusarya ekyaro ekyomu na enyanja. Kweki nkarora maraika oundi arariina okurwa bhuturira-ryubha, agegeri orubhaaso rwa Waryubha omuhoru. Akatemera bhamaraika abhane bhayo ekituri, 3 aragamba ega, “Mutasarya mbere ekyaro ekyomu, enyanja, kora emiti, okuhikira hanú turaamare okubhatema orubhaaso kukisyusu, abhagaya bhonsego bha Waryubha weetu.”4 Nkamara nkeegwa ega, erisaabhu rya bhanú bhaaringa bhatemerwe orubhaaso rwa Waryubha, ehikiri eraaki eimwi, ebhiku mirongo ena na ebhina (144,000), okurwa mumakabhira gonsego ekumi na gabhiri aga Abhaisiraeri.a 5 Abhantu ebhiku ekumi na bhabhiri (12,000), ekumi na bhabhiri bhatemerwe orubhaaso, okurwa kukira erikabhira. Abhantu ebhiku ekumi na bhabhiri, ekumi na bhabhiri, okurwa mumakabhira ga Yuda, Rubheni na Gadi. 6 Abhantu ebhiku ekumi na bhabhiri, ekumi na bhabhiri, okurwa mumakabhira ga Asheri, Nafutari na Manase. 7 Abhantu ebhiku ekumi na bhabhiri, ekumi na bhabhiri, okurwa mumakabhira ga Simeoni, Raawi na Isakari. 8 Abhantu ebhiku ekumi na bhabhiri, ekumi na bhabhiri, okurwa mumakabhira ga Jabhuroni, Yusufu na Bhenjamini.
Omuganda omunene gwa abhantu bha amakabhira agandi
9 Hanú gayo gaahwa, nkarora omuganda omunene bhukongʼu gwa abhantu bhanú omuntu wowonse ataanagyanga okubhabhara, bheemiriiri embere ya ekitumbi kya ekikama na embere ya Omwana wa Eringʼondi. Abhantu bhayo, bhaaringa bharwiri mubhyaro bhyonsego, mumakabhira gonsego, mugihamati gyonsego, na mubhigambo bhyonsego. Bhaaringa bheebhoheri eginkanju egindabhu enu bhagwatiriri amasagi ga emitende mumabhoko gaabho. 10 Bhakabha bharagamba kwa eriisi erinene ega,
“Obhutuurya bhurarwa ku Waryubha weetu,
unú yeekeeri kukitumbi kya ekikama,
na bhurarwa ku Mwana wa Eringʼondi.”
11 Bhamaraika bhonsego bhaaringa bheenaariri ekitumbi kya ekikama kirya, abhakaruka bharya, na ebhibhumbwa ebhina bhirya. Bhakagwa mumaguru embere ya ekitumbi kiyo, bhakamusyengera Waryubha, 12 enu bharagamba ega,
“Amina!
Waryubha weetu yaana obhukuru,
yaana egintungwa,
kweki yaana obhuturo na eginguru gyonsego,
tumugungye, tumukumye na tumusuuke,
koko na koko.
Amina!”
13 Hanú bhaamara, oumwi wa abhakaruka bharya, akambuurya ega, “Omanyiri abhantu bhanú bheebhoheri eginkanju egindabhu m-bawi? Na bharwiri-ha?”
14 Nkamukyukya ega, “Ee omukuru waani, uuwe nuuwe omanyiri.”
Wonse akankeerya ega, “Bhayo, mbo bhaahiga enyanko enduru irya. Bhafuriri eginkanju gyabho kwa amanyinga ga Omwana wa Eringʼondi, gibheeri egindabhu pee. 15 Kwa ego, bharingi embere ya ekitumbi kya Waryubha ekya ekikama. Bharamukorera emirimu omubhasu na obhutiku munyumba enkuru ya mwisyengerero ryaye. Na Waryubha unú yeekeeri kukitumbi kiyo, aribha hamwi nabho na okubhaangararira. 16 Bheeki bhataribha kweki na enjara kora enyonta, omubhasu na eribhiriira bhitaribhasamba kweki. 17 Eribha ego, kwa okubha Omwana wa Eringʼondi unú aringi haangʼi na ekitumbi kya ekikama, aribha omuriisya waabho. Aribhoorokererya mubhisekaani bhya amanji ganú garahaana abhantu obhuhoru bhwa koko. Na Waryubha aribheehya ameesori gonsego mumeeso gaabho.”