Omwana wa Eringʼondi arasibhura egimbaaso gya obhurimbo kukitabho
6
Kimwi nkarora Omwana wa Eringʼondi, arasibhura orubhaaso rwa mbere gati ya egimbaaso gya obhurimbo muhungati girya. Rumwigo, nkeegwa ekibhumbwa ekimwi gati ya ebhina bhirya, kiragamba kwa eriisi kya erya omuhiriro ega, “Njo!” 2 Niigo kyamara okugamba ego, nkarora efaraasi endabhu pee, na omuntu ariiniri-ko. Omuntu uyo, yaaringa na obhuta, akahaanwa omutuho gwa obhuhigi. Akarwa murwire aringi omuhigi, naho agendererye okuhiga kweki. 3 Kweki Omwana wa Eringʼondi, akasibhura orubhaaso rwa obhurimbo orwa kabhiri. Rumwigo, nkeegwa ekibhumbwa kya kabhiri kiragamba ega, “Njo!” 4 Niigo kyamara okugamba ego, ekeebhuka efaraasi eindi enkangaaru ka, kya omururo. Omuntu unú yaaringa ariiniri-ko, akahaanwa omuhyu omunene na obhuturo bhwa okuruusya omurembe mukyaro, naho abhantu bheetane.
5 Kweki Omwana wa Eringʼondi, akasibhura orubhaaso rwa obhurimbo orwa kasatu. Rumwigo, nkeegwa ekibhumbwa kya kasatu kiragamba ega, “Njo!” Niigo kyamara okugamba ego, nkarora efaraasi eindi emwamu ti. Omuntu unú yaaringa ariiniri-ko, yaaringa na ebhirengero mukubhoko kwaye. 6 Nkeegwa eriisi kya erya omuntu okurwa gatigati ya harya ebhibhumbwa ebhina bhirya bhyaringa, riragamba ega, “Amariho ga orusiku rumwi, garagura endengo eimwi ego ya obhusye bhwa egingano na egindengo esatu ego gya obhusye bhwa egishayiri.a Nawe, otasarya amaguta kora edivai.”
7 Mbe, Omwana wa Eringʼondi, akasibhura orubhaaso rwa obhurimbo orwa kane. Rumwigo, nkeegwa ekibhumbwa kya kane kiragamba ega, “Njo!” 8 Niigo kyamara okugamba ego, nkarora efaraasi eindi ya eribhuukwe. Omuntu unú yaaringa ariiniri-ko yaabhirikirwanga ega, Oruku, na Ekyaro kya abhaku kyaringa kiramuseeterera enyuma waaye kwa haangʼi. Bheeki, bhakahaanwa obhuturo bhwa okwita abhantu eimwi ya ena mukyaro kyonsego, kwa eriihe, enjara, amarweri na kwa egintyenyi eginhaari gya mukyaro.
9 Mbe, Omwana wa Eringʼondi, akasibhura orubhaaso rwa obhurimbo orwa kataanu. Rumwigo, nkarora hansi wa ahasi ha okumwensera, abhantu bhanú bheetwa kurusumo rwa okuraarika eringʼana rya Waryubha, na okuriimiririra. 10 Nho abhantu bhayo, bhakatema ekituri bharagamba ega, “Ee Waryubha, Omukuru unú oringi omurabhu na owa obhuheene, ndeegwa oratigita! N-duuha oribhutura ekiina kubhantu bha mukyaro, naho okuriha ekisiiyomba kwa okwitira amanyinga geetu?” 11 Mbe, kira oumwi wa bhanú bhaaringa bheetirwe, akahaanwa enkanju endabhu. Bhakakeeribhwa ega, bhaganye eribhaga ekego, okuhikira abhakori bha emirimu abharikyabho na abhahiiri bhaabho kuimani abhaaru bhareetwe, kya ego bheeki bheetwa. Nho erisaabhu ryabho riraakunaane.
12 Kweki nkarora Omwana wa Eringʼondi, arasibhura orubhaaso rwa obhurimbo orwa kasansabha. Rumwigo, ekirigiti ekinene bhukongʼu kya erirobha kikeebhuka. Eryubha rikeehunjura, rikabha emwamu ti kya amakara, na omweri gukabha omukangaaru ka, kya amanyinga. 13 Eginjota gikagwa mukyaro bhuyagayaga, kya ego emisumo emirere giraharuruka, hanú omuti gurasingisibhwa na omuyaga omuhaari. 14 Orwire rukaruusibhwa-ho kya ego eritarataasi rirakunywakunywa. Eginkuku na amaginga, bhyonsego bhikangʼaanyibhwa okurwa ahasi haabho ha obhusimuka.
15 Nho, abhakama bha ekyaro, abhatungi, abhakuru bha abhasirikare, abhaniibhi, abhantu bha eginguru, hamwi na abhantu bhonsego abhandi, abhagaya na bhanú bhareeyagaara, bhakeebhisa mumasana na mumagina ga muginkuku. 16 Kimwi bhakakeerya eginkuku na amagina ega, “Mutugwire! Mutubhise turwe mumeeso ga unú yeekeeri kukitumbi kya ekikama, na tutaaja okurora okujima kwa Omwana wa Eringʼondi. 17 Orusiku orukuru rurya rwa okujima bhukongʼu kwa Waryubha na Omwana wa Eringʼondi ruhikiri! Niwi aratura okurwigumirirya?”