Ekitabho na Omwana wa Eringʼondi
5
Kimwi nkarora ekitabho mukubhoko kwa obhuryo, kwa unú yaaringa yeekeeri kukitumbi kya ekikama. Ekitabho kiyo, kyaringa kingʼoorerwe munsi na kibhara, kweki kyaringa kibhoherwe na egimbaaso muhungati gya obhurimbo. 2 Kweki nkarora maraika wa obhuturo araraarika kwa eriisi erinene ega, “Niwi areenderwa okubhutura egimbaaso gya obhurimbo giyo, na okukisibhura ekitabho kiyo?” 3 Nawe, ataaringa-ho omuntu murwire, mukyaro, kora mukyaro kya abhaku unú yaaringa na obhuturo bhwa okukisibhura na okumaaha munsi waakyo.4 Mbe, oni nkakuura bhukongʼu, kwa okubha ataatuuka-ho omuntu wowonse unú yeenderwa okusibhura ekitabho kiyo, kora okumaaha munsi waakyo. 5 Nho, oumwi wa abhakaruka bharya, akankeerya ega, “Tiga okukuura! Maaha! Endwi ya erikabhira rya Yuda,a orwibhuro rwa omukama Daudi, ahigiri. Weeki ngʼo areenderwa okubhutura egimbaaso muhungati gya obhurimbo kukitabho kiyo, na okukisibhura.”
6 Kimwi nkarora Omwana wa Eringʼondib yeemiriiri haangʼi na ekitumbi kya ekikama kirya. Yaaringa yeenaarirwe na ebhibhumbwa ebhina bhirya, na abhakaruka mirongo ebhiri na bhane bharya. Hanú bhaamumaahanga, yaamaahikananga ega, muna agoogerwe. Na yaaringa na amatira muhungati na ameeso muhungati. Ameeso gaaye, m-mitima muhungati gya Waryubha, ginú gyaringa gitumirwe kira ahasi mukyaro kyonsego. 7 Omwana wa Eringʼondi uyo, akagya akagega ekitabho kirya, okurwa mukubhoko kwa obhuryo, kwa urya, yaaringa yeekeeri kukitumbi kya ekikama. 8 Hanú yaamara okugega ekitabho kiyo, ebhibhumbwa ebhina bhirya, na abhakaruka bharya, bhakamugwira mumaguru. Kira oumwi yaaringa na eritungu na amabhakuri ga egijahaabhu geejwiri ekurusu. Ekurusu iyo, ngʼyo amasabho ga abhantu bha Waryubha. 9 Kimwi bhakamwimbira eriimbo erihya, rinú ryagambanga ega,
“Uuwe nuuwe oreenderwa okugega ekitabho kiyo,
na okusibhura-ko egimbaaso gya obhurimbo gyakyo,
kwa okubha uuwe waagoogwa,
na kwa amanyinga gaaho okamugurira Waryubha abhantu,
bha amakabhira gonsego, abha ebhigambo bhyonsego,
abha egihamati gyonsego, na abha ebhyaro bhyonsego.
10 Uuwe waakora abhantu bhayo, bhabhe obhukama bhwa Waryubha weetu,
na bhabhe abhasyengeri bha okumukorera emirimu,
bhonse bharitunga ekyaro.”
11 Kimwi, nkarora na okwigwa eriisi rya bhamaraika abhaaru bhukongʼu, ebhiku na ebhiku, kora bhataaturikanga okubharwa. Bhamaraika bhayo, bhaaringa bheenaariri ekitumbi kya ekikama kirya, na ebhibhumbwa ebhina bhirya, na abhakaruka bharya, 12 enu bhareemba kwa eriisi erinene ega,
“Omwana wa Eringʼondi unú yaagoogwa,
areenderwa okunyoora obhuturo, obhuniibhi na egintungwa.
Eginguru, obhusuuku, obhukuru na eginkuma, n-gyaye!”
13 Kimwi nkeegwa ebhibhumbwa bhyonsego murwire, mukyaro, mukyaro kya abhaku, na munyanja, bhireemba kwa hamwi ega,
“Weeki unú yeekeeri kukitumbi kya ekikama,
na Omwana wa Eringʼondi,
bhagungibhwe, bhasuukwe,
bhahaanwe obhukuru na eginguru, koko na koko!”
14 Na ebhibhumbwa ebhina bhirya bhyeki, bhikabhanga bhireekirirya ega, “Amina!” Na abhakaruka bharya, bhakamugwira mumaguru, bhakamusyengera Waryubha na Omwana wa Eringʼondi.