Enyarubha kwikanisa rya Efeso
2
Omuntu uyo, akagendererya okunkeerya ega, “Omungʼoorere maraika wa erikanisa rinú riringi mumugi gwa Efeso, omukeerye ega,“Oni niina eginjota muhungati giyo kukubhoko kwani kwa obhuryo, na kweki ndagenda gatigati ya ebhisunga muhungati bhya egijahaabhu bhiyo. Mwitegeerere ganú ndabhakeerya.
2 “Mmanyiri ebhikorwa bhyenyu, ekituunyo kyenyu na obhwigumirirya bhwenyu. Kweki mmanyiri ega, mutakugwatana na abhantu abhabhiibhi. Mwabheekomya bhanú bhareebhirikira ega, abhatumwaa enu bhataringi abhatumwa, na mukangʼamura ega, bhaaringa abhabheehi. 3 Bheenyu muringi abheegumirirya, mwanyankibhwa kurusumo rwa eriina ryani, nawe okuhikira bhoono mutararosa.
4 “Nawe, niina eringʼana erimwi rinú rirannyankya, mwatigiri obhuhanje bhwenyu obhwa mbere. 5 Muhiituke ganú mwakoranga eribhaga rinú mwaamba okunyikirirya na ganú murakora bhoonwego. Kimwi munyihunjurire, mukore kya ego mwakoranga eribhaga rirya. Nawe muraange okukora ego, ndaaja okuruusya ekisunga kyenyu ahasi haaye. 6 Nawe, ririho eringʼana erindi, rinú murakora bhujomu. Murajimira ebhikorwa ebhibhiibhi bhinú Abhanikoraib bharakora. Oni nonse ndabhijimira bhukongʼu.
7 “Unú yaana amatwi yeegwe, amangʼana ganú Omutima Omurabhu arakeerya amakanisa. Omuntu unú arihiga, ndimwikiririrya okurya emisumo gya omuti gunú gurahaana abhantu obhuhoru bhwa koko, gunú guringi mumugunda gwa Waryubha murwire.”c
Enyarubha kwikanisa rya Simurina
8 Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Simurina, omukeerye ega,
“Oni ngʼ-wa mbere na owa obhuteero. Naakwa, nkahyuka! Mwitegeerere ganú ndabhakeerya.
9 “Mmanyiri enyanko yeenyu na obhutobhu bhwenyu. Nawe maheene, muringi abhaniibhi, kwa okubha muringi abhantu bha Waryubha! Mmanyiri amatuki ganú muratukwa na bhanú bhareebhirikira ega, m-bantu bha Waryubha, nawe, bhataringi abhantu bha Waryubha. Bhayo m-bantu bha Erisambwa.d 10 Mutoobhoha enyanko inú eribhanyoora. Maaha! Erisambwa riribhasakya kwa okubhatuura abhandi gati yeenyu mwigereja. Na bheenyu murinyoora enyanko eginsiku ekumi. Nawe, mubhe abhaheene kuoni kora okuhikira okukwa, na oni ndibhahaana omutuho gwa obhuhoru bhwa koko.
11 “Unú yaana amatwi yeegwe, amangʼana ganú Omutima Omurabhu arakeerya amakanisa. Omuntu unú arihiga, atarinyoorwa na oruku rwa kabhiri. Oruku ruyo, m-mururo gwa koko.”e
Enyarubha kwikanisa rya Perigamo
12 Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Perigamo, omukeerye ega,
“Oni niina omuhyu omoogi. Mwitegeerere ganú ndabhakeerya.
13 “Mmanyiri hanú mureekara, m-mubhutungi bhwa Erisambwa. Nawe muragendererya okwikirirya eriina ryani. Kora kwibhaga rirya omwimiririri waani omuheene Antipa yeetwa, mumugi gwenyu gunú Erisambwa rireekara, mutaanyanga.
14 “Nawe, niina amangʼana amake ganú garannyankya. Gati yeenyu bhariho abhandi, bhanú bharagwata ameehigiryo ga Bharamu. Bharamu uyo, ngʼo yeehigirya Bharaki angʼeenererye Abhaisiraeri naho bhakore obhusarya kwa okurya ebhyakurya bhinú bhimwenseerwe ebhisusano, na okukora obhusimbe.f 15 Egoego, gati yeenyu bhariho abhantu abhandi bhanú bharagwata ameehigiryo ga Abhanikorai.g 16 Mbe bhoono, mwihunjure obhusarya bhwenyu! Muraange okwihunjura, ndaaja bhwangu, naho ndwane na abhantu bhayo, kwa omuhyu gunú gurarwa mumunwa gwani.
17 “Unú yaana amatwi yeegwe, amangʼana ganú Omutima Omurabhu arakeerya amakanisa. Omuntu unú arihiga, ndimuhaana-ko ebhyakurya bhinú bhirabhirikirwanga ega, manah inú ebhisirwe. Kweki ndimuhaana erigina erirabhu. Erigina riyo, ringʼoorerwe-ko eriina erihya, rinú atariho omuntu wowonse unú ararimanya, nawe ngʼ-unú arahaanwa erigina riyo omwenego ngʼo ararimanya.”
Enyarubha kwikanisa rya Tiatira
18 Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Tiatira, omukeerye ega,
“Oni nooni Omwana wa Waryubha.i Niina ameeso kya egindimi gya omururo, na amaguru ganú garangʼesangʼesa kya eshabha. Mwitegeerere ganú ndabhakeerya.
19 “Mmanyiri ebhikorwa bhyenyu, obhuhanje bhwenyu, eimani yeenyu, emirimu gyenyu, na obhwigumirirya bhwenyu. Kweki ebhikorwa bhyenyu bhya eginsiku ginu m-bijomu okukira ebhya mbere harya. 20 Nawe, niina eringʼana erimwi rinú rirannyankya, muramwikiririrya omukari urya Yejebheri unú areebhirikira ega, omurooti, nawe, ataringi omurooti. Muramwikiririrya abhahabhye abhagaya bhaani, kwa okubheehigirya bhakore obhusimbe, na okurya ebhyakurya bhinú bhimwenseerwe ebhisusano. 21 Oni naamuhaana omweya naho yeehunjure obhusarya bhwaye, nawe, atakwenda okutigana na obhusimbe bhwaye. 22 Maaha! Kwa ekisigo kiyo, ndimuhaana enyanko ya obhurweri bhunú bhurikora atamwe okwimuka kubhuriri. Na bhanú bharakora nawe obhusimbe, ndibhahaana enyanko enene nyoore bhataatige ebhikorwa bhyabho bhiyo. 23 Kweki, ndibheeta abheehigira bhaaye. Nho abhantu bha amakanisa gonsego bharimanya ega, oni nooni ndeekomya ameetegeerero na omutima gwa kira omuntu. Na ndimuriha kira oumwi weenyu okuringʼaana na ebhikorwa bhyaye.
24 “Bhoono bheenyu bha Tiatira eyo, gati yeenyu bhariho abhandi bhanú bhatakugwata ameehigiryo ga Yejebheri. Abhantu bhayo bhateehigira kinú abhandi bharabhirikira ega, ekibhisire kya Erisambwa. Abhantu bhayo ndabhakeerya ega, ntakubhahaana bheenyu omujigo ogundi, 25 nawe, mugumye bhujomu amajomu ganú muunago okuhikira hanú ndiija.
26 “Omuntu unú arihiga, na okugendererya okukora kya ego ndeenda okuhikira kubhuteero,
‘Ndimuhaana obhutungi eguru ya abhantu bha ebhyaro bhyonsego.
27 Aribhatunga kwa engʼimbo ya ekyuma,
aribhabhondora kya ego ebhintu bhya obhutoto bhirabhondorwa.’j
“Ndimuhaana obhutungi kya ego oni nonse naahaanwa obhutungi na Taata. 28 Kweki ndimuhaana enjota nyamananga.k
29 “Unú yaana amatwi yeegwe, amangʼana ganú Omutima Omurabhu arakeerya amakanisa.”