Obhukundukuri bhwa Yoana
Yoana arahairira eguru ya ekitabho
1
Ganu ngo amangʼana ganú gaatubhurwa na Yeesu Kiristu. Kiristu yaatubhurirwa na Waryubha naho yoorokye abhagaya bhaaye, amangʼana ganú gareenderwa geebhuke bhwangu hanu. Yeesu wonse akatuma maraikaa waaye yaantubhurire amangʼana gayo, oni Yoana omugaya waaye. 2 Oni nkeemiririra amangʼana gonsego ganú naarora. Amangʼana gayo, m-buheene bhunú bhwatubhurwa na Yeesu Kiristu. Obhuheene bhuyo, mbo eringʼana rya Waryubha.3 Nyakara abhantu bhonsego bhanú bharasomera abharikyabho amangʼana ga obhurooti bhuyo. Kweki nyakara abhantu bhonsego bhanú bhareetegeerera na okugwata ganú gaangʼoorwa mukitabho munu, kwa okubha eribhaga rya okwibhuka kwa amangʼana gayo riringi haangʼi.
Okukeeranʼya
4 Enyarubha inu, erwiri kuoni Yoana. Ndabhangʼoorera bheenyu abheehigira bha Yeesu bha mumakanisa muhungati ganú garingi mukyaro kya Asia.b
Ndabheendera eriruguto na omurembe okurwa ku Waryubha unú ariho, unú yaaringa-ho okurwa obhusimuka na unú aribha-ho, na okurwa kumitima muhungatic ginú giringi embere ya ekitumbi kya ekikama, 5 na okurwa ku Yeesu Kiristu, omwimiririri omuheene. Weeki yaabha owa mbere okuhyukibhwa, naho abhe omukama wa abhakama bhonsego mukyaro.
Yeesu atuhanjiri na yaatusibhura okurwa mubhusarya bhwetu, kwa enjira ya okwitira amanyinga gaaye. 6 Yaatukora okubha obhukama bhwa abhasyengeri, naho tumukorere emirimu Waryubha, Esewaabho. Yeesu agungibhwe! Weeki yaana eginguru koko na koko! Amina.
7 Maaha! Yeesu ariijira gatigati ya amasaaru!d
Abhantu bhonsego bharimurora,
kora bhanú bhaamubhita na eritimu.e
Amakabhira gonsego mukyaro, garifumba oruku, kurusumo rwaye.
Maheene, niigo eribha. Amina.
8 Omukuru Waryubha aragamba ega, “Oni nooni Arifa na Omega, Obhusimuka na Obhuteero. Oni ndiho, naaringa-ho na ndibha-ho. Oni ngʼ-Waryubha wa obhuturo bhonsego.”
Yoana aramurora Kiristu mubhurori
9 Oni Yoana omuhiiri weenyu kuimani, ndagwatana na bheenyu kukunyanka na okwigumirirya kurusumo rwa Yeesu na obhukama bhwaye. Naajibhibhwa kwa okutuurwa kwiginga rinú rirabhirikirwa ega, Patimo, kwa okubha naaringa ndaraarika eringʼana rya Waryubha na okuruusya obhwimiririri eguru ya Yeesu. 10 Mbe, orusiku rumwi rwa Omukuru Yeesu, Omutima Omurabhuf akanyituumira. Rumwigo, nkeegwa enyuma waani, eriisi erinene kya rya enkombi. 11 Eriisi riyo rikankeerya ega, “Ngʼoora mukitabho amangʼana gonsego ganú orarora. Omare okihire mumakanisa muhungati ganú garingi mumigi gya, Efeso, Simurina, Perigamo, Tiatira, Saridi, Firaderifia, na Raodikia.”
12 Mbe, nkeekyukya naho ndore unú yaahairanga na oni, hanú neekyukya ego, nkarora ebhisunga muhungati bhya egijahaabhu ebhya okwikarya-ko egikorobhoi. 13 Na gatigati ya ebhisunga bhiyo, nkarora omuntu unú atuubheeni na Omwana wa Adamu,g yeebhoheri enkanju entambi okuhikira mubhirenge, na omuchipi omugari gwa egijahaabhu kukikubha. 14 Egintuukya gyaye gyaringa egindabhu pee, kya amakaafu, kweki kya omusoke. Na ameeso gaaye gaangʼesangʼesanga kya egindimi gya omururo. 15 Amaguru gaaye, gaangʼesangʼesanga kya eshabha inú yoogiibhwe mwitanuuru rya omururo. Na eriisi ryaye ryaringa kya eriisi rya amanji amaaru ganú garagera. 16 Kukubhoko kwaye kwa obhuryo, yaaringa na eginjota muhungati. Na omuhyu omoogi gwarwanga mumunwa gwaye. Obhusu bhwaye, bhwangʼesangʼesanga kya endingaasi ya omubhasu omururu.
17 Hanú naamurora, nkoobhoha bhukongʼu nkagwa mumaguru gaaye nkabha kya omuntu unú akwiri. Nawe, akantuurira okubhoko kwaye kwa obhuryo, akagamba ega, “Otoobhoha! Oni nooni owa mbere na owa obhuteero. 18 Oni nooni omuhoru! Naaringa nkwiri, nawe bhoono maaha, ndingi omuhoru koko na koko! Na niina eginfunguro gya oruku na egya mukyaro kya abhaku.h
19 “Bhoono, ngʼoora amangʼana ganú oruuji, ganú gareebhuka bhoonwego, na ganú gariibhuka embere eyo. 20 Waarora eginjota muhungati kukubhoko kwani kwa obhuryo. Kweki, waarora ebhisunga muhungati bhya egijahaabhu bhya okwikarya-ko egikorobhoi. Bhoono tiga nkoorokye ensonga ya ekinyerera kiyo. Ebhisunga muhungati bhiyo m-makanisa muhungati, na eginjota muhungati giyo m-bamaraika bha amakanisa gayo.”