Enyarubha kwikanisa rya Saridi
3
Omuntu kya Omwana wa Adamu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Saridi, omukeerye ega,“Oni ndatunga emitima muhungati gya Waryubha, na eginjota muhungati girya. Mwitegeerere ganú ndabhakeerya.
“Mmanyiri ebhikorwa bhyenyu. Muramaahikana ega, muringi abhahoru, nawe mukwiri. 2 Mutengeeje! Munagye amake amajomu ganú gakyatamiri, onyoora garingi haangʼi okuhwa chwe, kwa okubha ebhikorwa bhyenyu bhikyari okuhikiira kya ego Waryubha waani areenda. 3 Muhiituke ganú mweehigiribhwa na okwigwa. Bhoono mugagwate bhujomu na mumwihunjurire Waryubha okurwa mubhusarya bhwenyu. Nawe nyoore mutaatengeeje, ndiija kya omwibhi na mutarimanya eribhaga rinú ndiija.
4 “Nawe, gati yeenyu bhariho abheekirirya abhakego, Saridi eyo, bhanú bhatarakonʼya emyenda gyabho kwa obhusarya. Mbe, bhayo mbo bharibha hamwi na oni, enu bheebhohiibhwe emyenda emirabhu, kwa okubha mbo bhareenderwa okukorerwa ego. 5 Omuntu unú arihiga, ariibhohibhwa emyenda emirabhu kya bhayo. Ntaririruusya eriina ryaye mukitabho kya obhuhoru bhwa koko,a nawe ndimwikirirya embere ya Taata na bhamaraika bhaaye ega, unu ngʼ-wani.
6 “Unú yaana amatwi yeegwe, amangʼana ganú Omutima Omurabhu arakeerya amakanisa.”
Enyarubha kwikanisa rya Firaderifia
7 Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Firaderifia, omukeerye ega,
“Oni nooni omurabhu na owa obhuheene. Kweki oni niina orufunguro rwa omukama Daudi.b
‘Oni nkaasiika-ho ekiseku, atariho oundi unú aranagya okukisiikura-ho.
Oni nkaasiikura-ho ekiseku, atariho oundi unú aranagya okukisiika-ho.’c
“Mwitegeerere ganú ndabhakeerya. 8 Mmanyiri ebhikorwa bhyenyu. Maaha! Oni mbasiikuriiri ekiseku, kora atariho omuntu unú aranagya okukisiika. Onyoora muuna eginguru nkego, nawe mugwatiri ameehigiryo gaani, kora mutaanyanga. 9 Maaha! Ndibhareetera abhantu bha Erisambwa, bhanú bhareebhirikira ega, m-bantu bha Waryubha, nawe, bhataringi abhantu bha Waryubha, m-babheehi. Bhoono, ndibhakora bhaaje bhateme ebhiru embere yeenyu bhahiinye obhusu bhuhike hansi. Nho bharimanya ega, mbahanjiri bheenyu.
10 “Bhoono, kwa okubha mweegumirirya kya ego naabhatongera, ndibhaangararira kwibhaga rya enyanko inú erireetwa okusakya abhantu bhonsego mukyaro. 11 Ndaaja bhwangu! Mugwatirire bhujomu amajomu ganú muunago, naho omuntu atariija okubharuusya omutuho gwenyu.
12 “Omuntu unú arihiga, ndimukora abhe kya entimu ya mwisyengerero erikuru rya Waryubhad waani, na atarirwa muyo kweki. Oni ndingʼoora eguru yaaye eriina rya Waryubha waani, na eriina rya omugi gwa Waryubha waani. Omugi guyo, n-Yerusaremu enhya,e gunú guriituuma okurwa murwire ku Waryubha waani. Kweki ndingʼoora eguru yaaye eriina ryani erihya.
13 “Unú yaana amatwi yeegwe, amangʼana ganú Omutima Omurabhu arakeerya amakanisa.”
Enyarubha kwikanisa rya Raodikia
14 Omuntu uyo, akagendererya okunkeerya ega, “Omungʼoorere na maraika wa erikanisa rinú riringi mumugi gwa Raodikia, omukeerye ega,
“Oni nooni ndabhirikirwa Amina, kwa okubha oni m-mwimiririri omuheene owa obhuheene eguru ya Waryubha. Oni nooni obhusimuka bhwa ebhibhumbwa bhyonsego bhinú bhyabhumbwa na Waryubha. Mwitegeerere ganú ndabhakeerya.
15 “Mmanyiri ega, ebhikorwa bhyenyu bhitaringi bhya omururo kasi ebhimititu. Nyakara bhibhe ebhimititu kasi bhya omururo! 16 Nawe, kwa okubha ebhikorwa bhyenyu bhitaringi bhya omururo kasi ebhimititu, ndibhahongora murwe mumunwa gwani. 17 Muragamba ega, ‘Bheetu m-baniibhi, twiniibhirye bhukongʼu. Tutaana ekintu kinú turasuuhirwa!’ Nawe, mutamanyiri ega, bheenyu m-banyooheeru, mureenderwa okumaahirwa ekyabhira, muringi abhatobhu, abhahoku, kweki muringi kinaabhi. 18 Kwa ego, ndabhatongera mugure kuoni ejahaabhu inú yoogiibhwe kwa omururo, naho mubhe abhaniibhi. Na mugure emyenda emirabhu mwibhohe, mukundikirye ekinaabhi kyenyu, naho mutarora eginsoni. Kweki mugure eryogo rya okuhaka kumeeso geenyu, naho muture okurora bhwaheene.
19 “Abhantu bhonsego bhanú nhanjiri, ndabhakemera na okubhajibhya. Kwa ego, mubhenga na ekituunyo na mumwihunjurire Waryubha okurwa mubhusarya bhwenyu. 20 Maaha! Ndeemirira mukiseku ndasiikurya. Nyoore omuntu areegwe eriisi ryani na okusiikura ekiseku, ndasoha munyumba yaaye, na turarya hamwi.
21 “Omuntu unú arihiga, ndimwikiririrya okwikara hamwi na oni kukitumbi kyani kya ekikama. Eribha kya ego oni naahiga, nkeekara hamwi na Taata kukitumbi kyaye kya ekikama.
22 “Unú yaana amatwi yeegwe, amangʼana ganú Omutima Omurabhu arakeerya amakanisa.”