Obhusarya kuginsiku gya obhuteero
3
Bhoono, omanye bhujomu ega, eginsiku gya obhuteero, riribha eribhaga rya enyanko enene. 2 Eribhaga riyo, abhantu bhariihanja abheene, bharibha na orunamba rwa egimbirya, bharibha bhareegungya, bharibha na emitwe emikongʼu, bharibha bharagamba amangʼana ga amatuki, bhatarisuuka abheebhuri bhaabho, bhataribhanga bharakumya kumangʼana gogonse, na bhatarimwigwa Waryubha. 3 Kweki, bhatarihanja omuntu wowonse, bhataryenda okugambanibhwa na abhandi, bharibha abhabheehi, bhatariiribhira, bharibha abharuru, na bhatarihanja amajomu. 4 Bharikoranga eniku, bharibha bharakora amangʼana kwa okwanguhiirirya, bharibha bhareeheema, bharihanja amangʼana ga ekyaro okukira okumuhanja Waryubha. 5 Abhantu bhayo, bharibhanga bharamaahikana ega, m-bantu bha edini, nawe, mumitima gyabho, bharaanga eginguru gya Waryubha ginú giratura okubhahunjura. Wiyangararire na abhantu bha enteemo iyo.6 Gati ya bhayo, bharimo bhanú bharasoha mumigi gya abhantu, kwa orunamba orubhiibhi, na okungʼeenererya abhakari abhakangi bhanú bhaaruhirwa na orunamba rwa obhusarya, na okugwatwa na orunamba rwa amanga amaaru. 7 Abhakari bhayo, bhareehigira kira orusiku, nawe bharatamwa okumanya obhuheene. 8 Abhantu bharya bharasoha mumigi, bharaanga obhuheene kya Yaane na Yamburea bhanú bhaahakaananʼya na Musa.b Abhantu bhayo, bhaadangana, bhatigiri okumwikirirya Waryubha. 9 Nawe, bhataagendererye, kwa okubha obhukangi bhwabho bhurimanyikana kubhantu bhonsego, kya ego yaabha ku Yaane na Yambure.
Amaragiriryo ga Pauro ku Timoteo
10 Nawe, uuwe ogwatiri ameehigiryo gaani, egintungwa gyani, obhwendi bhwani, eimani yaani, obhwigumirirya bhwani, 11 obhuhanje bhwani na obhwigumirirya bhwani. Omanyiri kya ego abhantu bhaanyankya, hanú naaringa mumigi gya Antiokia,c Ikonio na Rustira. Kweki, omanyiri ega, neekongʼererya amakongʼu gonsego, nawe Omukuru Yeesu akantuurya kugayo gonsego. 12 Mbe bhoono, bhonsego bhanú bharamwikirirya Kiristu Yeesu, na bhareenda okwikara kwa okumwigwa Waryubha, bharaabhenga bharanyankibhwa. 13 Nawe abhakori bha obhusarya na abhangʼeenererya, bharigendererya okubha abhakori bha obhusarya bhukongʼu, bharibhanga bharangʼeena na okungʼeenwa.
14 Nawe uuwe, ogume kumangʼana ganú weehigiribhwa na okugeekirirya ega, n-ga maheene. Ogume kugayo, kwa okubha obhamanyiri bhanú bhaakwihigirya. 15 Okurwa mubhwana, omanyiri Amangʼoore Amarabhu ganú garakuhaana egintungwa. Amangʼoore gayo, garareeta obhutuurya kwa enjira ya okumwikirirya Kiristu Yeesu. 16 Amangʼoore Amarabhu gonsego, gangʼoorerwe kwa omwika gwa Waryubha. Gayo, gareenderwa okwihigirya obhuheene, na okukaanʼya abhantu, naho bhatige obhusarya bhwabho. Kweki, garoorokererya abhantu hanú bharasarya, na okoorokererya kira kinú kireenderwa embere ya Waryubha. 17 Amangʼoore gayo, garamukora omuntu wa Waryubha abhe aseemiibhwe na abhe yeeseemerye okukora emirimu gyonsego emijomu.