2 Timoteo 4

Ndakukomererya ganu, embere ya Waryubha na embere ya Kiristu Yeesu, unú aribhuturira ekiina abhahoru na abhaku. Weeki ngʼo ariija okutunga kya omukama. 2 Bhoono, obhenga oraraarika eringʼana rya Waryubha. Wiseemye okukora ego, kwibhaga rinú rireenderwa na rinú ritakwenderwa. Obhenga orakaanʼya, orakemera, orateremya abhantu. Okore ego, enu oreehigirya kwa obhwangarariri bhukongʼu. 3 Eribhaga ririija, rinú abhantu bhatariitegeerera ameehigiryo ga obhuheene. Bharibhanga bhareenda okwitegeerera ganú garabhajomera ageenego, na okusora abheehigirya emiganda na emiganda bha okubheehigirya ganú bhahanjiri okwitegeerera. 4 Bharitiga okwitegeerera obhuheene, na bharigwata amagano ga obhubheehi ganú gataana obhwera. 5 Nawe uuwe, obhenga oreeswa kumangʼana gonsego, wikongʼererye enyanko, okore emirimu gya okuraarika Amangʼana Amajomu, na okore bhujomu emirimu gya Waryubha gyonsego.

6 Ndakukeerya gayo, kwa okubha amanyinga gaani, garingi haangʼi okwitirwa kya ekimwenso kya edivai ahasi ha okumwensera. Eribhaga ryani rya okukwa riringi haangʼi. 7 Ndwaniri eriihe bhujomu, naamariri orugendo, kweki naaguma kuimani. 8 Bhoono, ndaganyirira okuhaanwa eritaaji, kwa okubha neekara kwa obhuheene embere ya Waryubha. Omukuru Yeesu Omubhuturi wa ekiina owa obhuheene, arintuha orusiku runú ariija. Ntaringi oni omwenego, na abhandi bhonsego bhanú bhareegomba, okuhunjuka kwaye.

Amasabho ga Pauro ku Timoteo

9 Timoteo, okore ekituunyo okuuja enu bhwangu kwa okubha 10 Dema yaantigiri. Weeki yaahanja amangʼana ga ekyaro, akaamura okugya mumugi gwa Tesaronike. Kiresike weeki, yaagiiri okumukorera emirimu Waryubha mukyaro kya Garatia, na Tiito yaagiiri mukyaro kya Darimatia. 11 Ruuka omwenego, ngʼo yaatigeeri hamwi na oni hanu. Hanú oraaje enu, uuje na Mariko, kwa okubha aratura okumbeera emirimu gya Waryubha. 12 Naamutuma Tukiko, mumugi gwa Efeso eyo. 13 Hanú oraaje, undeetanirye ekabhuuti yaani na ebhitabho, ekinene bhirya ebhya eriseero. Ekabhuuti naaitiga ku Karipo mumugi gwa Turoa erya.

14 Arekisaanda omuturi wa ebhyuma, yaankoreeri amabhiibhi bhukongʼu. Omukuru Yeesu, arimurihya okuringʼaana na ebhikorwa bhyaye. 15 Wiyangararire na omuntu uyo, kwa okubha yaahakaanʼya bhukongʼu, ameehigiryo geetu.

16 Hanú neebhagirira mwibharaja orwa mbere, ataatuuka-ho kora omuntu oumwi unú yeemirira orubhaara rwani, bhonsego bhaantiga. Ndamusabha Waryubha atige okubhabharira obhusarya bhuyo. 17 Nawe, Omukuru Yeesu yaaringa hamwi na oni, akangʼaana eginguru okuraarika Amangʼana Amajomu gonsego, naho abhantu bhonsego bhanú bhataringi Abhayahudi bheegwe. Nonse akantuurya okurwa mungʼanga ya oruku, kwa okubha naaringa muna mumunwa gwa endwi. 18 Omukuru arintuurya okurwa kukira eringʼana eribhiibhi, na okunyangararira okuhikira nhike mubhukama bhwaye bhwa murwire. Omukuru agungibhwe koko na koko. Amina.

Okukeeranʼya kwa okuraga

19 Unkeeranirye Akira na omukari waaye Pirisikira, na abha owa Onesiforo. 20 Erasito yaatigara mumugi gwa Korinto. Turofimo naamutiga mumugi gwa Mireto, yaaringa omurweri. 21 Bhoono okore ekituunyo okuuja, eribhaga rya embeho ritarahika. Orakeeranibhwa na Eubhuro, Pude, Rino, Kiraudia, hamwi na abheekirirya abhandi bhonsego.

22 Ndamusabha Omukuru Yeesu, abhe hamwi na uuwe. Eriruguto ryaye, ribhe hamwi na bheenyu bhonsego.