Okwigumirirya kumirimu gya Waryubha
2
Bhoono, omwana waani, obhe na eginguru kwiruguto rinú turanyoora kwa enjira ya okumwikirirya Kiristu Yeesu. 2 Uuwe weegwiri ameehigiryo ganú neehigirya embere ya abheemiririri abhaaru. Bhoono, ogagwatye abhantu bhanú bhareekiriribhwa, na bharatura okwihigirya abhandi. 3 Wikongʼererye munyanko hamwi na oni, kya omusirikare omujomu wa Kiristu Yeesu. 4 Atariho omusirikare unú aratiga okukora emirimu gya ekisirikare, asohe kumirimu ginú gitaringi gya ekisirikare. Atakwisohya kugiyo, kwa okubha areenda okumungʼarira omukuru waaye. 5 Egoego, na unú arasongana mumihooyo, atakutura okuhaanwa omutuho gwa obhuhigi, nyoore atagwatiri amaragiriryo ga emihooyo. 6 Kweki, omurimi unú ararima kwa ekituunyo, uyo areenderwa okubha owa mbere okugega erigesa. 7 Timoteo, witegeerere eguru ya amangʼana gayo ndakukeerya, kwa okubha Omukuru Waryubha arikuhaana obhuturo bhwa okumanya gonsego.8 Omuhiituke Yeesu Kiristu wa oruganda rwa omukama Daudi,a unú yaahyukibhwa okurwa mubhaku. Gayo ngo Amangʼana Amajomu ganú ndaraarika. 9 Gayo ngo garakora ndanyanka kwa okubhohwa na eminyororo kya omusarya. Nawe, eringʼana rya Waryubha ritakubhohwa. 10 Kwa ego, ndeekongʼererya gonsego kurusumo rwa abhantu bhanú Waryubha yaasora, naho bhonse bhatuuribhwe kwa okumwikirirya Kiristu Yeesu na okubha na obhumwi kubhukuru bhwaye koko.
11 Eringʼana rinu ni-rya maheene, ega,
“Nyoore twakwa hamwi na Kiristu,
kweki turibha abhahoru hamwi nawe.
12 Nyoore tureekongʼererya,
turitunga hamwi nawe.
Nyoore turamwanga weeki,
wonse aritwanga.
13 Nyoore bheetu tutakubha abhaheene,
nawe weeki aragendererya okubha omuheene,
kwa okubha atakutura okwiyanga omwene.”
Omukori wa emirimu owa heene embere ya Waryubha
14 Obhahiitukye abheekirirya amangʼana gayo, na okubhakomererya embere ya Waryubha, bhatige eginhaka eguru ya amangʼana ganú gataana obhwera. Eginhaka giyo, girasarya bhanú bharagiitegeerera. 15 Wikongʼererye okwihigirya amangʼana ga obhuheene, kya ego ereenderwa ku Waryubha. Hayo oribha omukori wa emirimu unú otaana eginsoni kurusumo rwa emirimu gyaye. Okukora ego, nko Waryubha areekirirya.
16 Oteesohya kumangʼana amabhiibhi ganú gataana obhwera bhobhonse, kwa okubha gayo garabhakora abhantu bharabha hare na Waryubha. 17 Ameehigiryo gaabho n-kya ekironda kinú kitakuhwena. Gati ya bhayo, bharimo Himenayo na Fireto. 18 Bhayo, bhabhuriri bhukongʼu, bhatigiri obhuheene. Bharagamba ega, obhuhyuki bhwa abhaku, bhwamara okubha-ho. Kwa okwihigirya ego, bharahabhya eimani ya abhantu abhandi. 19 Nawe, abhantu bhanú bheemiri, n-kya obhurusa bhunú bhwatuurwa na Waryubha. Na kubhurusa kuyo rungʼoorerwe-ko orubhaaso runu,
“Omukuru Waryubha amanyiri abhaana bhaaye,”b
kweki,
“Omuntu wowonse unú areebhirikira ega, weeki ngʼ-wa Omukuru Waryubha, atige obhusarya.”
20 Munyumba enene, otakunyoora-mo ebhintu bhya ebhigera bhya egijahaabhu na egimbirya ebhyenego, nawe, bhirimo ebhya emiti na obhutoto. Ebhindi bhirasuukwa, ebhindi bhitakusuukwa. 21 Mbe bhoono, nyoore omuntu areeraame kwa okutiga obhusarya bhonsego, arabha kya ekintu kinú kirasuukwa, aribha areenderwa ku Mukuru waaye, amukorere emirimu gyonsego emijomu.
22 Otige orunamba rwa obhumura, ogwate obhuheene, eimani, obhuhanje na omurembe. Ogwate gayo, hamwi na bhonsego bhanú bharamusabha Omukuru kwa omutima omujomu. 23 Nawe, oteesohya munhaka gya ekikangi ginú gitaana obhwera, kwa okubha omanyiri ega, giyo gireebhukya eriihe. 24 Kweki, etakwenderwa omugaya wa Omukuru, abhe ahanjiri eriihe. Nawe, abhe omwigumirirya, na omunyoohu kubhantu bhonsego, na unú amanyiri okwihigirya. 25 Areenderwa abhe aratongera abhantu kwa obhunyoohu bhanú bharahakaananʼya nawe, naho hamwi Waryubha abhahunjure bhamanye obhuheene. 26 Hayo, obhungʼeeni bhwabho bhurabhahindira kweki, na bharatuuribhwa okurwa mumutego gwa Erisambwac rinú ryaringa ribhagwatirye, naho bhakore obhwendi bhwaryo.