Enyarubha ya kabhiri eya Pauro ku
Timoteo
Pauro aramukeeranʼya Timoteo
1
Enyarubha inu, erwiri kuoni Pauro. Oni naatumwa kwa obhwendi bhwa Waryubha, okubha omutumwaa wa Kiristu Yeesu, naho okuraarika amangʼana ga obhuhoru. Waryubha yaaturaga ega, obhuhoru bhuyo, bhuratuuka kwa okumwikirirya Kiristu Yeesu. 2 Ndakungʼoorera uuwe Timoteo, omwana waani omuhanje.Ndakwendera eriruguto, ekyabhira na omurembe okurwa ku Taata Waryubha, na ku Kiristu Yeesu Omukuru weetu, bhibhe hamwi na uuwe.
Pauro aramukumya Waryubha na okumwimya Timoteo
3 Ndamukumya Waryubha unú ndakorera emirimu kwa ameetegeerero amajomu, kya ego bhajaaji weetu bhaamukoreranga. Eribhaga ryonsego ndakuhiituka mumasabho gaani obhutiku na omubhasu. 4 Hanú ndahiituka ameesori gaaho, eribhaga rinú twaragananga, ndeegomba bhukongʼu okukurora kweki, naho mbe na obhujomerwa. 5 Kweki, ndahiituka eimani yaaho ya obhuheene. Eimani kya iyo, yaaringa nayo kuuku weenyu Roisi na ngʼina weenyu Eunike. Nonse ndeekirirya ega, na uuwe uunayo. 6 Kwa ego, ndakuhiitukya ega, okore ekituunyo okutumira ekibharo kinú Waryubha yaakuhaana, eribhaga rinú naakwimya kwa okukutuurira amabhoko. 7 Okore ego, kwa okubha Waryubha ataatukora abhoobha, nawe, yaatuhaana eginguru, obhuhanje na obhuturo bhwa okwiribhira.
8 Bhoono, otarora eginsoni okugamba amangʼana eguru ya Omukuru weetu, kasi okurora eginsoni kwa okubha ndingi mukibhohe kurusumo rwaye. Nawe, wikongʼererye enyanko hamwi na oni, kurusumo rwa okuraarika Amangʼana Amajomu eguru yaaye, okuringʼaana na eginguru ginú orahaanwa na Waryubha. 9 Weeki yaatutuurya, akatubhirikira tubhe abhaana bhaaye. Ataakora ego, kwa ekisigo kya amakorwa geetu amajomu, nawe, kwa ekisigo kya obhwendi bhwaye na eriruguto ryaye. Weeki yaatuhaana eriruguto riyo kurusumo rwa Kiristu Yeesu, kora ekyaro kitarabhumbwa. 10 Nawe bhoono, Waryubha yoorokerye eriruguto ryaye kubheetu, kwa okuuja Omutuurya weetu Kiristu Yeesu. Weeki yaahiga eginguru gya oruku, na yoorokya obhuhoru bhwa koko, kwa enjira ya Amangʼana Amajomu.
11 Kurusumo rwa Amangʼana Amajomu gayo, naakorwa okubha omuraariki, omutumwa, na omwihigirya. 12 Oni ndanyanka kwa ekisigo kya gayo. Nawe, ntakurora eginsoni, kwa okubha mmumanyiri unú neekirirya, na okwikirirya ega, Amangʼana Amajomu ga obhuheene bhunú yaangʼaana,b aragaangararira bhujomu, okuhikira orusiku rwa okuhunjuka kwaye. 13 Ogwate bhujomu ameehigiryo ga obhuheene ganú wigwiri kuoni. Wihigirye gayo, na okutigara kuimani na obhuhanje bhunú bhuratuuka ku Kiristu Yeesu. 14 Amangʼana Amajomu ganú waahaanwa, ogaangararire kwa eginguru gya Omutima Omurabhu,c unú aringi munsi weetu.
15 Omanyiri ega, abhantu bhonsego bha mukyaro kya Asiad bhantigiri, gati yaabho bharimo Fugero na Herimogene. 16 Ndamusabha Omukuru Yeesu yaabhire abhantu bha owa Onesiforo, kwa okubha mara kaaru yaaringa aransambaarukya. Kweki, ataandoreranga eginsoni kwa okubha ndingi mukibhohe. 17 Nawe, eribhaga yaaja mumugi gwa Ruumi hanu, yaakora ekituunyo okuntuna okuhikira akannyoora. 18 Uuwe omanyiri bhujomu, kya ego yaambeeranga amaaru, mumugi gwa Efeso eyo. Omukuru Yeesu amusabhire Onesiforo ekyabhira ku Mukuru Waryubha, orusiku rurya rwa okubhutura ekiina.e