Yeesu arariisya abhantu okwambuka ebhiku bhitaanu
6
Mbe, hanú gayo gaahwa, Yeesu akaambuka enyanja ya Gariraaya, inú eriina erindi yaabhirikirwanga ega, enyanja ya Tibheria. 2 Omuganda omunene gwa abhantu bhaaringa bharamusoorana, kwa okubha bhaaringa bhararora ebhimanyiiriryo bhinú yaaringa arakora kubharweri. 3 Nho, Yeesu akariina munkuku nyabhurebhe na abheehigira bhaaye, akeekara eyo hamwi nabho. 4 Eribhaga riyo, enyangi ya Abhayahudi, eya Epasaka yaaringa haangʼi.5 Yeesu akarekera ameeso, akarora omuganda omunene gwa abhantu guramuuja-ko. Kimwi, akabhuurya Firipo ega, “Ntugura-ha emikaate gya okwisa abhantu bhanu bhonsego?” 6 Yeesu yaamubhuurya Firipo ego, naho okumusakya, kwa okubha omwene yaaringa amanyiri kinú akaakoreri. 7 Firipo akamukyukya ega, “Kora nyoore tukaaguriri emikaate emike gya egidinari magana gabhiri,a naho kira omuntu agabhirwe kabhaara kakekake, gitakeesiri.” 8 Nho, Andurea, omwihigira oundi wa Yeesu, unú yaaringa omumura waabho Simoni Petero, akamukeerya Yeesu ega, 9 “Aringi hanu omumura oumwi, unú yaana emikaate etaanu gya egishayiri na eginswi ebhiri. Nawe bhoono, ebhyakurya bhinu mbitura okwisa omuganda gunu gonsego?” 10 Mbe, Yeesu akabharagirirya abheehigira bhaaye ega, “Mubhakeerye abhantu bheekare hansi.” Ahasi hayo, haaringa na obhunyanki obhwaru. Nho abhantu bhonsego bhakeekara hansi. Gati yaabho, bhaaringa-mo abhasaaja ebhiku ebhitaanu. 11 Kimwi, Yeesu akagega emikaate etaanu giyo, akamukumya Waryubha, akagabhira abhantu bhonsego bhanú bhaaringa bheekeeri hayo. Akakora egoego na eginswi ebhiri girya gyonse, akabhagabhira. Abhantu bhonsego bhakarya kya ego bheendanga.
12 Hanú bheeguta, Yeesu akakeerya abheehigira bhaaye ega, “Mukumanʼye amasaagyo gonsego, naho gataaja okusarika.” 13 Mbe, bhakakumanʼya amasaagyo gonsego, bhakeejurya ebhikapo ekumi na bhibhiri bhya amasaagyo ga emikaate gya egishayiri.
14 Hanú abhantu bhayo bhaarora ekimanyiiriryo kinú Yeesu akoreri, bhakagamba ega, “M-maheene omuntu unu ngʼo omurooti wa Waryubha, unú twaganyiriranga yaaje mukyaro kinu.”b 15 Kimwi Yeesu akamanya ega, abhantu bhayo bheendanga okumubhandirirya kwa eginguru, naho bhamukore okubha omukama waabho. Nawe, Yeesu akeemuka hayo, akagya kweki munkuku omwenego.
Yeesu aragenda eguru ya amanji
16 Hanú yaahika mugoroobha, abheehigira bha Yeesu bhakahiringita okugya kunyanja ya Gariraaya. 17 Bhakasoha mubhwato, naho bhaambuke enyanja okugya mumugi gwa Kaperinaumu. Eribhaga riyo, ekisunte kyaringa kyambiri okusoha, nawe, Yeesu yaaringa ataraaja.
18 Mbe, enyanja ekasarika, kwa okubha omuyaga omuhaari gwaringa gurahuuta. 19 Hanú abheehigira bha Yeesu bhaahika muna egikirometa etaanu kasi esansabha, bhakamurora Yeesu aragenda eguru ya amanji na aringi haangʼi okuhikira obhwato bhwabho. Bhakoobhoha bhukongʼu. 20 Nho, Yeesu akabhakeerya ega, “Mutoobhoha! Nooni!” 21 Mbe, bheeki bhakeenda ega, ariine mubhwato. Hayohayo, obhwato bhukahika ngʼambu enú bhaaringa bharagya.
Yeesu ngʼo ebhyakurya//bhinú bhirabhahaana abhantu obhuhoru
22 Ejo wendeko, omuganda omunene gwa abhantu bhanú bhaaringa bhatamiri ngʼambu harya, bhakarora obhwato bhumwi ego hayo. Kweki bhakamanya ega, Yeesu ataagiiri mubhwato hamwi na abheehigira bhaaye. Nawe, abheehigira bhaaye bhaagiiri abheenego. 23 Kimwi, abhantu abhandi bhakaaja na amaato okurwa mumugi gwa Tibheria, bhakahika hanú omuganda gwa abhantu bhaarya emikaate, hanú Omukuru Yeesu yaamara okumukumya Waryubha. 24 Hanú omuganda guyo bhaarora ega, Yeesu na abheehigira bhaaye bhataringi hayo, bhakasoha mumaato gayo, bhakagya Kaperinaumu okumutuna Yeesu.
25 Hanú abhantu bhayo bhaahika ngʼambu ya enyanja, bhakamunyoora Yeesu, bhakamubhuurya ega, “Rabhi, waahikiri enu ruuha?” 26 Yeesu akabhakyukya ega, “Ndabhakeerya obhuheene ega, murantuna kwa okubha naabhaheeri emikaate, mukarya mukeeguta, etaringi kwa okurora ekimanyiiriryo kinú naakoreri. 27 Mutakora emirimu kurusumo rwa okunyoora ebhyakurya bhinú bhirasarika, nawe, mukore emirimu kurusumo rwa okunyoora ebhyakurya bhinú bhitakusarika, bhinú bhirabhahaana obhuhoru bhwa koko. Omwana wa Adamu, arabhahaana ebhyakurya bhiyo, kwa okubha Taata Waryubha amuheeri obhutungi bhwa okukora ego.” 28 Kimwi, bheeki bhakamubhuurya ega, “Mbe, tukore-ki, naho tuture okukora amangʼana ganú Waryubha areenda?” 29 Yeesu akabhakyukya ega, “Amangʼana ganú Waryubha areenda mukore, nu-kwikirirya unú yaatuma.”
30 Hayo bhakamubhuurya ega, “N-kimanyiiriryo-ki orikora, naho turore na okukwikirirya? Ni-ngʼana-ki oraakore? 31 Bhajaaji weetu, hanú bhaaringa kukibhara, bhaarya ebhyakurya bhinú bhirabhirikirwa ega, mana.c Engʼoorerwe mu Mangʼoore Amarabhu ega, ‘Yaabhahaana ebhyakurya bhiyo okurwa murwire, naho bharye.’ ”d 32 Mbe, Yeesu akabhakeerya ega, “Ndabhakeerya obhuheene ega, etaringi ega, Musa ngʼo yaabhahaana bhajaaji weenyu ebhyakurya okurwa murwire, nawe, n-Taata. Weeki ngʼo arabhahaana bheenyu ebhyakurya bhya heene okurwa murwire. 33 Ebhyakurya bhya Waryubha ngʼ-unú areetuuma okurwa murwire, naho abhahaane abhantu bhonsego bha ekyaro kinu obhuhoru bhwa koko.” 34 Kimwi bhakamukeerya Yeesu ega, “Omukuru, otuhaanenga ebhyakurya bhiyo eginsiku gyonsego.” 35 Yeesu akabhakyukya ega, “Oni nooni ebhyakurya bhinú bhirabhahaana abhantu obhuhoru bhwa koko. Omuntu wowonse unú araaja kuoni, atariigwa omweko kweki! Na unú arinyikirirya maheene atariigwa enyonta kweki.
36 “Nawe, oni naabhakeerya ega, munduuji, nawe, mutakunyikirirya. 37 Abhantu bhonsego bhanú Taata arangʼaana, bhariija kuoni. Oni ntaryanga kora oumwi unú araaja kuoni. 38 Oni ntaaja okurwa murwire, naho mbe ndakora kya ego oni ndeenda, nawe, mbe ndakora kya ego Taata unú yaantuma areenda. 39 Taata unú yaantuma areenda ega, ntabhurya kora omuntu oumwi, kubhanú yaangʼaana, nawe, mbahyukye bhonsego kurusiku rwa obhuteero. 40 Kinú Taata areenda niiga, kira omuntu unú amanyiri ega, oni m-Mwana waaye na okunyikirirya, abhe na obhuhoru bhwa koko. Oni ndimuhyukya kurusiku rwa obhuteero.”
41 Mbe, Abhayahudi bha hayo, bhakaamba okwingʼeheerya, kwa okubha Yeesu yaagamba ega, “Oni nooni ebhyakurya bhinú bhyeetuuma okurwa murwire.” 42 Bhakabhuuranʼya ega, “Mbe, omuntu unu ti-Yeesu, omwana wa Yusufu? Kora abheebhuri bhaaye tubhamanyiri. Bhoono aratura egaki okugamba ega, yeetuuma okurwa murwire?” 43 Yeesu akabhakyukya ega, “Mutige okwingʼeheerya bheenyu abheene kwa abheene. 44 Atariho omuntu unú aratura okuuja kuoni, nyoore ataroorokereribhwa na Taata unú yaantuma. Na oni ndimuhyukya kurusiku rwa obhuteero. 45 Engʼoorerwe mu Mangʼoore Amarabhu mubhitabho bhya abharooti ega, ‘Abhantu bhonsego bhariihigiribhwa na Waryubha.’e Mbe, omuntu wowonse unú areetegeerera na okwihigira okurwa ku Taata, araaja kuoni. 46 Atariho omuntu unú yaamurora Taata Waryubha, nawe oni omwene, kwa okubha naarwa kuweeki.
47 “Ndabhakeerya obhuheene ega, omuntu wowonse unú aranyikirirya, uyo yaana obhuhoru bhwa koko. 48 Oni nooni ebhyakurya bhinú bhirabhahaana abhantu obhuhoru bhuyo. 49 Onyoora bhajaaji weenyu bhaarya kukibhara ebhyakurya bhinú bhirabhirikirwa ega, mana, nawe, bhaakwa. 50 Nawe, hanu bhiriho ebhyakurya bhinú bhiituumiri okurwa murwire. Kwa ego, omuntu wowonse unú ararya ebhyakurya bhiyo, atarikwa. 51 Oni nooni ebhyakurya bhinú bhiituumiri okurwa murwire, bhinú bhirahaana abhantu obhuhoru bhwa koko. Omuntu wowonse unú ararya ebhyakurya bhiyo, aribha na obhuhoru bhuyo. Ebhyakurya bhiyo m-mubhiri gwani gunú ndaruusya kurusumo rwa abhantu bhonsego bha ekyaro kinu, naho bhabhe na obhuhoru bhwa koko bhuyo.”
52 Mbe, Abhayahudi bhayo bhakaamba okuhakaananʼya bhukongʼu, bharabhuuranʼya ega, “Omuntu unu aratura egaki okutuhaana omubhiri gwaye, naho turye?” 53 Kimwi, Yeesu akabhakeerya ega, “Ndabhakeerya obhuheene ega, nyoore mutaarye omubhiri gwa Omwana wa Adamu, na okunywa amanyinga gaaye, mutaribha na obhuhoru bhwa koko. 54 Omuntu wowonse unú ararya omubhiri gwani na okunywa amanyinga gaani, uyo yaana obhuhoru bhwa koko, na oni ndimuhyukya kurusiku rwa obhuteero. 55 Omubhiri gwani ngo ebhyakurya bhya heene, na amanyinga gaani ngo ebhyokunywa bhya heene. 56 Omuntu wowonse unú ararya omubhiri gwani na okunywa amanyinga gaani, uyo arabha munsi waani, na oni nonse ndabha munsi waaye. 57 Kya ego Taata omuhoru yaantuma, na oni niina obhuhoru okurwa kuweeki. Egoego, omuntu wowonse unú arandya, aranyoora obhuhoru okurwa kuoni.f 58 Mbe, oni nooni ebhyakurya bhinú bhiituumiri okurwa murwire. Ebhyakurya bhiyo bhitakuhunkana na ebhyakurya bhinú bhajaaji weenyu bhaarya, nawe bhakakwa. Nawe, omuntu wowonse unú ararya ebhyakurya bhinu, aribha na obhuhoru bhwa koko.” 59 Yeesu yaagamba amangʼana gayo, hanú yaaringa areehigirya mumasinagogig ga Kaperinaumu eyo.
Abheehigira abhaaru bhakamutiga Yeesu
60 Abhaaru gati ya abheehigira bhaaye hanú bheegwa amangʼana gayo, bhakagamba ega, “Ameehigiryo ganu n-ga okujimya bhukongʼu! Niwi aratura okugeekirirya?” 61 Yeesu akamanya ega, abheehigira bhaaye bhareengʼeheererya amangʼana ganú yaaringa agambiri, kwa ego akabhabhuurya ega, “Mbe, eringʼana rinu ribhajimirye? 62 Bhoono, eribha egaki hanú murimurora Omwana wa Adamu arariina okugya murwire, enú yaaringa kubhwambiro? 63 Omutima wa Waryubhah ngʼo arabhahaana abhantu obhuhoru. Omuntu atakutura okukora kyokyonse kwa eginguru gyaye omwene. Amangʼana ganú mbakeererye n-ga Omutima wa Waryubha, na garareeta obhuhoru bhwa koko. 64 Nawe, bhariho abhandi gati yeenyu bhanú bhatakumwikirirya.” Yeesu yaagamba ego, kwa okubha yaaringa amanyiri okurwa kubhwambiro ega, m-bawi bhanú bhatakumwikirirya, na ega, niwi arimuriira eniku. 65 Mbe, akagendererya okubhakeerya ega, “Kiyo nkyo kikoreri mbakeererye ega, atariho omuntu unú aratura okuuja kuoni, nyoore ataroorokereribhwa na Taata.”
66 Okwambira hanú bheegwa amangʼana gayo, abhaaru gati ya abheehigira bhaaye, bhakamutiga, bhataamusoorana kweki. 67 Kimwi, Yeesu akabhuurya abheehigira bhaaye ekumi na bhabhiri ega, “Mbe, na bheenyu bhonse mureenda okuntiga?” 68 Simoni Petero akamukyukya ega, “Omukuru, tugende kuwi? Uuwe omwene uuna amangʼana ganú garatuhaana obhuhoru bhwa koko. 69 Bheetu tureekirirya na tumanyiri ega, uuwe nuuwe Omurabhu wa Waryubha.” 70 Nho, Yeesu akabhakeerya ega, “Naabhasora bheenyu ekumi na bhabhiri okubha abheehigira bhaani, nawe, oumwi gati yeenyu aroorokereribhwa na Erisambwa.i” 71 Hayo Yeesu yaaringa arahairira Yuda, omwana wa Simoni Esikariote. Kwa okubha Yuda uyo, ngʼo yaamuriira eniku Yeesu, onyoora yaaringa oumwi gati ya abheehigira bhaaye ekumi na bhabhiri.