Yeesu aragya Yerusaremu munyangi ya Ebhihuuna
7
Mbe, hanú gayo gaahwa, Yeesu akeenaara mukyaro kya Gariraaya. Ateenda okwinaara mukyaro kya Yudea, kwa okubha abhatungi bha Abhayahudi bhaaringa bhareenda okumwita. 2 Eribhaga riyo, enyangi ya Abhayahudi ya Ebhihuunaa yaaringa haangʼi. 3 Nho, abhaana bhaabho Yeesu bhakamukeerya ega, “Nuurwe hanu, ogende Yudea, naho abheehigira bhaaho bharore ebhika bhinú orakora. 4 Nyoore omuntu areenda okumanyikana kubhantu, atakukora emirimu gyaye kwa obhwibhise. Mbe, nyoore uuwe oratura okukora amangʼana gayo, genda wiyorokye kubhantu bhonsego, naho bhakumanye.” 5 Abhaana bhaabho bhayo, bhaagamba ego, kwa okubha kora bheeki abheene bhataamwikirirya Yeesu. 6 Nho, Yeesu akabhakeerya ega, “Eribhaga ryani rya okugya eyo, ritarahika, nawe, bheenyu muratura okugya eribhaga ryoryonse. 7 Abhantu bha mukyaro kinu, bhataana ekisigo kya okubhajimira bheenyu. Nawe, bharanjimira oni, kwa okubha ndabhakeerya ega, amakorwa gaabho m-mabhiibhi. 8 Bheenyu mugende Yerusaremu okujomererwa enyangi. Oni ntakugya eyo, kwa okubha eribhaga ryani ritarahika.” 9 Hanú Yeesu yaamara okugamba amangʼana gayo, akatigara mukyaro kya Gariraaya.10 Nawe, hanú abhaana bhaabho abhake bha ekimura bhaagya Yerusaremu okujomererwa enyangi iyo, Yeesu wonse akagya eyo, nawe, kwa obhwibhise, bira okwiyorokya kubhurabhu. 11 Mbe, abhatungi bha Abhayahudi bhanú bhaaringa munyangi iyo, bhaamutunanga Yeesu. Bhakabhuurya abhantu ega, “Omuntu urya aringi-ha?” 12 Abhantu abhaaru bhakabha bharahakaananʼya eguru ya Yeesu. Abhandi bhaagambanga ega, “Yeesu m-muntu wa heene,” nawe, abhandi bhaagambanga ega, “Tiigo-ha, arangʼeena abhantu.” 13 Nawe, ataaringa-ho omuntu unú yaaringa aramugamba Yeesu kubhurabhu, kwa okubha bhoobhohanga abhatungi bha Abhayahudi.
Yeesu areehigirya abhantu mwisyengerero
14 Hanú eginsiku gya enyangi gyahika gatigati, Yeesu akagya, akasoha murubhanja rwa erisyengerero erikuru, akaamba okwihigirya abhantu. 15 Nho, abhatungi bha Abhayahudi bhakaruguura kwa ameehigiryo gaaye, bhakagamba ega, “Mbe, omuntu unu aratura egaki okumanya gonsego ganu, enu ataasoma?” 16 Mbe, Yeesu akabhakeerya ega, “Ameehigiryo ganú ndeehigirya, gataringi gaani, nawe, garwiri ku Waryubha unú yaantuma. 17 Omuntu wowonse unú areenda okukora ganú Waryubha areenda, uyo araamanye ega, ameehigiryo gaani garwiri ku Waryubha, na ega, ntakugamba kwa obhutungi bhwani. 18 Omuntu wowonse unú aragamba kwa obhutungi bhwaye omwene, uyo areetunira obhusuuku bhwaye omwene. Nawe, unú aratuna obhusuuku bhwa unú yaamutuma, uyo aragamba obhuheene, atakugamba obhubheehi.”
19 Yeesu akagendererya okugamba ega, “Mumanyiri ega, Musa yaabhahaana amaragiriryo ga Waryubha. Nawe, atariho omuntu gati yeenyu unú aragwata amaragiriryo gayo. Bhoono, kwaki mureenda okunyita?” 20 Omuganda guyo gukamukyukya ega, “Uuwe uuna ekihwi ekibhiibhi! Niwi unú areenda okukwita?” 21 Yeesu akabhakyukya ega, “Naakora hanu ekika ekimwi kurusiku rwa Esabhato, na bheenyu bhonsego mukaruguura.b 22 Maaha, Musa yaabhakeerya okusaara abhaana bheenyu bha ekimura. Etaringi ega, eriragiriryo riyo ryarwa ku Musa, nawe, ryarwa kubhajaaji weenyu bha okwamba. Bhoono, bheenyu mutakusaara abhaana bheenyu kora kurusiku rwa Esabhato? 23 Murakora ekituunyo okugwata amaragiriryo ga Musa, kwa okusaara abhaana bheenyu bha ekimura, kora kurusiku rwa Esabhato. Bhoono, kwaki mwanjimira kwa okubha naahwenʼya omuntu kurusiku rwa Esabhato? 24 Mutabhuturira ekiina omuntu okurekana na amangʼana ganú garamaahikana kwa kibhara, nawe, mumubhuturire ekiina kwa heene.”
Abhantu bharabhuuranʼya nyoore Yeesu ngʼo//Kiristu Omutuurya
25 Mbe, abhantu abhandi bha Yerusaremu hayo, bhakabha bharabhuuranʼya ega, “Bhoono, omuntu unu ti-unú abhatungi bheetu bhareenda okumwita? 26 Maaha, bhoono aragamba kubhurabhu, nawe, bheeki bhatakumukeerya kyokyonse! Mbe, eraturikana ega, abhatungi bheetu bhonse bhamanyiri kwa obhuheene ega, uyo ngʼo Kiristu Omutuurya? 27 Omuntu unu, tumanyiri enú arwiri. Nawe, hanú Kiristu Omutuurya omwene ariija, atariho omuntu unú arimanya enú arwiri.” 28 Hanú Yeesu yaaringa areehigirya murubhanja rwa erisyengerero erikuru, akagamba kwa eriisi erinene ega, “Maheene mummanyiri, na mumanyiri enú naarwa. Oni ntaaja kwa obhutungi bhwani, nawe, Waryubha unú aringi omuheene, ngʼo yaantuma. Bheenyu mutamumanyiri. 29 Oni mmumanyiri, kwa okubha naarwa kumwene. Weeki ngʼo yaantuma.” 30 Nho, abhantu bhakeenda okumugwata, nawe, ataaringa-ho omuntu unú yaamugwata, kwa okubha eribhaga ryaye ryaringa ritarahika.
31 Nawe, gati ya abhantu bhanú bhaaringa hayo, abhaaru bhakamwikirirya Yeesu. Abhantu bhayo bhakagamba ega, “Bhoono, hanú Kiristu Omutuurya ariija, heene arikora ebhimanyiiriryo ebhyaru okukira bhinú omuntu unu akoreri?”
Abhasirikare bharatumwa okumugwata Yeesu
32 Mbe, Abhafarisaayo bhakeegwa kya ego omuganda gwa abhantu gwaringa gurajujuuma eguru ya Yeesu. Kwa ego, Abhafarisaayo bhayo, hamwi na abhasyengeri abhakuru,c bhakatuma abhasirikare, naho bhamugwate Yeesu. 33 Nho, Yeesu akakeerya abhantu bhayo ega, “Ndaabhe na bheenyu kwa eribhaga ekego. Kimwi ndihunjuka kuunú yaantuma. 34 Murintuna, nawe, mutarinnyoora. Kweki, enú oni ndibha, bheenyu mutakunagya okuuja eyo.” 35 Nho, Abhayahudi bhakabhuuranʼya ega, “Mbe, omuntu unu arigya-ha enú bheetu tutaritura okumunyoora? Bhoono, areenda okugya ku Bhayahudi bhanú bhanyarageeni mubhyaro ebhindi, na okwihigirya abhantu bhanú bhataringi Abhayahudi? 36 Mbe, ensonga yaaye niki hanú aragamba ega, ‘Murintuna, nawe, mutarinnyoora.’ Kweki, ‘Enú oni ndibha, bheenyu mutakunagya okuuja’?”
Yeesu arahaira eguru ya okuuja kwa Omutima Omurabhu
37 Orusiku rwa okumariisirya enyangi ya Ebhihuuna, rwaringa orusiku orunene. Mbe, Yeesu akeemirira murubhanja rwa erisyengerero erikuru, akagamba kwa eriisi erinene ega, “Omuntu akeegwa enyonta, yaaje kuoni, anywe amanji! 38 Amangʼoore Amarabhu garagamba ega, omuntu wowonse unú aranyikirirya, ‘eginyuji gya amanji ga obhuhoru bhirigera okurwa munsi yaaye.’d” 39 Yeesu yaaringa arahairira Omutima Omurabhu, unú bharahaanwa abhantu bhanú bharamwikirirya. Eribhaga riyo, Waryubha yaaringa ataratuma Omutima Omurabhu kubheene, kwa okubha Yeesu yaaringa atarasoha mubhukuru bhwaye.
Abhantu bharaahukana kwa ekisigo kya Yeesu
40 Hanú abhantu abhandi bha mumuganda guyo bheegwa amangʼana gayo, bhakagamba ega, “Heene, omuntu unu ngʼo omurooti unú turaganyirira okurwa ku Waryubha.”e 41 Abhantu abhandi bhakagamba ega, “Omuntu unu ngʼo Kiristu Omutuurya.” Nawe, abhandi bhakagamba ega, “Tiigo-ha, Kiristu Omutuurya atakutura okurwa mukyaro kya Gariraaya. 42 Mbe, Amangʼoore Amarabhu gatakugamba ega, Kiristu Omutuurya arirwa murwibhuro rwa omukama Daudi?f Kweki ega, ariibhurirwa Bhetereheemu, mumugi gunú Daudi yeebhurirwa?”g 43 Kwa ego, abhantu bhakaahukana kwa ekisigo kya Yeesu. 44 Abhandi bhakeenda ega, bhamugwate, nawe, ataaringa-ho omuntu unú yaamugwata.
Abhatungi bha Abhayahudi bhatakumwikirirya Yeesu
45 Mbe, abhasirikare bhayo, bhakahunjuka kubhasyengeri abhakuru na Abhafarisaayo. Abhatungi bhayo bhakabhabhuurya ega, “Kwaki mutamugwatiri Yeesu na okumureeta hanu?” 46 Abhasirikare bhayo bhakakyukya ega, “Tutaakeegwiri omuntu oundi unú aratura okugamba kya ego weeki aragamba.” 47 Kimwi Abhafarisaayo bhakabhabhuurya ega, “Mbe, kora na bheenyu bhonse mumariri okungʼeenwa? 48 Bhoono, ariho omutungi wowonse urya kasi Omufarisaayo kora oumwi unú aramwikirirya? 49 Nawe, omuganda gwa abhantu bhanú bharamwikirirya, bhatamanyiri amaragiriryo ga Musa. Bhayo bheehiimwa na Waryubha!”
50 Nho, Nikodemasi, oumwi wa abhatungi bha Abhafarisaayo unú yaagya ku Yeesu orusiku orumwi obhutiku, akabhuurya abharikyaye ega, 51 “Mbe, amaragiriryo geetu gareekirirya okumubhuturira ekiina omuntu enu tutaramwitegeerera na okumanya ganú akoreri?” 52 Bheeki bhakamukyukya Nikodemasi ega, “Bhoono, na uuwe wonse orarwira Gariraaya? Genda wikomye bhujomu Amangʼoore Amarabhu, na oraamanye ega, atariho omurooti unú ararwira Gariraaya.”