8
[Nho, bhayo bhonsego bhakeemuka eyo, bhakahunjuka iika. Yeesu wonse akeemuka murubhanja rwa erisyengerero erikuru, akagya munkuku ya Emijeituni.Omukari unú yaagwatwa arakora obhusimbe
2 Hanú bhwakya, Yeesu akagya kweki akasoha murubhanja rwa erisyengerero erikuru. Abhantu bhonsego bhakamugya-ko, kimwi akeekara, akaamba okubheehigirya. 3 Abheehigirya bha amaragiriryoa na Abhafarisaayo bhakamuhirira omukari oumwi unú yaagwatwa arakora obhusimbe, bhakamutuura gatigati ya omuganda gwa abhantu. 4 Bhakamukeerya Yeesu ega, “Omwihigirya, omukari unu, yaagwatwa arakora obhusimbe. 5 Mbe, mumaragiriryo gaaye, Musa yaatwamura okwita omukari kya unu, kwa okumutema amagina.b Mbe, uuwe oragamba egaki?” 6 Bhaamubhuurya ego, kwa okumusakya Yeesu, naho bhanyoore engʼana ya okumujongera. Nawe, Yeesu akeehiinya, akaamba okungʼoora hansi kwa ekyara kyaye. 7 Hanú bhaagendererya okumubhuurya, Yeesu akeemirira, akabhakyukya ega, “Nyoore ariho oumwi gati yeenyu unú ataana obhusarya, abhe owa okwamba okumutema omukari unu na erigina.” 8 Mbe, Yeesu akeehiinya kweki hansi, akagendererya okungʼoora. 9 Hanú bheegwa gayo, bhakajongerwa na ameetegeerero gaabho,c bhakaamba okwimuka kiumwiumwi, okwambira abhakaruka, okuhikira abhamura. Kubhuteero, Yeesu akatigara omwene na omukari uyo yeemiriiri embere yaaye. 10 Kimwi, Yeesu akeemirira, akamubhuurya ega, “Maayi, bharingi-ha bhanú bhaari bharakujongera? Bhoono, atariho kora oumwi unú atamiri, naho akubhuturire ekiina?” 11 Akamukyukya ega, “Omukuru, atariho kora oumwi.” Mbe, Yeesu akamukeerya ega, “Kora oni ntakukubhuturira ekiina. Genda, nawe, okwambira reero, otakora kweki obhusarya.”]d
Yeesu ngʼo endingaasi ya ekyaro
12 Mbe, Yeesu akagendererya okugamba ega, “Oni nooni endingaasi ya ekyaro. Omuntu wowonse unú aranseeta oni, atakugenda mukisunte kora orusiku orumwi, nawe, aribha na endingaasi inú eramoorokererya mubhuhoru bhwa koko.” 13 Abhafarisaayo bhakamukeerya Yeesu ega, “Uuwe oreeyimiririra omwene. Obhwimiririri bhwaho bhutaringi bhwa obhuheene!” 14 Yeesu akabhakyukya ega, “Kora nyoore ndeeyimiririra omwene, obhwimiririri bhwani m-bwa obhuheene. Oni mmanyiri enú naarwa, na enú ndagya. Nawe, bheenyu mutamanyiri enú naarwa na enú ndagya. 15 Bheenyu murambuturira ekiina okurekana na amangʼana ga abhantu, nawe, oni ntakubhuturira ekiina omuntu wowonse. 16 Nawe, nyoore ndabhuturira ekiina omuntu, ndamubhuturira ekiina kwa obhuheene, kwa okubha oni ntaringi oni omwene, nawe, ndingi hamwi na Taata unú yaantuma. 17 Mumaragiriryo geenyu engʼoorerwe ega, obhwimiririri bhwa abhantu abhabhiri bhuratura okwisigirwa ega, m-bwa obhuheene.e 18 Mbe, oni ndeeyimiririra omwene, na Taata unú yaantuma wonse aranyimiririra.”
19 Nho, Abhafarisaayo bhakamubhuurya Yeesu ega, “Bhoono, Eseweenyu aringi-ha?” Yeesu akabhakyukya ega, “Bheenyu mutammanyiri oni, na kora Taata mutamumanyiri. Nyoore mukaamanyiri oni, mukaamumanyiri Taata wonse.”
20 Yeesu yaagamba gayo gonsego, hanú yaaringa areehigirya mwisyengerero erikuru, ahasi hanú bhaaringa bharatuura amasandiko ga egisadaaka. Nawe, ataaringa-ho omuntu unú yaamugwata, kwa okubha eribhaga ryaye ryaringa ritarahika.
Yeesu arahaira eguru ya oruku rwaye
21 Mbe, Yeesu akakeerya Abhafarisaayo bhayo kweki ega, “Oni ndagya, murintuna, na murikwa kurusumo rwa obhusarya bhwenyu. Enú oni ndagya, bheenyu mutakunagya okuuja-yo.” 22 Nho, abhatungi bha Abhayahudi bhakaamba okubhuuranʼya ega, “Kwaki aragamba ega, ‘Enú oni ndagya bheenyu mutarinagya okuuja-yo’? Bhoono, aratura okwiyita?” 23 Yeesu akagendererya okubhakeerya ega, “Bheenyu murwiriri mukyaro kinu, nawe, oni naarwa eguru murwire. Bheenyu m-ba mukyaro kinu, nawe, oni ntaringi wa mukyaro kinu. 24 Kiyo nkyo kyakora nkabhakeerya ega, murikwa kwa ekisigo kya obhusarya bhwenyu. Mbe, nyoore mutakwikirirya ega, ‘Oni Nooni,’f murikwa kwa ekisigo kya obhusarya bhwenyu.” 25 Bhonse bhakamubhuurya ega, “Tukeerye, nuuwe-wi?” Yeesu akabhakyukya ega, “Naabhakeerya okurwa hanú naamba okwihigirya ega, oni niwi! 26 Niina amangʼana amaaru ganú nkaaturiri okugamba eguru yeenyu, na okubhabhuturira ekiina. Nawe, ntaakore ego, kwa okubha oni ndabhakeerya abhantu bhonsego amangʼana ganú ndeegwa okurwa kuweeki unú yaantuma. Weeki ngʼ-wa obhuheene.”
27 Hanú bheegwa gayo, bhataamanya ega, yaaringa aragamba nabho eguru ya Esewaabho owa murwire. 28 Mbe, Yeesu akabhakeerya ega, “Hanú murimuriinʼya kumusarabha Omwana wa Adamu, hayo nho murimanya ega, oni nooni. Kweki murimanya ega, gonsego ganú ndakora, ntakukora kwa obhutungi bhwani omwene, nawe, ndagamba kya ego Taata yaanyihigirya. 29 Unú yaantuma aringi hamwi na oni. Atakuntiga oni omwene, kwa okubha eribhaga ryonsego ndakora ganú garamungʼarira.”
30 Hanú Yeesu yaaringa aragamba amangʼana gayo, abhantu abhaaru bhakamwikirirya.
Waryubha arahaana abhantu obhwiyagaari
31 Mbe, Yeesu akakeerya Abhayahudi bhanú bhaamwikirirya ega, “Nyoore muragendererya okugwata ameehigiryo gaani, hayo nho muraabhe abheehigira bhaani bha heene. 32 Kweki muraamanye obhuheene, na obhuheene bhuyo, bhuribhatuura mubhwiyagaari.” 33 Bheeki bhakamukyukya ega, “Bheetu n-dwibhuro rwa Abhurahamu.g Tutaakabheeri abhagaya bha omuntu wowonse. Kwaki oragamba ega, bheetu turaabhe abheeyagaari?” 34 Yeesu akabhakyukya ega, “Ndabhakeerya obhuheene ega, omuntu wowonse unú aragendererya okukora obhusarya, uyo m-mugaya wa obhusarya.h 35 Omugaya atakwikara munyumba ya omukuru waaye eginsiku gyonsego, nawe, omwana ngʼo aratama munyumba eginsiku gyonsego. 36 Mbe, nyoore Omwana wa Waryubha aribhasibhura murwe mubhusarya bhwenyu, mutaribha abhagaya kweki, nawe, muribha abheeyagaari heene. 37 Mmanyiri ega, bheenyu n-dwibhuro rwa Abhurahamu. Nawe, mureenda okunyita, kwa okubha muraanga okwikirirya ganú ndabheehigirya. 38 Oni ndabhakeerya ganú naarora ku Taata, nawe, bheenyu murakora ganú eseweenyu yaabheehigirya.” 39 Bheeki bhakamukyukya ega, “Abhurahamu ngʼo taata!” Yeesu akabhakeerya ega, “Nyoore heene mukaabheeri abheebhurwa bha Abhurahamu, mukaakoreri ganú Abhurahamu yaaringa arakora. 40 Nawe, bhoono muratuna enjira ya okunyita, onyoora mbakeererye obhuheene bhunú neegwa okurwa ku Waryubha. Abhurahamu ataakora kya ego bheenyu mureenda okukora. 41 Amakorwa ganú bheenyu murakora, gararwa kwiseweenyu oundi.” Nho, bhakamukyukya ega, “Bheetu m-baana bhaaye bha heene. Waryubha omwenego ngʼo Taata!” 42 Yeesu akabhakyukya ega, “Nyoore Waryubha akaabheeri Eseweenyu, mukaanhanjiri, kwa okubha naarwa ku Waryubha, na bhoono ndingi hanu. Oni ntaaja kwa obhutungi bhwani, nawe, Waryubha ngʼo yaantuma. 43 Kwaki mutakumanya ganú ndabhakeerya? N-kwa okubha mutakwenda okwitegeerera amangʼana ganú ndabhakeerya. 44 Bheenyu m-ba Erisambwa, riyo ndyo eseweenyu! Kwa ego, mureenda okukora ganú eseweenyu areegomba. Erisambwa ni-riiti okwambira obhusimuka. Ritahanjiri obhuheene, kwa okubha obhuheene bhuyo, bhutarimo mumutima gwaryo. Ryeki riragamba obhubheehi, ngʼyo enteemo yaaryo, kwa okubha eryene ni-bheehi, kweki ndyo esewaabho obhubheehi bhonsego. 45 Nawe, kwa okubha oni ndabhakeerya obhuheene, kiyo nkyo kirakora mutakunyikirirya. 46 Niwi gati yeenyu unú aratura okwimiririra ega, oni m-mukori wa obhusarya? Nyoore ndabhakeerya obhuheene, kwaki mutakunyikirirya? 47 Omuntu wowonse unú aringi wa Waryubha, uyo areegwa amangʼana gaaye. Bheenyu mutakwigwa ganú Waryubha aragamba, kwa okubha mutaringi abhantu bhaaye.”
Yeesu m-mukuru okukira Abhurahamu
48 Abhayahudi bhakamubhuurya Yeesu ega, “Mbe, tutakugamba obhuheene, hanú turagamba ega, uuwe m-Musamaria, na ega, uuna ekihwi ekibhiibhi?” 49 Yeesu akabhakyukya ega, “Oni ntaana ekihwi ekibhiibhi. Oni ndamusuuka Taata, nawe, bheenyu muranjeera. 50 Oni ntakwenda okwigungya, nawe, ariho unú aratuna okungungya, kweki ngʼo aribha omubhuturi wa ekiina owa heene. 51 Ndabhakeerya obhuheene ega, omuntu wowonse unú aragwata ameehigiryo gaani, atarikwa kora orusiku rumwi.” 52 Mbe, Abhayahudi bhayo bhakamukeerya Yeesu ega, “Bhoono tumanyiri ega, uuwe uuna ekihwi ekibhiibhi! Abhurahamu yaakwa, na abharooti bhonse bhaakwa. Nawe, uuwe oragamba ega, ‘Omuntu wowonse unú aragwata ameehigiryo gaani, atarikwa kora orusiku rumwi.’ 53 Bhoono, oreekorya ega, uuwe m-mukuru okukira jaaji weetu Abhurahamu? Weeki yaakwa, na abharooti bhonse bhaakwa. Bhoono, uuwe oreekorya ega, niwi?” 54 Yeesu akabhakyukya ega, “Nyoore ndeegungye oni omwene, okwigungya kwani kutakubha na ensonga yoyonse. Nawe, Taata unú bheenyu muragamba ega, ngʼ-Waryubha weenyu, ngʼo arangungya. 55 Bheenyu mutamumanyiri, nawe, oni mmumanyiri. Nyoore nkaagambiri ega, ntamumanyiri, nkaabheeri omubheehi kya bheenyu. Nawe, oni mmumanyiri, kweki ndagwata ganú aragamba. 56 Eseweenyu Abhurahamu, yaajomerwa bhukongʼu okurora orusiku rwa okuuja kwani. Hanú yaarurora, akajomerwa bhukongʼu.”
57 Mbe, Abhayahudi bhakamubhuurya Yeesu ega, “Uuwe otarahikya emyaka mirongo etaanu. Wonse waarora Abhurahamu?” 58 Yeesu akabhakyukya ega, “Ndabhakeerya obhuheene ega, kora hanú Abhurahamu yaaringa atareebhurwa, oni ndiho.”i 59 Hanú Abhayahudi bheegwa gayo, bhakabhooja amagina, naho bhamuteme nago na okumwita.j Nawe, Yeesu akeebhisa, akeemuka murubhanja rwa erisyengerero erikuru.