Yeesu arahwenʼya omuhoku
9
Orusiku orumwi, hanú Yeesu yaaringa aragenda, akamurora omuntu oumwi unú yeebhurwa omuhoku. 2 Abheehigira bhaaye bhakamubhuurya ega, “Rabhi, omuntu unu yeebhurwa omuhoku kwa ekisigo kya obhusarya bhwawi? M-bwa omuntu unu omwene, kasi m-bwa abheebhuri bhaaye?” 3 Yeesu akabhakyukya ega, “Unu ataabha omuhoku okurekana na obhusarya bhwaye, kasi obhusarya bhwa abheebhuri bhaaye. Nawe, yeebhurwa omuhoku, naho obhuturo bhwa Waryubha bhumaahikane kubhantu okuhitira obhuhoru bhwa omuntu unu. 4 Tureenderwa okukora emirimu gya Waryubha unú yaantuma, eribhaga rikyari omubhasu. Obhutiku bhuraaja, bhunú tutaritura okukora emirimu giyo. 5 Eribhaga rinú nkyari mukyaro munu, oni ni-ndingaasi kubhantu bhonsego.”6 Hanú Yeesu yaamara okugamba amangʼana gayo, akatuuja amate hansi, akakonya obhutoto kwa amate, akahaka obhutoto kumeeso ga omuhoku uyo. 7 Kimwi akamukeerya omuhoku uyo ega, “Genda woogye obhusu bhwaho mwirambo rya Siroamu.” Siroamu, ensonga yaaye niiga, “Unú atumirwe.” Nho, omuhoku uyo akagya, akoogya obhusu, akahunjuka iika owaaye enu ararora bhujomu.
8 Mbe, abhamenyani bhaaye na abhandi bhanú bhaamuroranga arasabhiirirya, bhakabhuuranʼya ega, “Omuntu unu ti-unú yaaringa areekara arasabhiirirya?” 9 Abhandi bhakagamba ega, “Ngʼo.” Abhandi bhakagamba ega, “Ataringi weeki, nawe, arahunkana nawe bhukongʼu.” Nawe, weeki omwene akabhakeerya ega, “M-maheene, nooni.” 10 Nho, bhakamubhuurya ega, “Nyoore heene nuuwe, ameeso gaaho gaturiri egaki okurora?” 11 Wonse akabhakyukya ega, “Omuntu oumwi unú arabhirikirwa ega, Yeesu, atuujiri amate hansi, akonyeri obhutoto, amariri ahakiri kumeeso gaani. Kimwi yaankeerya ega, ‘Genda woogye obhusu bhwaho mwirambo rya Siroamu.’ Mbe, nkagya nkeeyogya obhusu, nkaamba okurora.” 12 Bheeki bhakamubhuurya ega, “Bhoono, omuntu uyo aringi-ha?” Wonse akabhakyukya ega, “Oni ntakumanya.”
Abhafarisaayo bharamubhuuririrya unú yaaringa omuhoku
13 Kimwi, bhakamuhira omuhoku uyo ku Bhafarisaayo. 14 Orusiku runú Yeesu yaakonya obhutoto kwa amate, na okumuhwenʼya omuhoku uyo, rwaringa orusiku rwa Esabhato. 15 Mbe, Abhafarisaayo bhonse bhakamubhuurya omuntu uyo kya ego yaatura okurora. Wonse akabhakyukya ega, “Omuntu oumwi yanhakiri obhutoto kumeeso gaani, neeyogya, na bhoono ndarora.” 16 Nho, Abhafarisaayo abhandi bhakagamba ega, “Omuntu unú yaakora ego, atakurwa ku Waryubha, kwa okubha atakugwata Esabhato.” Nawe, abhandi bhakagamba ega, “Bhoono, omukori wa obhusarya aratura okukora egaki ebhimanyiiriryo kya bhiyo?” Ego, bhakahabhana abheene kwa abheene. 17 Nho, Abhafarisaayo bhakamubhuurya kweki ega, “Omuntu unú akuhwenerye ameeso gaaho, oragamba-ki eguru yaaye?” Wonse akabhakyukya ega, “Oni ndarora ega, omuntu uyo, m-murooti wa Waryubha.”
18 Nawe, abhatungi bha Abhayahudi bhayo, bhateekirirya ega, omuntu unú ararora bhoonwego, yeebhurwa omuhoku. Kwa ego, bhakabhirikira abheebhuri bhaaye. 19 Bhakabhabhuurya ega, “Omuntu unu m-mwana weenyu? Na m-maheene ega, yeebhurwa omuhoku? Nyoore niigo, bhoono akoreri egaki aruuji?” 20 Nho, abheebhuri bhaaye, bhakabhakyukya ega, “Bheetu tumanyiri obhuheene ega, omwana unu ngʼ-weetu, yeebhurwa omuhoku. 21 Nawe, tutamanyiri kya ego yaatura okurora, kweki tutamumanyiri omuntu unú yaamuhwenʼya ameeso gaaye. Mumubhuurye omwene, kwa okubha m-muntu omukuru, aratura okugamba omwene.” 22 Abheebhuri bhaaye bhaagamba ego, kwa okubha bhaaringa bharoobhoha abhatungi bhayo. Abhatungi bha Abhayahudi bhayo, bhaaringa bheekirireenʼye ega, omuntu wowonse unú areekirirya ega, Yeesu ngʼo Kiristu Omutuurya, aryahurwa okurwa mumasinagogi gaabho. 23 Kiyo nkyo kyakora abheebhuri bhakagamba ega, “Mumubhuurye omwene, kwa okubha m-muntu omukuru.”
24 Mbe, abhatungi bha Abhayahudi bhakamubhirikira kweki omuntu unú yaaringa omuhoku, bhakamukeerya ega, “Orye emuuma ku Waryubha ega, oragamba obhuheene! Bheetu turamanya ega, omuntu unú yaakuhwenʼya, m-mukori wa obhusarya.” 25 Wonse akabhakyukya ega, “Oni ntakumanya nyoore omuntu uyo m-mukori wa obhusarya, nawe, mmanyiri ekintu ekimwi ego. Naaringa omuhoku, nawe bhoono, ndarora.” 26 Kimwi bhakamubhuurya ega, “Bhoono, omuntu uyo yaakukorera-ki? Yaahwenʼya egaki ameeso gaaho?” 27 Wonse akabhakyukya ega, “Mmariri okubhakeerya amangʼana gayo, nawe, muteegwiri. Kwaki mureenda mbakeerye kweki? Bhoono, na bheenyu mureenda okubha abheehigira bhaaye?” 28 Mbe, bheeki bhakamutuka ega, “Uuwe nuuwe omwihigira waaye! Nawe, bheetu turingi abheehigira bha Musa.a 29 Tumanyiri ega, Waryubha yaagamba na Musa, nawe, omuntu uyo, tutamanyiri enú yaarwira.” 30 Wonse akabhakyukya ega, “Oni ndaruguura bhukongʼu! Mutamanyiri enú yaarwira, nawe, uyo ngʼo yaahwenerye ameeso gaani! 31 Tumanyiri ega, Waryubha atakwigwa amasabho ga abhakori bha obhusarya, nawe, areegwa omuntu wowonse unú aramwigwa na okukora ganú Waryubha areenda.b 32 Okwambira obhusimuka, tutaakeegwiri kora rumwi ega, omuntu ahwenerye omuntu unú yeebhurwa omuhoku. 33 Nyoore omuntu uyo ataarwa ku Waryubha, atakaaturiri okukora gayo.” 34 Bheeki bhakamukyukya ega, “Uuwe weebhurwa na okurerwa kya omukori wa obhusarya. Bhoono, uuwe uuna obhutungi-ki bhwa okutwihigirya bheetu?” Mbe, bhakamukenyia muyo.
Obhuhoku bhwa mumutima
35 Hanú Yeesu yeegwa ega, omuntu uyo akenyiibhwe, akagya okumutuna. Hanú yaamunyoora, akamubhuurya ega, “Bhoono, oramwikirirya Omwana wa Adamu?” 36 Omuntu uyo akamukyukya ega, “Omukuru, unkeerye Omwana wa Adamu niwi, naho mbenga ndamwikirirya.” 37 Yeesu akamukeerya ega, “Uuwe waamara okumurora, kweki ngʼo unú arahaira na uuwe.” 38 Omuntu uyo akagamba ega, “Ndakwikirirya, Omukuru.” Kimwi, akamusyengera.
39 Mbe, Yeesu akagamba ega, “Oni naaja mukyaro munu okubhutura ekiina, naho abhahoku bharore, na bhanú bhararora, bhahoke.” 40 Nho, Abhafarisaayo abhandi bhanú bhaaringa hayo, hanú bheegwa amangʼana gayo, bhakamubhuurya ega, “Bhoono, oragamba ega, kora bheetu turingi abhahoku?” 41 Yeesu akabhakyukya ega, “Nyoore mukaabheeri abhahoku, mutakaabheeri abhakori bha obhusarya. Nawe, kwa okubha muragamba ega, murarora, kiyo nkyo kirakora muratama na obhusarya bhwenyu.”