Ekirengyo kya omuriisya wa heene
10
Yeesu akagendererya okugamba ega, “Ndabhakeerya obhuheene ega, omuntu wowonse unú atakusohera mukiita kya ekikooro kya amangʼondi, nawe, arasohera ahandi, uyo m-mwibhi. 2 Nawe, unú arasohera mukiita kya ekikooro, uyo m-muriisya wa amangʼondi. 3 Omwangarariri wa ekikooro aramusiikurira ekiita, na amangʼondi gareegwa eriisi ryaye. Omuriisya arabhirikira kira eringʼondi kwa eriina ryaryo na okugoorokerererya okugya kibhara. 4 Hanú aramara okuhurukya amangʼondi gaaye kibhara, arakangata embere, gonse garamuseeta, kwa okubha gamanyiri eriisi ryaye. 5 Amangʼondi gatakutura okumuseeta omugeni, nawe, garamungʼosa, kwa okubha gatamanyiri eriisi ryaye.” 6 Yeesu yaabhakeerya Abhafarisaayo ekirengyo kinu, nawe, bheeki bhataamanya ganú yaaringa arabhakeerya.7 Mbe, Yeesu akabhakeerya kweki ega, “Ndabhakeerya obhuheene ega, oni nooni ekiita kinú amangʼondi garahita-mo okusoha mukikooro. 8 Bhonsego bhanú bhaankangatira, bhaaringa abheebhi, nawe, amangʼondi gataabheetegeerera. 9 Oni nooni ekiita kiyo. Wowonse unú arasoha mukikooro okuhitira kuoni arituuribhwa, kweki aribha arasoha na okuhuruka, okugya okuriisya mukiriisyo ekijomu. 10 Omwibhi araaja mukikooro, naho yeebhe amangʼondi, na yeete na okusarya. Nawe, oni niijiri naho bhabhe na obhuhoru, kweki bhabhe nabho deke.
11 “Oni nooni omuriisya wa heene. Omuriisya wa heene, araruusya obhuhoru bhwaye, kurusumo rwa amangʼondi gaaye. 12 Omukori wa emirimu unú ataringi omuriisya wa amangʼondi na amangʼondi gataringi gaaye, hanú ararora ensuuji eraaja, arakenya na okutiga amangʼondi ageenego. Ensuuji eragagwata na okuganyaraganʼya. 13 Omukori wa emirimu uyo, arakenya, kwa okubha ataana obhururu na amangʼondi gayo.
14 “Oni nooni omuriisya wa heene. Mmanyiri bhujomu amangʼondi gaani, gonse gammanyiri, 15 kya ego Taata yaammanyiri oni, na oni nonse mmumanyiri. Oni ndaruusya obhuhoru bhwani kurusumo rwa amangʼondi gaani. 16 Oni niina amangʼondi agandi ganú gataringi ga mukikooro kinu, gayo gonse ndeenderwa ngareete. Geeki gariigwa eriisi ryani. Kimwi riribha erihijo rimwi, na omuriisya oumwi.
17 “Taata yaanhanjiri, kwa okubha ndaruusya obhuhoru bhwani, naho mbugege kweki. 18 Atariho omuntu unú aratura okunduusya obhuhoru bhwani. Nooni omwene ndaruusya obhuhoru bhwani. Niina obhutungi bhwa okuruusya obhuhoru bhwani, kweki niina obhutungi bhwa okugega obhuhoru bhwani. Taata omwene ngʼo yaantuma okukora ego.”
19 Hanú Abhayahudi bheegwa amangʼana gayo, bhakahabhana abheene kwa abheene. 20 Abhaaru gati yaabho, bhakagamba ega, “Unu yaana ekihwi ekibhiibhi! Kweki m-mujuuru! Kwaki muramwitegeerera?” 21 Nawe, abhandi bhakagamba ega, “Amangʼana gayo gatakurwa kumuntu unú yaana ekihwi ekibhiibhi. Bhoono, ekihwi ekibhiibhi kiratura okumukora omuhoku arore?”
Abhantu abhaaru bharamwanga Yeesu
22 Mbe, rikahika eribhaga rya enyangi ya Abhayahudi ya okuhiituka okuraamwa kwa erisyengerero rya Waryubha rya Yerusaremu.a Eribhaga riyo, ryaringa rya embeho. 23 Yeesu yaaringa aragenda murubhanja rwa erisyengerero, ahasi hanú harabhirikirwa ega, Eribharaja rya Soromoni. 24 Kimwi Abhayahudi abhandi bhakamwinaara, bhakamubhuurya ega, “Bhoono, oritunyankyanyankya mumitima gyetu okuhikira ruuha? Nyoore uuwe nuuwe Kiristu Omutuurya, otukeerye kubhurabhu.” 25 Nawe, Yeesu akabhakyukya ega, “Oni naamariri okubhakeerya ego, nawe, bheenyu mutakwikirirya. Ebhika bhinú ndakora, ndabhikora kwa obhutungi bhwa Taata, ngʼo aranyimiririra ega, oni niwi. 26 Nawe, mutakwenda okunyikirirya, kwa okubha bheenyu mutaringi amangʼondi gaani. 27 Amangʼondi gaani gareegwa eriisi ryani. Oni ngamanyiri, gonse garansoorana. 28 Oni ndagahaana obhuhoru bhwa koko, na gataribhura kora orusiku rumwi. Kora atariho omuntu unú aratura okugasaka okurwa mumabhoko gaani. 29 Taata yangʼeeri amangʼondi gayo, na weeki ngʼo omukuru okukira bhonsego. Kora atariho omuntu unú aratura okugasaka mumabhoko gaaye. 30 Oni na Taata turingi n-kintu kimwi.”
31 Hayo nho, Abhayahudi bhakabhooja amagina kweki, naho bhamuteme nago na okumwita. 32 Nawe, Yeesu akabhakeerya ega, “Mboorokeerye ebhika ebhyaru ebhijomu bhinú naakora kwa eginguru gya Taata. Ni-ringʼana-ki rinú rirabhakora bheenyu mureenda okuntema na amagina?” 33 Abhayahudi bhakakyukya ega, “Tutakwenda okukutema na amagina kwa ekisigo kya okukora amangʼana amajomu, nawe, kwa okubha oramutuka Waryubha. Kweki uuwe oreekorya ega, ngʼ-Waryubha, enú uuwe m-muntu kya abhantu abhandi!” 34 Yeesu akabhabhuurya ega, “Bhoono, etaangʼoorwa mumangʼoore geenyu ga amaragiriryo ega, Waryubha yaagamba ega, ‘Bheenyu n-kya Waryubha’?b 35 Engʼoorerwe mu Mangʼoore Amarabhu ega, abhantu bhanú bhaanyoora amangʼana ga Waryubha, Waryubha yaabhagamba ega, n-kya Waryubha. Na bheetu tumanyiri ega, ganú gaangʼoorwa mu Mangʼoore Amarabhu m-buheene. 36 Taata ngʼo yaansora na okuntuma mukyaro munu. Mbe bhoono, kwaki muragamba ega, oni ndamutuka Waryubha, hanú ndagamba ega, ‘Oni m-Mwana wa Waryubha’?c 37 Nyoore ntakukora emirimu gya Taata, mbe mutanyikirirya. 38 Nawe, nyoore ndakora emirimu gya Taata, kora nyoore mutakunyikirirya oni, mbe mwikirirye emirimu giyo. Nho, murimanya ega, Taata aringi munsi waani na oni ndingi munsi wa Taata.” 39 Hanú Abhayahudi bheegwa amangʼana gayo, bhakeenda okumugwata kweki, nawe, Yeesu akasurutuka mumabhoko gaabho.
40 Kimwi, Yeesu akagya kweki ngʼambu ya oruuji rwa Yorodani, akahika hanú Yoana yaabhatiijiranga abhantu kubhwambiro, akeekara eyo eginsiku nkego. 41 Abhantu abhaaru bhakamuseeta, bhakagamba ega, “Kora nyoore Yoana ataakora ekimanyiiriryo kora ekimwi, nawe, amangʼana gonsego ganú yaaringa aragamba eguru ya Yeesu, gaaringa ga obhuheene.” 42 Na abhantu abhaaru bhanú bhaaringa hayo, bhakamwikirirya Yeesu.