Oruku rwa Rajaaro
11
Yaaringa-ho omuntu oumwi unú yaabhirikirwanga ega, Rajaaro, yaaringa omurweri. Yaaringa areekara mukijiji kya Bhetania hamwi na abhahara bhaabho, Mariamu na Maarita. 2 Mariamu uyo, ngʼo yaamuhaka Omukuru Yeesu amaguta ganú gaabhirikirwanga ega, manemane na okumweya amaguru kwa egintuukya gyaye.a 3 Mbe, Mariamu na Maarita bhakatuma amangʼana ku Yeesu ega, “Omukuru, omusaani waaho Rajaaro m-murweri.” 4 Hanú Yeesu yeegwa amangʼana gayo, akagamba ega, “Obhurweri bhuyo, bhutaringi bhwa okumwita, nawe m-bwa okoorokya obhukuru bhwa Waryubha, naho Omwana wa Waryubha agungibhwe okuhitira obhurweri bhuyo.” 5 Yeesu yaaringa abhahanjiri bhukongʼu Maarita, Mariamu na Rajaaro. 6 Mbe, hanú Yeesu yeegwa ega, Rajaaro m-murweri, akagendererya okwikara ahasi hayo yaaringa eginsiku ebhiri.7 Hanú eginsiku giyo gyahwa, Yeesu akabhakeerya abheehigira bhaaye ega, “Tuhunjuke mukyaro kya Yudea.” 8 Abheehigira bhaaye bhakamukyukya ega, “Rabhi, m-bwangu hanu Abhayahudi bheendanga okukutema na amagina, naho bhakwite. Bhoono n-kwaki oreenda okugya eyo kweki?” 9 Yeesu akabhakyukya ega, “Bhoono, omubhasu gutaana amasaa ekumi na gabhiri? Nyoore omuntu aragenda omubhasu, atakutura okwikuujura okuguru kwaye kwa okubha endingaasi erangʼarabhira bhyonsego. 10 Nawe, unú aragenda obhutiku, areekuujura kwa okubha endingaasi ya okumungʼarabhira etariho.”b
11 Hanú Yeesu yaamara okugamba gayo, akagendererya okubhakeerya abheehigira bhaaye ega, “Omusaani weetu Rajaaro areeri, nawe, ndagya okumubhuukya.” 12 Mbe, abheehigira bhaaye bhakamukyukya ega, “Ee Omukuru, nyoore naareeri, arahwena.” 13 Hanu Yeesu yaaringa aragamba ega, Rajaaro akwiri, nawe, abheehigira bhaaye bhakeeganirirya ega, aragamba ega, areeri egintiro. 14 Kimwi, Yeesu akabhakeerya kubhurabhu ega, “Rajaaro akwiri. 15 Nawe, oni ndajomerwa ega, hanú Rajaaro yaakwiri ntaaringa-ho, naho bheenyu muture okunyikirirya. Mbe, tugende kumwene.” 16 Mbe, omwihigira oumwi eriina ryaye Tomaso unú yaabhirikirwanga ega, Ekisare, akabhakeerya abheehigira abharikyaye ega, “Na bheetu tugende, naho tukwe hamwi nawe.”
Yeesu yaana eginguru gya okuhyukya abhaku
17 Mbe, hanú Yeesu yaahika mukyaro kya Yudea mukijiji kya Bhetania, akanyoora Rajaaro amariri eginsiku ena mumbihira. 18 Omugi gwa Bhetania gwaringa muna egikirometa esatu ego okurwa Yerusaremu. 19 Abhayahudi abhaaru okurwa Yudea bhaaringa bhaajiri Bhetania okubhahorisya Maarita na Mariamu, kwa ekisigo kya oruku rwa Rajaaro omumura waabho.
20 Mbe, Maarita akeegwa ega, Yeesu araaja, akahuruka kibhara na okugya okumuturuungʼana, nawe, Mariamu akatigara munyumba. 21 Maarita hanú yaamunyoora Yeesu, akamukeerya ega, “Ee Omukuru, nyoore okaabheeri-ho, omumura weetu atakaakwiri. 22 Nawe, kora bhoono mmanyiri ega, kyokyonse kinú oraamusabhe Waryubha, arakuhaana.” 23 Kimwi, Yeesu akamukyukya ega, “Omumura weenyu araahyuke.” 24 Maarita akagamba ega, “Ee Omukuru, mmanyiri ega, Waryubha hanú aribhahyukya abhantu bhonsego kurusiku rwa okubhuturirwa ekiina, wonse arihyuka.” 25 Yeesu akamukyukya ega, “Oni nooni obhuhyuki bhuyo, kweki oni nooni obhuhoru. Omuntu wowonse unú aranyikirirya oni, kora nyoore akaakwa, aribha omuhoru. 26 Na wowonse unú aringi omuhoru na aranyikirirya oni, atarikwa kora orusiku rumwi. Bhoono, oreekirirya gayo?” 27 Maarita akamukyukya ega, “Maheene Omukuru, ndeekirirya ega, uuwe n-Kiristu Omutuurya,c Omwana wa Waryubha, unú yeenderwa okuuja mukyaro.”
Yeesu arakuura
28 Hanú Maarita yaamara okugamba gayo, akagya okumubhirikira Mariamu. Mbe, akamukeerya kabhejyo ega, “Omwihigirya aringi hanu, arakubhirikira.” 29 Hanú Mariamu yeegwa gayo, akeemuka bhwangu, akagya ku Yeesu. 30 Yeesu yaaringa akyari okusoha mukijiji kiyo, yaaringa hanú Maarita yaagya okumuturuungʼana. 31 Abhayahudi bhanú bhaamuhorisyanga Mariamu, hanú bhaarora areemuka bhwangu na okuhuruka kibhara, bhakamuseeta, kwa okubha bhaamanyanga ega, Mariamu aragya kumbihira, naho akuurire eyo.
32 Mbe, hanú Mariamu yaahika hanú Yeesu yaaringa, akamurora, akamutemera ebhiru, akamukeerya ega, “Ee Omukuru, nyoore okaabheeri-ho hanu, omumura weetu atakaakwiri.” 33 Hanú Yeesu yaamurora Mariamu arakuura na Abhayahudi bhanú yaajiri nabho bhonse bharakuura, akabhihirirwa bhukongʼu mumutima gwaye. 34 Mbe, akabhabhuurya ega, “Mumutuuriri-ha?” Bhakamukyukya ega, “Ee Omukuru, tugende tukoorokye.” 35 Yeesu akakuura. 36 Mbe, Abhayahudi bhanú bhaaringa bhaajiri muruku bhakagamba ega, “Maaha kya ego yaaringa amuhanjiri Rajaaro!” 37 Nawe, abhandi bhakagamba ega, “Omuntu unu ngʼo yaamuhwenʼya omuhoku, mbe kwaki ataakora ryoryonse ku Rajaaro, naho atakwa?”
Yeesu aramuhyukya Rajaaro
38 Hanú Yeesu yaaringa akyabhihiriirwe mumutima gwaye, akahika kumbihira. Embihira iyo, ryaringa erisana rinú bhaakundikirya na erigina erinene kumunwa. 39 Yeesu akabhakeerya abhantu bhanú bhaaringa-ho harya ega, “Muruusye-ho erigina riyo kumunwa.” Mbe, Maarita, unú yaaringa omuhara waabho Rajaaro, akamukyukya ega, “Ee Omukuru, bhoono aranyunka, kwa okubha gyahitiri eginsiku ena aringi mumbihira.” 40 Mbe, Yeesu akamukeerya ega, “Bhoono, ntaakukeerya ega, nyoore oreekirirya, oribhurora obhukuru bhwa Waryubha?”
41 Mbe, bhakariruusya-ho erigina rirya. Yeesu akamaaha murwire, akasabha ku Waryubha ega, “Ee Taata, ndakukumya kwa okubha wigwiri amasabho gaani. 42 Mmanyiri ega, oranyigwa eribhaga ryonsego, nawe, ndagamba ganu kwa ekisigo kya omuganda gwa abhantu bhanu, naho bheekirirye ega, nuuwe waantuma.” 43 Hanú Yeesu yaamara okugamba gayo, akagamba kwa eriisi erinene ega, “Rajaaro, njo kibhara enu!” 44 Mbe, unú yaaringa akwiri, akahuruka kibhara. Amaguru na amabhoko gaaye garingisiririibhwe ensanda, kweki yaaringa na ekitambaara kinú bhaamubhoha mubhusu. Mbe, Yeesu akabhakeerya abhantu bharya ega, “Mumusibhure ekitambaara kiyo, mumutige agende.”
Abhatungi bha Abhayahudi bharatuna//enjira ya okumwita Yeesu
45 Mbe, Abhayahudi abhaaru bhanú bhaaja okumurora Mariamu, hanú bhaarora ganú Yeesu yaakora, bhakamwikirirya. 46 Nawe, Abhayahudi abhandi bhakagya ku Bhafarisaayo na okubhakeerya ganú Yeesu yaakora. 47 Mbe, abhasyengeri abhakuru na Abhafarisaayo bhakabhirikira eribharaja erikuru ryabhod bhakabhuuranʼya ega, “Tukore egaki? Kwa okubha omuntu unu arakora ebhimanyiiriryo ebhyaru. 48 Nyoore turaamutige, naho akore ebhimanyiiriryo bhiyo, abhantu bhonsego bharaamwikirirye. Abharuumi bhariija na okusarya ekyaro kyetu na erisyengerero ryetu.”
49 Mbe, oumwi kubhakuru bharya eriina ryaye Kayafa, unú yaaringa omusyengeri omukurue wa omwaka guyo, akabhakeerya ega, “Bheenyu mutamanyiri engʼana yoyonse! 50 Bhoono, mutamanyiri ega, nyakara kubheenyu omuntu oumwi akwe kurusumo rwa abhantu bhonsego, okukira ekyaro kyonsego kisikibhwe?” 51 Kayafa ataagamba gayo kwa obhwendi bhwaye omwene. Nawe, kwa okubha yaaringa omusyengeri omukuru omwaka guyo, yaaroota ega, Yeesu arikwa kurusumo rwa ekyaro kya Abhayahudi. 52 Etaringi kurusumo rwa ekyaro kiyo ekyenego, nawe, abhakumanʼye abhaana bha Waryubha bhanú bhanyarageeni, bhabhe hamwi.
53 Mbe, okurwa orusiku ruyo, abhatungi bha Abhayahudi bhakaamba okutuna enjira ya okumwita Yeesu. 54 Kwa ekisigo kiyo, Yeesu akatiga okugenda aharabhu gati ya Abhayahudi. Nawe, akeemuka na okugya haangʼi na kukibhara, mumugi gunú gwabhirikirwanga ega, Efurahimu, akeekara eyo hamwi na abheehigira bhaaye.
55 Enyangi ya Epasakaf ya Abhayahudi yaaringa haangʼi. Mbe, abhantu abhaaru bhakeemuka okurwa mumigi gyabho okugya Yerusaremu, naho bheeraame.g 56 Mbe, bhakagendererya okumutuna Yeesu. Hanú bhaaringa bheemiriiri murubhanja rwa erisyengerero erikuru bhakabhuuranʼya ega, “Bheenyu muramaaha egaki? Bhoono, omuntu uyo atakuuja munyangi?” 57 Abhasyengeri abhakuru na Abhafarisaayo bhaaringa bhaamwiri ega, omuntu wowonse unú amanyiri enú Yeesu aringi, areete amangʼana, naho bhamugwate.