Yuda Esikariote areekirirya okumuriira Yeesu eniku
22
Enyangi ya emikaate ginú gitakutuurwa-mo ekimeraa yaaringa ehikiri haangʼi. Enyangi iyo yaabhirikirwanga Epasaka.b 2 Abhasyengeri abhakuru hamwi na abheehigirya bha amaragiriryo, bhaaringa bharatuna omweya gwa okwita Yeesu. Nawe, bhoobhohanga abhantu bhataaja okukora eriihe.c3 Mbe, Erisambwad rikamusoheerera Yuda Esikariote, unú yaaringa oumwi wa abheehigira bha Yeesu ekumi na bhabhiri. 4 Nho, Yuda akagya kubhasyengeri abhakuru na abhakuru bha abharindi bha mwisyengerero erikuru rya Waryubha. Hanú yaahika, akeekiriranʼya nabho kya ego yaakamuriire Yeesu eniku kubheeki. 5 Bhakajomerwa bhukongʼu, bhakeekiriranʼya okumuhaana egimbirya. 6 Yuda akeekirirya, akaamba okutuna omweya gwa okumukorera Yeesu eniku, eribhaga rinú abhantu abhaaru bhatariho.
Yeesu ararya ebhyakurya bhya Epasaka hamwi na abheehigira bhaaye
7 Orusiku rwa enyangi ya emikaate ginú gitakutuurwa-mo ekimera rukahika. Ruyo ndo rwaringa orusiku rwa okugooga omwana wa eringʼondi wa Epasaka.e 8 Yeesu akatuma Petero hamwi na Yoana, akabhakeerya ega, “Mugende mutuseemerye ebhyakurya bhya enyangi ya Epasaka, naho tuuje turye hamwi.” 9 Bhakamubhuurya ega, “Oreenda tuseemerye-ha?” 10 Akabhakyukya ega, “Hanú muraasohe mumugi gwa Yerusaremu, muraasikane na omusaaja umwi agegeri ensengo ya amanji, mumuseete okuhikira munyumba inú araasohe. 11 Mubhuurye omwene enyumba iyo ega, ‘Omwihigirya weetu arabhuurya ega, “Kiringi-ha ekinyumba kya abhageni kinú nakariire-mo ebhyakurya bhya Epasaka, hamwi na abheehigira bhaani?”’ 12 Wonse araabhoorokye ekinyumba ekinene munyumba ginú giikarireeni, muraanyoore-mo kira ekintu. Museemerye muyo.”
13 Mbe, abheehigira bhayo, bhakagya, bhakanyoora gonsego garingi kya ego Yeesu yaaringa abhakeererye, bhakaseemya ebhyakurya bhya enyangi ya Epasaka.
14 Eribhaga rya okurya hanú ryahika, Yeesu akeekara okurya ebhyakurya hamwi na abhatumwa bhaaye. 15 Akabhakeerya ega, “Naaringa nhanjiri bhukongʼu okurya ebhyakurya bhya Epasaka hamwi na bheenyu, nkyari okunyankibhwa! 16 Bhoono, ndabhakeerya ega, ntakyarya kweki ebhyakurya bhya Epasaka okuhikira ensonga ya Epasaka hanú orinyoora ebheeri mubhukama bhwa Waryubha.”
17 Akagega ekikombe kya edivai,f akamukumya Waryubha, akamara akabhakeerya ega, “Mugege, muguse bhonsego! 18 Ndabhakeerya ega, ndaamare okurya hanu, ntakyanywa kweki edivai, okuhikira obhukama bhwa Waryubha hanú bhuriija.”
19 Akamara akagega omukaate, akamukumya Waryubha, akagusuunura, akabhahaana abhatumwa bhaaye, akabhakeerya ega, [“Gunu ngo omubhiri gwani gunú gwakaruusibhwe kurusumo rwenyu. Mukorenga ego, kwa okunhiituka oni!”
20 Egoego, hanú bhaamara okurya ebhyakurya, akagega ekikombe kya edivai, akagamba ega, “Ekikombe kinu kireemiririra eriraganog erihya rinú rirakoreka okuhitira amanyinga gaani. Amanyinga ganu gakeetike kurusumo rwenyu.]h
21 “Nawe mumanye ega, unú yaakankorere eniku, nikeeri nawe hamwi kumeja. 22 Omwana wa Adamu aragya okwitwa kya ego yaaringa eseemiibhwe. Nawe, arikirora-ko omuntu unú arimuriira eniku!”
23 Mbe, abhatumwa bhaaye bhakaamba okubhuuranʼya ega, niwi gati yaabho yaakakore eringʼana riyo.
Ameehigiryo eguru ya obhukuru
24 Gikabha-ho eginhaka gati ya abhatumwa bha Yeesu, ega, niwi gati yaabho arabharwa ega, ngʼo omukuru okukira abharikyaye. 25 Eginhaka giyo, gikakora Yeesu abhakeerye ega, “Abhakama bha ebhyaro, bharabhandirirya abhantu bhaabho, enu bhareegungya ega, m-baserenʼya. 26 Nawe bheenyu, mutige okubha ego. Gati yeenyu omukuru okukira abhandi, ngʼo abhe omuke kubhonsego. Na kya ego aratunga, abhe muna ngʼo omukori wa emirimu. 27 Mbe! Niwi omukuru? Unú areekara kumeja okurya ebhyakurya, kasi unú arareeta ebhyakurya? Ndamanya ngʼo unú areekara okurya ebhyakurya. Nawe, oni ndingi gati weenyu hanu kya omukori wa emirimu weenyu.i
28 “Bheenyu mbo mwasanga hamwi na oni munyanko yaani. 29 Kya ego Taata yaangabhya obhukama, oni nonse ndabhagabhya obhukama. 30 Murirya na okunywa kunyangi ya obhukama bhwani, na okwikara kubhitumbi bhya ekikama, enu muribhuturira ekiina amakabhira ekumi na gabhiri ga Isiraeri.”j
Yeesu araruusya obhurooti ega, Simoni Petero yaakamwange
31 Yeesu akagamba ega, “Simoni, Simoni, itegeerera! Omanye ega, Erisambwa ryeendanga okubhaahura kya omuntu unú areerura obhuro. 32 Nawe nkusabhiiri ku Waryubha, naho eimani yaaho etasuuha. Na hanú orinhindira, wimye abharikyaho.” 33 Simoni akamukyukya ega, “Omukuru weetu, hanú oranyoora ndingi hamwi na uuwe, ndatura okugya okubhohwa mwigereja, kora okukwa hamwi na uuwe!” 34 Yeesu akakyukya ega, “Uuwe Simoni Petero! Ndakukeerya ega, reero eribhaga ensarigoko ekyari okuragura, wakabhe unyangiri mara kasatu ega, otammanyiri.”
Okwiseemya eribhaga rya engʼanga
35 Yeesu akabhuurya abheehigira bhaaye ega, “Hanú naabhatuma bira ensaho ya egimbirya kora ensakwa, na bira eginkeeto, mwasuuhirwa ekintu kyokyonse?” Bhakakyukya ega, “Tutaasuuhirwa.”k
36 Akabhakeerya ega, “Nawe okwambira bhoono, omuntu unú yaana ensaho ya egimbirya kasi ensakwa, abhigege. Na unú ataana empanga, agurye ekabhuuti yaaye, agure empanga. 37 Kwa okubha yaangʼoorwa ega, ‘Yaabharwa hamwi na abha obhusarya.’l Amangʼana ganu gaangʼoorwa eguru yaani. Ndabhakeerya ega, ereenderwa nkorerwe.”
38 Bhonse bhakamukeerya ega, “Omukuru weetu, rora! Hanú giriho egimpanga ebhiri.” Wonse akabhakyukya ega, “Tutige gayo!”
Yeesu arasabha Waryubha munkuku ya Emijeituni
39 Nho, Yeesu akarwa hayo, akagya munkuku ya Emijeituni, kya ego yaaringa anariri. Abheehigira bhaaye bhakamuseeta. 40 Hanú yaahika munkuku, akabhakeerya ega, “Musabhe Waryubha, naho mutaaja okusoha mumasakyo.”
41 Omwene akeeyahura hayo, akasuntara embere hake. Akeegama hansi, akasabha Waryubha ega, 42 “Taata, nyoore oreenda unduusirye-ho ekikombe kya enyanko kinu. Nawe, otakora kya ego oni ndeenda, okore kya ego uuwe oreenda.” 43 [Rumwigo, maraika okurwa murwire akamuujira, akamwijurya eginguru. 44 Wonse akagendererya okusabha Waryubha, kwa okubha yaaringa na obhururu obhwaru. Ebhigeri bhyaye bhikabha bhiratoonya hansi kya amatoonyekera ga amanyinga.]m
45 Hanú yaamara okusabha Waryubha, akeemirira, akabhahindira abheehigira bhaaye, akanyoora bheehiriibhwe, kwa okubha bhaaringa bhasurumbeeri. 46 Akabhabhuurya ega, “Ndeegwa mureeri? Mubhuuke! Musabhe Waryubha, mutaaja okusoha mumasakyo.”
Yeesu aragwatwa
47 Mbe, hanú Yeesu yaaringa akyagamba gayo, akaajirwa na omuganda gwa abhantu abhaaru. Na urya yaabhirikirwanga Yuda, oumwi wa abheehigira bhaaye ekumi na bhabhiri, yaaringa embere ya abhantu bhayo. Yuda akamusuntarira, akamuhumbata. 48 Yeesu akamubhuurya ega, “Uuwe Yuda! Oramukorera eniku Omwana wa Adamu kwa okumuhumbata?” 49 Abheehigira bhaaye, hanú bhaarora ganú garaakoreke, bhakamubhuurya ega, “Omukuru weetu, tubhageeje na egimpanga?” 50 Rumwigo, oumwi waabho akamutema omukori wa emirimu wa omusyengeri omukuru, akamungʼasura okutwi kwa obhuryo. 51 Yeesu akagamba ega, “Mutige! Eringʼana rinu rireesa!” Akakuunʼya okutwi kwa omuntu uyo, akamuhwenʼya.
52 Gati ya bhanú bhaaja okumugwata, bhaaringa-mo abhasyengeri abhakuru, na abhakuru bha abharindi bha mwisyengerero erikuru rya Waryubha, hamwi na abhakaruka bha Ekiyahudi. Yeesu akabhakeerya ega, “Bheenyu! Kwaki munseeteri na emihyu na egimuga, muna mooherye omwibhi? 53 Ndeegwa, eginsiku gyonsego twagosoryanga hamwi murubhanja rwa erisyengerero erikuru rya Waryubha, mutaankuunʼya! Nawe bhoono, eribhaga ryenyu rya obhutungi bhwa abhasarya, ndyo rinu.”
Petero aramwanga Yeesu
54 Rumwigo, abhantu bhayo bhakamuhurumukira, bhakamugwata, bhakamuhira okuhikira iika owa omusyengeri omukuru.n Petero akabharwa enyuma kwa hare. 55 Hanú bhaahika kubhoori bhwa enyumba, bhakaamba okukooma ekyoto, bhakeekara hamwi. Petero wonse, akeekara hamwi nabho. 56 Omukori wa emirimu oumwi wa ekikari, akamurora yeekeeri kubhurabhu bhwa omururo, akamwikomya, akagamba ega, “Omuntu unu, yaaringa hamwi na Yeesu!” 57 Nawe Petero akaanga, “Uuwe omukari, oni ntamumanyiri!” 58 Hakego, omuntu oundi akamurora Petero, akamubhuurya ega, “Uuwe wonse ngʼ-umwi waabho!” Nawe Petero akakyukya ega, “Mura uuwe! Ntaringi oni!” 59 Eribhaga rikahita muna ensa eimwi, omuntu oundi akakomererya ega, “M-maheene, omuntu unu yaaringa hamwi nawe, kwa okubha wonse m-Mugariraaya!” 60 Nawe Petero akakyukya ega, “Mura uuwe! Gayo oragamba, oni ntagamanyiri!” Atarahikya omunwa guyo ego, ensarigoko ekaragura. 61 Omukuru Yeesu akamwikyukirya, akamumaahirira Petero mumeeso. Rumwigo, Petero akahiituka amangʼana ganú Omukuru Yeesu yaaringa amariri okumukeerya ega, “Ensarigoko etaakaragure reero, okyari okunyanga mara kasatu ega, otamanyiri.” 62 Kimwi, Petero akahuruka kibhara, akakuura kwa obhururu bhukongʼu.
Abharindi bharamujabhura Yeesu
63 Abhasaaja bhanú bhaaringa bharaangararira Yeesu, bhakabha bharamujabhura na okumutema. 64 Bhakamuribha ameeso bhakamukeerya ega, “Rengererya niwi unú akutemeri? ” 65 Bhakagendererya okumutuka amatuki amaaru.
Yeesu arajongerwa embere ya eribharaja rya Abhayahudi
66 Hanú bhwakya, ekiikaro kya abhakaruka bha Ekiyahudi, hamwi na abhasyengeri abhakuru na abheehigirya bha amaragiriryo, kikeekumanʼya hamwi. Bhakamuhira Yeesu mwibharaja ryabho erikuru,o bhakamubhuurya ega, 67 “Nyoore uuwe nuuwe Kiristu Omutuurya,p otukeerye!” Yeesu akakyukya ega, “Kora nkaabhakeerya, muteekirirye. 68 Na ndaabhabhuurye eringʼana, mutaakyukye. 69 Nawe okurwa bhoono, Omwana wa Adamu aribha yeekeeri orubhaara rwa obhuryo rwa Waryubha owa eginguru gyonsego.”q 70 Bhonsego, bhakamubhuurya Yeesu kweki ega, “Nko okugamba uuwe m-Mwana wa Waryubha?”r Yeesu akakyukya ega, “M-beenyu muragamba ega, nooni.” 71 Bhakagamba ega, “M-bwimiririri-ki bhunú turatuna kweki? Ndeegwa twigwiri bheetu abheene okurwa mumunwa gwaye.”