Yeesu arabhoogya amaguru abheehigira bhaaye
13
Mbe, hanú enyangi ya Epasaka yaaringa ekyari okuhika, Yeesu akamanya ega, eribhaga ryaye rihikiri rya okwimuka mukyaro munu okugya kwi Esewaabho. Yeesu yaaringa abhahanjiri abhantu bhaaye bhanú bhaaringa mukyaro, kweki yaabhahanja okuhikira kubhuteero.2 Yeesu na abheehigira bhaaye bhakeekara okurya ebhyakurya bhya mugoroobha. Eribhaga riyo, Erisambwa ryaringa rimungʼeenereerye Yuda, omwana wa Simoni Esikariote, naho amuriire eniku Yeesu. 3 Yeesu yaaringa amanyiri ega, Taata yaamuhaana obhutungi bhwa okubhitunga ebhintu bhyonsego. Kweki yaaringa amanyiri ega, yaarwa ku Waryubha, na ega, arihunjuka ku Waryubha. 4 Mbe, hanú bhaaringa bhararya, Yeesu akeemirira, akaruusya enkanju yaaye, akagega etaahuro, akeesibhika mubhukende. 5 Kimwi akahuma amanji mwibhakuri, akaamba okubhoogya abheehigira bhaaye amaguru, na okubheeya na etaahuro inú yaaringa yeesibhikiri.
6 Hanú Yeesu yaamuhikiira Simoni Petero, Petero akamubhuurya ega, “Omukuru, bhoono oreenda okunyogya amaguru?” 7 Yeesu akamukyukya ega, “Uuwe otakumanya ganú ndakora bhoonwego, nawe, origamanya eribhaga erindi.” 8 Petero akamukyukya ega, “Otakutura kora orusiku rumwi, okunyogya amaguru gaani!” Yeesu akamukyukya ega, “Nyoore ntaakoogye uuwe, otakutura okubha hamwi na oni kweki.” 9 Simoni Petero akamukyukya ega, “Omukuru, nyoore niigo, otanyogya amaguru ageenego, nawe, kora na amabhoko gaani hamwi na omutwe gwani.” 10 Yeesu akamukyukya ega, “Omuntu unú yoogeri, atakwenderwa okooga kweki, nawe, okoogya amaguru okwenego. Uyo m-mungʼaru bhukongʼu. Na bheenyu m-bangʼaru, nawe, etaringi ega, m-bonsego.” 11 Yeesu yaaringa amumanyiri unú arimuriira eniku, nkyo kyakora akagamba ega, “Nawe, etaringi ega, m-bonsego.”
12 Hanú Yeesu yaamara okubhoogya abheehigira bhaaye amaguru, akeebhoha enkanju yaaye, akeekara kweki okurya ebhyakurya, akabhabhuurya ega, “Bhoono, mumanyiri ganú mbakoreeri bheenyu? 13 Bheenyu murambirikira oni ega, ‘Omwihigirya,’ kweki murambirikira ega, ‘Omukuru’. Muragamba obhuheene, kwa okubha oni m-Mwihigirya, na kweki m-Mukuru. 14 Mbe, nyoore oni unú m-Mukuru na Omwihigirya weenyu, mboogerye amaguru geenyu, bheenyu bhonse mureenderwa mooganʼye amaguru. 15 Mboorokeerye ekirengyo, naho na bheenyu bhonse mukorerane kya ego oni mbakoreeri. 16 Ndabhakeerya obhuheene ega, omugaya ataringi omukuru okukira omukuru waaye, kweki unú aratumwa ataringi omukuru okukira unú aramutuma. 17 Nyoore mugamanyiri gayo, mbe, Waryubha aribhanonka nyoore muragwata ekirengyo kinu.
18 “Ntakugamba ganu kurusumo rwenyu bhonsego. Mbamanyiri abhantu bhanú nsoreri okubha abheehigira bhaani. Nawe, ngambiri ganu, naho gakunaane ganú gaangʼoorwa mu Mangʼoore Amarabhu ega, ‘Omuntu unú yaaringa ararya ebhyakurya hamwi na oni, yeehunjwiri okubha omusigu waani.’a 19 Ndabhakeerya ganu gonsego eribhaga gatareebhuka, naho hanú gariibhuka, muriikirirya ega, ‘Oni Nooni.’b 20 Ndabhakeerya obhuheene ega, omuntu wowonse unú aramuturuungʼana unú mmutumiri, aranturuungʼana oni. Egoego, unú aranturuungʼana oni, aramuturuungʼana Taata unú yantumiri.”
Yeesu aragamba eguru ya unú arimuriira eniku
21 Hanú Yeesu yaamara okugamba gayo, akasurumbara bhukongʼu mumutima gwaye, akagamba aharabhu ega, “Ndabhakeerya obhuheene ega, oumwi gati yeenyu, yaakandiire eniku.” 22 Mbe, abheehigira bhaaye bhakaamba okumaahirirana, bhakaruguura, kwa okubha bhataamanya niwi unú Yeesu yaaringa aragamba. 23 Yaaringa-ho omwihigira oumwi, unú Yeesu yaaringa ahanjiri bhukongʼu. Weeki yaaringa yeekeeri haangʼi nawe. 24 Mbe, Simoni Petero akamusima omwihigira uyo, akamukeerya ega, “Mubhuurye Yeesu ega, aragamba eguru yawi gati yeetu.” 25 Mbe, omwihigira urya akeehegeka ku Yeesu, akamubhuurya ega, “Ee Omukuru, tukeerye niwi?” 26 Yeesu akamukyukya ega, “Ngʼ-unú nakahaane ekibhaara kya omukaate kinú nakatongye mukibhakuri.” Mbe, akagega ekibhaara kya omukaate akatongya mukibhakuri, akamuhaana Yuda, omwana wa Simoni Esikariote. 27 Yuda hanú yaamara okugega ekibhaara kiyo, Erisambwa rikamusoha. Kimwi, Yeesu akamukeerya ega, “Ganú oreenda okukora, gakore bhwangu!” 28 Nawe, atariho kora oumwi gati ya bhanú bhaaringa bhararya unú yaamanya ega, kwaki Yeesu amukeererye ego. 29 Kwa okubha Yuda ngʼo yaaringa arabhiika ensaho ya egimbirya, abhandi bhakeeganirirya ega, Yeesu amukeererye ega, agure bhinú bhireenderwa munyangi, kasi ega, abhahaane abhatobhu egimbirya. 30 Mbe, hanú Yuda yaagega ekibhaara kirya, rumwigo akahuruka kibhara. Eribhaga riyo, yaaringa obhutiku.
Yeesu arabhahaana abheehigira bhaaye eriragiriryo erihya
31 Mbe, hanú Yuda yaahuruka kibhara, Yeesu akabhakeerya abheehigira bhaaye ega, “Bhoono obhukuru bhwa Omwana wa Adamu bhuringi haangʼi okumaahikana kubhurabhu. Kweki bhurimaahikana kubhurabhu obhukuru bhwa Waryubha okuhitira kumakorwa ga Omwana wa Adamu. 32 Kya ego obhukuru bhwa Waryubha bhuramaahikana okuhitira kumakorwa ga Omwana wa Adamu, mbe Waryubha wonse aribhoorokya abhantu obhukuru bhwa Omwana wa Adamu, na arikora ego bhwangu.
33 “Bheenyu abhaana bhaani abhahanje, ndibha na bheenyu kwa eribhaga ekego. Murintuna, nawe, kya ego naaringa mbakeererye abhatungi bha Abhayahudi, egoego ndabhakeerya na bheenyu bhoono ega, ahasi enú ndagya oni, bheenyu mutakunagya okuuja-yo. 34 Ndabhahaana eriragiriryo erihya, ‘Muhanjane. Kya ego oni mbahanjiri bheenyu, egoego na bheenyu muhanjane.’ 35 Nyoore muraahanjane, mbe abhantu bhonsego bharimanya ega, bheenyu m-beehigira bhaani.”
Yeesu araruusya obhurooti ega, Petero yaakamwange
36 Mbe, Simoni Petero akamubhuurya Yeesu ega, “Omukuru, oragya-ha?” Yeesu akamukyukya ega, “Ndagya enú uuwe otakutura okunseeta bhoonwego, nawe, orinseeta eribhaga erindi.” 37 Petero akamubhuurya ega, “Ee Omukuru, kwa ekisigo-ki ntakutura okukuseeta bhoonwego? Oni ndikwa kurusumo rwaho!” 38 Yeesu akamukyukya ega, “Petero, m-maheene wiseemerye okukwa kurusumo rwani? Ndakukeerya obhuheene ega, eribhaga ensarigoko ekyari okuragura, wakabhe unyangiri mara kasatu.”