Enjira ya okugya ku Waryubha
14
Yeesu akagendererya okubheehigirya ega, “Mutakaasurumbara mumitima gyenyu, mumwikirirye Waryubha, kweki munyikirirye na oni. 2 Muuna emenyo owa Taata. Nyoore etakaabheeri ego, nkaabhakeererye. Kwa okubha ndagya okubhaseemerya emenyo. 3 Hanú ndimara okubhaseemerya emenyo, ndihunjuka kweki okubhagega, naho hanú ndingi, na bheenyu mubhe hayo. 4 Bheenyu, mumanyiri enjira ya okuhika enú ndagya.”5 Kimwi, Tomaso akamubhuurya Yeesu ega, “Ee Omukuru, bheetu tutamanyiri enú oragya. Bhoono, turatura egaki okumanya enjira?” 6 Yeesu akamukyukya ega, “Oni nooni enjira, na obhuheene, na obhuhoru. Atariho omuntu wowonse unú aratura okuuja ku Taata nyoore atarahitira kuoni. 7 Nyoore mukaamanyiri oni, mbe mukaabheeri mumumanyiri na Taata. Okwambira bhoonwego, mumumanyiri, kweki mumuruuji.”
8 Firipo akamukeerya ega, “Ee Omukuru, turakusabha otoorokye Taata, na riyo eryenego rireesa.” 9 Yeesu akamukyukya ega, “Firipo, neekara hamwi na bheenyu eribhaga eritambi, kora mukyari okumanya oni? Omuntu wowonse unú yaanduuji oni, amuruuji Taata. Bhoono, kwaki murambuurya ega, ‘Toorokye Taata?’ 10 Bhoono, otakwikirirya ega, oni ndingi munsi wa Taata, na Taata aringi munsi yaani? Amangʼana ganú ndabhakeerya gatakurwa mumeetegeerero gaani, nawe, Taata, unú aringi munsi waani, ngʼo arakora emirimu gyaye. 11 Mwikirirye ganú ndabhakeerya ega, oni ndingi munsi ya Taata, na Taata aringi munsi waani. Nawe, nyoore bheenyu mutakwikirirya gayo, mbe, mwikirirye kwa ekisigo kya emirimu ginú ndakora. 12 Ndabhakeerya obhuheene ega, omuntu wowonse unú aranyikirirya, emirimu ginú ndakora wonse arigikora. Kweki arikora emirito okukira ginú oni ndakora, kwa okubha ndagya ku Taata. 13 Nyoore murasabha ekintu kyokyonse kwa eriina ryani, ndikikora kya ego murasabha, naho obhukuru bhwa Taata bhumaahikane okuhitira ku Mwana waaye. 14 Nyoore muransabha ekintu kyokyonse kwa eriina ryani, ndikora kya ego murasabha.
Yeesu arahaira kweki eguru ya okuuja kwa Omutima Omurabhu
15 “Nyoore muraanhanje, muraagwate emigiro gyani. 16 Mbe, na oni ndimusabha Taata, wonse aribhahaana Omubheeri oundi,a naho abhe hamwi na bheenyu, eginsiku gyonsego. 17 Uyo ngʼo Omutima unú aribhatubhurira abhantu obhuheene. Abhantu bhanú bharamwanga Waryubha, bhatakutura okunyoora Omutima uyo, kwa okubha bhatakumurora, kweki bhatamumanyiri. Nawe, bheenyu mumanyiri Omutima uyo, kwa okubha areekara hamwi na bheenyu, kweki aribha munsi yeenyu.
18 “Ntaribhatiga bheenyu abheene kya abhataka, nawe ndiija kweki kubheenyu. 19 Rikyari eribhaga ekego ntarimaahikana kweki mukyaro kinu. Nawe, bheenyu murindora. Kwa okubha oni m-muhoru, na bheenyu muribha abhahoru. 20 Orusiku ruyo, murimanya ega, oni ndingi munsi wa Taata, na bheenyu muringi munsi waani, na oni ndingi munsi weenyu. 21 Omuntu wowonse unú aragwata emigiro gyani, uyo ngʼo yaanhanjiri. Na unú yaanhanjiri, Taata wonse aramuhanja. Na oni ndimuhanja na okwiyorokya kumwene.”
22 Mbe, omwihigira oumwi eriina ryaye Yuda, ataringi Yuda Esikariote, akamubhuurya Yeesu ega, “Ee Omukuru, eraturikana egaki okwiyorokya kubheetu, nawe, otakwiyorokya kubhantu abhandi bhonsego?” 23 Yeesu akamukyukya ega, “Omuntu wowonse akaanhanja, arigakora ganú naamukeerya. Taata arimuhanja, kweki oni na Taata turiija kumwene na okwikara hamwi nawe. 24 Nawe, omuntu wowonse unú atanhanjiri, atakukora ganú naamukeerya. Kweki, ganú ndabharagirirya gataringi gaani, nawe, gararwa ku Taata unú yaantuma kubheenyu.
25 “Mbakeererye gonsego gayo eribhaga nkyari hamwi na bheenyu. 26 Nawe, Omubheeri uyo, Omutima Omurabhu, unú Taata arituma kubheenyu kwa eriina ryani, aribheehigirya na okubhahiitukya gonsego ganú naaringa mbakeererye. 27 Hanú ndiimuka, ndibhatigira omurembe, omurembe gwani gunu ndabhahaana. Omurembe guyo gutaringi kya gunú gurarwa kubhantu bhanú bharamwanga Waryubha. Mutasurumbara mumitima gyenyu, kweki mutoobhoha kyokyonse. 28 Mwigwiri ganú ndabhakeerya ega, ‘Ndagya, nawe, ndiija kweki kubheenyu.’ Nyoore heene munhanjiri, mukaabheeri murajomerwa okwigwa ega, ndagya ku Taata, kwa okubha Taata m-mukuru okunkira oni.
29 “Mbakeererye gonsego gayo bhoonwego, eribhaga amangʼana gayo gakyari okumaahikana, naho hanú gariibhuka munyikirirye. 30 Ntakutura okugamba na bheenyu eribhaga eritambi, kwa okubha Erisambwa rinú riratunga mukyaro hanu riraaja. Nawe, ritaana obhuturo eguru yaani. 31 Ganú Taata yaandagirirya okukora, ngo ndakora, naho abhantu bhonsego bhamanye ega, nhanjiri Taata.
“Bhoono, mwimuke, turwe hanu.”