Yeesu aratuma abheehigira bhaaye ekumi na bhabhiri
9
Yeesu akabhirikira abhatumwa bhaaye ekumi na bhabhiri. Akabhahaana obhutungi na obhuturo bhwa okukenyia ebhihwi ebhibhiibhi bhyonsego okurwa kubhantu, na obhuturo bhwa okuhwenʼya amarweri. 2 Kimwi, akabhatuma bhagye okuraarikira abhantu amangʼana amajomu eguru ya obhukama bhwa Waryubha, na okuhwenʼya abharweri.3 Akabhakeerya ega, “Mutakaagega ekintu kurugendo rwenyu, mutakaagega egingʼimbo, kasi eginsakwa, ebhyakurya, kasi egimbirya, kora emyenda gya okuswenʼya.
4 “Ahasi hohonse hanú mwakasohe mumugi bhabhagenihye, mwikare muyomuyo, okuhikira hanú muriimuka ahasi hayo. 5 Na nyoore abhantu hayo bhataribhagenihya, murwe hayo, murakungʼunta oruteeri kumaguru geenyu, naho okoorokya ega, Waryubha abhaangiri.”
6 Mbe, bhakagya, bhakeenaara mubhijiji, bhararaarikira abhantu Amangʼana Amajomu ga Waryubha, na okuhwenʼya abharweri bha kira ahasi.
Herode Antipa aroobhoha
7 Omukama Herode Antipa akeegwa amangʼana gonsego ganú Yeesu yaaringa arakora. Akoobhoha bhukongʼu, kwa okubha, abhantu abhandi bhaaringa bharagamba ega, Yeesu ngʼo Yoana Omubhatiiji, ahyukiri okurwa mubhaku. 8 Abhandi bhaaringa bharagamba ega, ngʼo omurooti Eriya yaajiri kweki. Na abhandi, bhaaringa bharagamba ega, oumwi wa abharooti bha Waryubha bha kare ngʼo ahyukiri. 9 Nawe, Herode akagamba ega, “Yoana, naamubhutura omutwe! Bhoono, niwi unú ndeegwa amangʼana ga ebhika bhyaye?” Herode yaaringa na enamba ya okumurora Yeesu.
Yeesu arariisya abhantu okwambuka ebhiku bhitaanu
10 Abhatumwa bha Yeesu bhayo, hanú bhaahinda ku Yeesu, bhakamukeerya amangʼana gonsego ganú bhaakora. Akabhagega abhatumwa bhayo, bhakeemuka okugya mumugi gunú gwabhirikirwanga Bhetisaida. 11 Nawe, abhantu hanú bhaamanya enú agiiri, bhakamuseeta. Akabhagenihya, akaamba okubheehigirya amangʼana eguru ya obhukama bhwa Waryubha. Akabha arahwenʼya abharweri gati ya abhantu bhayo.
12 Na hanú yaahika kumugoroobha, eryubha rireenda okusikira, abhatumwa bhayo ekumi na bhabhiri bhakamugya-ko, bhakamukeerya ega, “Hanu turingi mwisisi. Mbe, obharage abhantu bhanu, bhagye mubhijiji bhinú bhiringi haangʼi na hanu, naho bhanyoore ahasi ha okuraara na aha okurya.”
13 Nawe, Yeesu akabhakeerya ega, “Bheenyu mubhahaane ebhyakurya!” Bhakamukyukya ega, “Bheetu tutaana ebhyakurya bhya okubheesa! Tuuna emikaate etaanu, na eginswi ebhiri egyenego. Oreenda tugende tubhagurire abhantu bhanu bhonsego ebhyakurya?” 14 Na abhantu bhanú bhaaringa hayo, abhasaaja abheenego, bhaaringa muna ebhiku bhitaanu.
Mbe, Yeesu akabhakeerya abheehigira bhaaye ega, “Mubhakeerye abhantu bheekare kumagari, kira erigari ribhe na abhantu mirongo etaanu.” 15 Bhakakora kya ego yaabharagirirya, bhakeekara bhonsego.
16 Yeesu akagega emikaate etaanu giyo, na eginswi ebhiri. Akamaahirira eguru murwire, akakumya Waryubha, akagisuunura, akahaana abheehigira bhaaye, naho bheeki bhahaane abhantu. 17 Bhonsego bhakarya, bhakeeguta. Hanú bhaamara okurya, abhatumwa bhakakumanʼya amasaagyo, gakeejurya ebhikapo ekumi na bhibhiri.
Petero areekirirya ega, Yeesu ngʼo Kiristu Omutuurya
18 Orusiku rumwi, Yeesu na abheehigira bhaaye, bhaaringa hamwi, kabhejyo. Yeesu yaaringa aramusabha Waryubha. Hanú yaamara, akabhabhuurya ega, “Abhantu bharagamba ega, nooni-wi?” 19 Bhakamukyukya ega, “Abhandi bharagamba ega, uuwe nuuwe Yoana Omubhatiiji. Abhandi bharagamba ega, uuwe nuuwe omurooti Eriya. Na abhandi bharagamba ega, uuwe ngʼ-umwi wa abharooti abhandi bha akare bha Waryubha unú waahyukiri.”
20 Yeesu akabhabhuurya ega, “Bhoono bheenyu, muragamba ega, nooni-wi?” Petero akamukyukya ega, “Uuwe nuuwe Kiristu Omutuurya.a Uuwe waatumwa na Waryubha!”
Yeesu arahaira eguru ya okukwa na okuhyuka kwaye
21 Yeesu akabhakemera bhatakaakeerya omuntu wowonse eringʼana riyo. 22 Akabhakeerya ega, “Omwana wa Adamu areenderwa anyankibhwe bhukongʼu. Yaangwe na abhakaruka bha Ekiyahudi, abhasyengeri abhakuru na abheehigirya bha amaragiriryo. Kubhuteero yeetwe, orusiku rwa kasatu okurwa okukwa kwaye, ahyuke.”
23 Hanú yaamara, akakeerya bhonsego ega, “Omuntu wowonse unú areenda okunsoorana oni, areenderwa yeeyange omwene,b na okugega omusarabha gwayec kira orusiku, nho yansoorane. 24 Omuntu wowonse unú areenda okuhonʼya obhuhoru bhwaye bhwa mukyaro munu, aribhubhurya obhuhoru bhwa koko. Nawe, omuntu unú araruusya obhuhoru bhwaye kurusumo rwani, arinyoora obhuhoru bhwa koko. 25 Omuntu arinyoora obhwera-ki, nyoore araanyoore ebhintu bhyonsego bhya ekyaro kinu, nawe, abhurirye obhuhoru bhwa koko?
26 “Wowonse unú arandorera eginsoni oni, na ameehigiryo gaani, uyo ngʼo oni Omwana wa Adamu wonse ndimurorera eginsoni, runú ndihunjuka okurwa murwire, na bhamaraika abharabhu, ndingi mubhukuru bhwani na mubhukuru bhwa Taata.
27 “Ndabhakeerya obhuheene ega, gatigati yeenyu bhanú mwimiriiri hanu, bhariho bhanú bhatarikwa, okuhikira hanú bharirora obhukama bhwa Waryubha!”
Obhukuru bhwa Yeesu bhuramaahikana kunkuku
28 Eribhaga rya eginsiku munaane, Yeesu hanú yaamara okugamba amangʼana gayo, akabhagega Petero, Yoana, na Yakobho, akagya akariina munkuku hamwi nabho, naho asabhe Waryubha.
29 Hanú yaahika munkuku, akaamba okumusabha Waryubha. Hanú yaasabhanga, obhusu bhwaye bhukeehunjura. Emyenda gyaye, gikabha emirabhu pee, gikangʼesangʼesa bhukongʼu.
30-31 Hayohayo, bhakamwibhukira abhasaaja bhabhiri bharangʼesangʼesa kya endingaasi. Bhayo bhaaringa abharooti bha akare Musad na Eriya, bhaaringa bharahaira na Yeesu. Bhakahairira kya ego arimara emirimu gyaye mukyaro, kwa okukwira mumugi gwa Yerusaremu.
32 Eribhaga riyo, Petero na abharikyaye, bhaaringa bheehiriibhwe bhukongʼu. Hanú bhaabhuuka, bhakamurora Yeesu arangʼesangʼesa kwa endingaasi yaaye. Bhakarora na abhasaaja abhabhiri bharya, bheemiriiri haangʼi nawe.
33 Musa na Eriya hanú bhaaringa bharagya, Petero akamukeerya Yeesu ega, “Uuwe, Omusuukwa weetu! M-bujomu bheetu tubhe hanu. Tuhagaaje hanu ebhihuuna bhisatu, ekimwi ekyaho, ekindi ekya Musa, na ekindi ekya Eriya.” Nawe, Petero ataaringa amanyiri kinú aragamba.
34 Petero hanú yaaringa akyagamba gayo, rikaaja erisaaru, rikabhakundikirya, bhakabha mukisunte. Abheehigira bhayo, hanú bhaakundikiribhwa na erisaaru riyo, bhakoobhoha bhukongʼu. 35 Bhakeegwa eriisi okurwa mwisaaru riyo, riragamba ega, “Unu ngʼo Omwana waani omumwemwe, unú naasora! Mumwigwenga weeki!”
36 Amangʼana gayo hanú gaahwa, abheehigira bhayo bhakarora Yeesu aringi omwenego. Gayo gonsego bhaarora hayo, bhataakeerya omuntu wowonse kuginsiku giyo.
Yeesu arahwenʼya omwana unú yaana ekihwi
37 Hanú bhwakya, Yeesu na abheehigira bhasatu bhayo, bhakeetuuma okurwa munkuku, bhakasikana na omuganda omunene gwa abhantu.
38 Rumwigo, omuntu umwi gati ya abhantu bhayo, akagamba kwa eriisi erinene, ega, “Uuwe Omwihigirya, ndakusabha, unhwenerye omwana waani, kwa okubha weeki m-mwana waani omumwemwe. 39 Ekihwi ekibhiibhi oranyoora kiramusoheerera, kiramukora arajiirira. Kweki, oranyoora kiramukora aragwa ekitwe, erihuro rirafukura mumunwa. Oranyoora kiramunyankya bhukongʼu, na kitakumutiga bhwangu. 40 Naabhakomereerye abheehigira bhaaho bhakikenyie, nawe bhataanagirye.”
41 Yeesu akagamba ega, “Bheenyu orwibhuro runú rutaana eimani, runú ruhabhiri! Ndiikara na bheenyu na okubheegumirirya okuhikira ruuha? Reeta omwana waaho hanu.”
42 Omwana uyo, hanú yaaringa araaja ku Yeesu, rumwigo ekihwi kiyo ekibhiibhi kikamugwisya hansi, kikamwimukya ekitwe. Nawe Yeesu akakikemera, akamuhwenʼya omwana uyo, akamuhindya kwisewaabho.
43 Abhantu bhonsego, hanú bhaarora obhuturo obhukuru bhwa Waryubha kya ego bhuringi, bhakaruguura bhukongʼu.
Yeesu arahaira kweki eguru ya okukwa kwaye
Abhantu bhayo bhonsego, bhaaringa bhararuguura ebhika bhyonsego bhya Yeesu. Yeesu akakeerya abheehigira bhaaye ega, 44 “Amangʼana ganú ndabhakeerya bhoonwego, mugeetegeerere bhujomu. Omwana wa Adamu aragya okutuurwa mumabhoko ga abhasarya.”
45 Nawe, amangʼana ganú Yeesu yaabhakeerya, bhataagamanya, kwa okubha amangʼana gayo gaaringa geebhisiri kubheene, bhatakaaturiri okumanya ensonga yaaye. Na bhakoobhoha okumubhuurya eguru ya amangʼana gaaye.
Niwi omukuru okukira bhonsego?
46 Gati ya abheehigira bha Yeesu, gikabha-ho eginhaka ega, niwi omukuru okukira abharikyaye.
47 Yeesu akamanya ameetegeerero gaabho. Kwa ego, akagega omwana omuke, akamwimirirya haangʼi nawe, 48 akabhakeerya ega, “Omuntu unú araamugenihye omwana kya unu, kwa eriina ryani, arangenihya oni. Na omuntu wowonse unú arangenihya oni, aramugenihya Waryubha unú yaantuma. Kwa okubha, omuke gati yeenyu bhonsego, uyo ngʼo omukuru okukira bhonsego.”
Omuntu unú atakumwanga Yeesu aringi obhumwi nawe
49 Yoana akakeerya Yeesu ega, “Uuwe Omusuukwa weetu, tumuruuji omuntu araruusya ebhihwi ebhibhiibhi kwa eriina ryaho. Tukamukaanʼya, kwa okubha weeki atakusoorana na bheetu.” 50 Yeesu akamukyukya ega, “Mutige okumukaanʼya kweki, kwa okubha omuntu unú atakubhaanga bheenyu, aringi obhumwi na bheenyu.”
Yeesu araangwa Samaria
51 Eribhaga rya Yeesu rya okuhinda murwire, ryaringa rihikiri haangʼi. Nho, yaamura okugya mumugi gwa Yerusaremu. 52 Mbe, akatuma abhachaama bhaaye bhamukangatire. Bhakagya, bhakasoha mukijiji kimwi kya Abhasamaria, naho bhamuseemerye obhuraaro na ebhintu ebhindi. 53 Nawe, abhantu bha hayo bhakaanga okumugenihya, kwa okubha yaaringa aragya Yerusaremu.e
54 Abheehigira bhaaye, Yakobho na Yoana, hanú bhaarora gayo, bhakamubhuurya ega, “Uuwe Omukuru weetu, oreenda tusabhe omururo gwike okurwa murwire gubhasikye [kya ego omurooti Eriya wonse yaakora]f?”g
55 Nawe Yeesu, akabheekyukirya, akabhakaanʼya [ega, “Bheenyu mutamanyiri muringi abhantu bha egaki. 56 Kwa okubha, Omwana wa Adamu ataajiri okusikya abhantu, nawe, okubhatuurya.”]h Bhakagya mukijiji ekindi.
Yeesu arahairira bhanú bhareenda okumusoorana
57 Eribhaga rinú Yeesu na abheehigira bhaaye, bhaaringa bharagenda kunjira, omuntu umwi akamukeerya ega, “Hohonse hanú oraagye, ndakusoorana!”
58 Yeesu wonse akamukyukya ega, “Ebhibhwe bhiina amasana na ebhinyonyi bhiina amasu, nawe, Omwana wa Adamu, ataana kora aha okuraarya omutwe gwaye!”
59 Yeesu akakeerya omuntu oundi ega, “Nsoorana!” Omuntu uyo akamukyukya ega, “Ee Omukuru, unyikiririrye ngende mbere okumubhiika taata.”
60 Nawe Yeesu akamukyukya ega, “Tiga abhaku bhabhiike abhaku bhaabho.i Nawe uuwe, genda oraarike eringʼana eguru ya obhukama bhwa Waryubha.”
61 Na omuntu oundi akakeerya Yeesu ega, “Uuwe Omukuru, ndakusoorana. Nawe mbere, unyikiririrye ngende ndage abhantu bha iika.”
62 Yeesu akamukeerya ega, “Omuntu wowonse araabhe kya omuntu unú yaambiri okugoomya, amare yeekyukye amaahirire enyuma, uyo atakwenderwa okubha omugaya kubhukama bhwa Waryubha.”