Yoona aramusabha Waryubha
2
Eribhaga Yoona yaaringa munda ya enswi iyo,
yaamusabha OMUKURU,
Waryubha waaye ega,
2 “Hanú naaringa munyanko,
naakusabha uuwe OMUKURU okantuurya.
Hanú naaringa haangʼi okukwa,
naakusabha uuwe okantuurya.
3 “Waanyesa munyanja gatigati mubhuribha,
omuyaga omuhaari na amabhooka bhikaanyinaara,
amabhooka amanene gakahita eguru waani.
4 Nkamanya ega,
unyahwiri ntabha haangʼi na uuwe.
Nawe m-buheene,
ndisoha kweki mwisyengerero ryaho erirabhu.
5 Amanji gaanyinaara,
na enyanja ekankundikirya,
nkabhurira-mo bhuri!
Ebhinete bhyeekumanʼya bhikakundikirya kumutwe.
6 Naasika hansi,
okuhikira mwiruuma rya obhwambiro bhwa eginkuku,
kukyaro kinú ebhiseku bhyakyo bhisiikirwe koko.
a
Nawe,
Ee!
OMUKURU,
Waryubha waani, unturirye okurwa muruku.
7 Nawe,
omooyo gwani hanú gwaringa gureenda okuhwa-mo,
naakusabha uuwe OMUKURU.
Na amasabho gaani gakakuhikiira mwisyengerero ryaho erirabhu.
8 Abhantu bhanú bharasyengera ebhisusano,
oranyoora bhareeyahura na obhuheene bhwaho abheene.
9 Nawe oni,
ndaaabhenga ndakwimbira ameembo ga okukugungya
na ndaabhenga ndakuruusirya ekimwenso.
Na ndakuriira emuuma,
kwa okubha obhutuurya bhurarwa kuuwe OMUKURU.”
10 Kimwi OMUKURU akaragirirya enswi iyo,
emuhongore Yoona kumurambo,
yonse ekakora ego.