Yoona
Yoona arasakya okumwibhisa Waryubha
1
Akare hayo,
yaaringa-ho omurooti umwi.
Omurooti uyo,
yaabhirikirwanga Yoona omwana wa Amitai.
Orusiku rumwi,
OMUKURUa yaamutumira amangʼana,
ega,
2 “Genda bhwangu mumugi omunene gunú gurabhirikirwa Ninaawi mukyaro kya Asiria,
okaanʼye abhantu bha mumugi guyo,
kwa okubha nduuji obhusarya obhwaru.”
3 Nawe Yoona ataagya eyo,
akagya mumugi gwa Tashishi,
naho okumwibhisa OMUKURU.
Hanú yaahika kukigobho kya Yoopa,
akanyoora obhwato bhureenda okwimuka okugya Tashishi.
Akariha egarama,
akariina mubhwato muyo.
Akagya Tashishi hamwi na abhakori bha emirimu bha mubhwato muyo,
naho amutoroke OMUKURU.
4 Mbe,
hanú bhaagyanga,
OMUKURU akatiimura omuyaga omuhaari munyanja,
enyanja ekasarika.
Kimwi,
amabhooka gakabhutematema obhwato bhuyo,
okuhikira bhukeenda okubhaaruka.
5 Abhakori bha emirimu bhayo,
bhakahaha bhukongʼu.
Mbe,
kira oumwi akaamba okumwisasaama omukuru waaye.
Hanú bhaarora ega,
amangʼana gakongʼeri,
bhakeesa emijigo gyonsego munyanja,
naho bhuhuhe.
Eribhaga riyo,
Yoona yaaringa asoheri gatigati wa obhwato,
areeri yeehiriibhwe.
6 Omugobhi wa obhwato bhuyo,
yaamuseeta,
akamukeerya kwa eriisi erinene ega,
“Uuwe okyareeri kwibhaga kya rinu?
Bhuuka!
Omusabhe omukuru waaho,
hamwi akaatwabhira tutasika.”
7 Kimwi,
abhakori bha emirimu bhayo,
bhakeekiriranʼya ega,
“Tuteme ekuura naho tumanye,
eringʼana rinu ritunyooreri kwa obhusarya bhwawi.”
Mbe,
bhakatema ekuura,
ekasora Yoona.
8 Ego,
bhakaamba okumubhuurya ega,
“Tukeerye n-kwaki eringʼana rinu ritunyooreri?
Uuwe orakora emirimu-ki?
Orwiriri-ha?
Oringi mwikabhira-ki?”
9 Yoona akabhakyukya ega,
“Oni m-Mwibhurania,
ndamwigwa OMUKURU,
Waryubha wa orwire,
Omubhumbi wa enyanja na ekyaro ekyomu.”
10 Akagendererya okubhakeerya ega,
“Ndamwibhisa OMUKURU.”
Abhakori bha emirimu bhayo,
hanú bheegwa ego,
bhakahaha bhukongʼu!
Bhakamubhuurya ega,
“Bhoono,
okoreri-ki kinu?”
11 Eribhaga riyo ryonsego bhaahairanga,
enyanja yaagendereryanga okusarika bhukongʼu.
Mbe,
bhakamubhuurya ega,
“Bhoono,
tukukore egaki,
naho enyanja etende?”
12 Yoona akabhakyukya ega,
“Mungege,
munyese munyanja,
nho eraatende.
Mmanyiri ega,
engʼanga inu,
ebhanyooreri kwa ekisigo kyani.”
13 Mbe,
abhakori bha emirimu bhayo,
bhakeekongʼererya okuruga obhwato bhwabho,
naho bhabhuhikye kumurambo.
Nawe bhataanagya,
kwa okubha enyanja yaagendereryanga okubhasarikira bhukongʼu.
14 Mbe,
bhakeesasaama OMUKURU ega,
“Ee OMUKURU,
Turakwisasaama,
otige okutusikya kwa okwita omuntu unu.
Kora otatubhuturira ekiina kwa okwitira amanyinga ga omuntu unú,
ataana obhusarya.
Okoreri kya ego uuwe omwene oreenda.”
15 Kimwi,
bhakamugega Yoona,
bhakamwesa munyanja.
Hayohayo,
enyanja ekateenda.
16 Hanú bhaarora ego,
bhakamoobhoha OMUKURU bhukongʼu.
Bhakamuruusirya ekimwenso na okumuriira emuuma ya okumukorera emirimu.
17 Nawe,
OMUKURU akatuma enswi enene bhukongʼu,
emumire Yoona.
Ekamumira,
akabha munda ya enswi iyo,
eginsiku esatu obhutiku na omubhasu.