Abhamura bhaabho Yusufu bharahunjuka Misiri
43
Eribhaga riyo,
enjara yaagendererya okubha enduru bhukongʼu mukyaro kya Kanaani.
2 Ebhyakurya bhinú abhaana bha Yakobho bhaagura Misiri hanú bhyahwa,
esewaabho akabhakeerya ega,
“Mugende kweki Misiri,
mutugurire ebhyakurya ebhindi.”
3 Nawe,
Yuda akakeerya esewaabho ega,
“Taata,
omutungi urya,
yaatukemera kwa okutukomererya ega,
‘Nyoore mutariija na omukokoti weenyu,
mutariija okumaahikana kweki mubhusu bhwani.’
4 Nyoore oreekirirye Bhenjamini agye na bheetu,
nho turaagye okukugurira ebhyakurya.
5 Nawe,
nyoore oteekirirye agye na bheetu,
kora bheetu bhonse tutakugya,
kwa okubha omutungi urya yaatukeerya ega,
‘Nyoore mutariija na omuke weenyu,
mutariija okumaahikana kweki mubhusu bhwani.’ ”
6 Yakobho akabhabhuurya ega,
“Kwaki mwansohya munyanko,
kwa okukeerya omuntu uyo ega,
muuna omumura weenyu oundi?”
7 Bhonse bhakamukyukya ega,
“Omuntu urya,
yaatubhuuririrya kwa obhungʼeeni bhukongʼu,
eguru yeetu na abhahiiri bheetu.
Yaatubhuurya ega,
‘Eseweenyu akyaringa omuhoru?
Muuna omumura weenyu oundi?’
Na bheetu twamukyukyanga okuringʼaana na kya ego yaatubhuuryanga.
Tukaamanyiri egaki ega,
araatubhuurye,
‘Mureete omumura weenyu’?”
8 Yuda akakeerya esewaabho ega,
“Nyikiririrya ngye nawe,
naho twimuke tugende okugura ebhyakurya,
tutariija okukwa na enjara,
hamwi na uuwe na abhaana bheetu.
9 Oni omwene ndibha omutungurya wa omwana waaho.
Nyoore ntarimuhunjukya kuuwe omwene omurore,
ndiija okubha na amasoro embere yaaho,
koko!
10 Uuja okunyoora tutabhurirye eribhaga ryonsego rinu,
tukaabheeri tumariri okugya na okuhunjuka kabhiri!”
11 Nho,
esewaabho akabhakeerya ega,
“Ambe!
Nyoore niigo,
mukore ega,
mutuure mumagunira geenyu emigeso emijomu gya mukyaro kyetu,
muhirire omukuru uyo,
bhibhe omutuho.
Mumuhirire obhuuki obhukego,
amaguta ga omusisi amakego,
ekurusu,
manemane,
amabhadamu na egiroji.
12 Mugege egimbirya mara kabhiri ya ginú gireenderwa,
kwa okubha murahindya girya gyatuurwa mumagunira geenyu,
hamwi gyebhekanibhwa.
13 Mugege na omukokoti weenyu,
muhunjuke bhwangu kumutungi uyo.
14 Waryubha wa Obhuturo bhonsego amukore omuntu uyo,
abhamaahire ekyabhira,
naho abhasiikurire omumura weenyu urya,
muhunjuke nawe hamwi na Bhenjamini.
Nyoore ndaakwirwe na abhaana bhaani,
nkwirwe.”
Abhamura bhaabho Yusufu bharahira Bhenjamini Misiri
15 Mbe,
abhaana bha Yakobho bhakagega emituho giyo,
hamwi na egimbirya mara kabhiri okukira gya okwamba,
bhakagya bhwangu Misiri hamwi na omumura waabho Bhenjamini.
Hanú bhaahika Misiri,
bhakeemirira embere ya Yusufu.
16 Yusufu hanú yaarora Bhenjamini aringi hamwi na abhamura bhaabho,
akakeerya omwangarariri wa enyumba yaaye ega,
“Hira abhageni bhanu iika owaani,
ogye ogooge entugo eimwi na oseemye bhujomu,
kwa okubha abhantu bhanu bhaakarye hamwi na oni ebhyakurya bhya omubhasu.”
17 Omwangarariri uyo,
akaamba okukora kya ego yaaringa akeeriibhwe,
akabhahira owa Yusufu.
18 Hanú bhaarora ega,
bhahirirwe owa Yusufu,
bhakabha na obhoobha.
Bhakeegambira abheene kwa abheene ega,
“Bhamure,
hamwi tureeterwe enu,
kwa ekisigo kya egimbirya ginú twahunjukiribhwa mumagunira geetu orwa mbere,
naho atujongere,
aturuusye egintikiri gyetu na okutukora abhagaya.”
19 Bhakasuntarira omwangarariri wa enyumba ya Yusufu mukiseku,
na okuhaira nawe,
bhakamukeerya ega,
20 “Ee omukuru,
hanú twaja orwa mbere,
ensonga yeetu yaaringa okugura ebhyakurya,
21 tukamara tukeemuka okugya iika.
Hanú twahika ahasi ha okuraara abhageni,
tukasibhura amagunira geetu,
twaruguura okunyoora egimbirya gya kira omuntu giringi mwigunira ryaye,
kya ego gyaringa,
na bhoono bheetu tugihunjukirye.
22 Tutamanyiri niwi yaatuura egimbirya giyo mumagunira geetu,
na tuujiri na egimbirya egindi,
okugurira ebhyakurya.”
23 Omwangarariri urya akabhakeerya ega,
“Mutoobhoha,
kwa okubha Waryubha weenyu,
Waryubha wa eseweenyu,
ngʼo yaatuura egimbirya giyo mumagunira geenyu.
Oni naagega amariho geenyu ga ebhyakurya.”
Nho,
akamusiikurira Simeoni na okumureeta kubhahiiri bhaaye.
24 Omwangarariri urya,
akabhasohya munyumba ya Yusufu,
akabhahaana amanji bhakoogya amaguru na okuhaana egintikiri gyabho ebhyakurya.
25 Bhonse bhakaseemya emituho gyabho gya okuhaana Yusufu kwibhaga rya omubhasu,
kwa okubha bheegwa ega,
bhaakarye nawe,
ebhyakurya bhya omubhasu.
26 Yusufu hanú yaahinda iika,
bhakamuhaana emituho ginú bhaaringa nagyo,
bhakatema hansi ebhiru,
bhakahiinya obhusu bhukahika hansi kwa okumusuuka.
27 Yusufu akabhakeeranʼya,
akamara akabhabhuurya ega,
“Eseweenyu,
omukaruka urya mwankeerya amangʼana eguru yaaye,
aragendererya egaki?
Akyaringa omuhoru?”
28 Bhakamukyukya ega,
“Omugaya waaho,
taata m-muhoru.”
Kimwi bhakatema hansi ebhiru,
bhakahiinya obhusu bhukahika hansi kwa okumusuuka.
29 Yusufu akatiirura ameeso gaaye,
akamurora Bhenjamini,
omuke waaye,
omwana wa ngʼina waabho,
akabhabhuurya ega,
“Unu ngʼo omukokoti weenyu unú mwankeerya amangʼana eguru yaaye?
Waryubha akunonke omwana waani.”
30 Yusufu akamurorera enamba omuke waaye,
ameesori gakabherebhenga,
akarwa hayo bhwangu,
akasoha mukinyumba kyaye akaamba okukuura.
31 Hanú yaamara okukuura,
akeehitya amanji mubhusu,
akahuruka,
akeegumirirya akagamba ega,
“Mureete ebhyakurya.”
32 Bhakamureetera ebhyakurya,
bhakamwihurira omwene hagari,
abhahiiri bhaaye bhonsego bhakeehurirwa abheene hagari,
na Abhamisiri bhonsego bhanú bhaaryanga hamwi nawe,
bhakeehurirwa abheene hagari.
Yaakorwa ego,
kwa okubha Abhamisiri bhataaringa bharasanga hamwi na Abhaebhurania.
33 Abhamura bhaabho Yusufu bhayo,
bhakeekaribhwa embere yaaye,
okwambira omutangi okuhikira omukokoti.
Bhakabha bheekeeri bharamaahirirana kwa okuruguura!
34 Bhakahaanwa ebhyakurya okurwa kumeja ya Yusufu,
nawe,
Bhenjamini yaahaanwa mara kataanu okukira ebhyakurya bhya kira oumwi.
Bhakanywa na okurehwa na Yusufu hamwi.