Abhamura bhaabho Yusufu bharagya Misiri
42
Mbe,
Yakobho akeegwa amangʼana ega,
ebhyakurya bhiringi Misiri,
akakeerya abhaana bhaaye ega,
“Ndora mwikeeri muramaahirirana?
2 Mwitegeerere!
Nigwiri ega,
ebhyakurya bhiratuuka Misiri,
mugende mugure ebhyakurya,
tutariija okukwa na enjara.”
3 Nho abhamura bhaabho Yusufu ekumi,
bhakagya Misiri okugura ebhyakurya.
4 Nawe,
Yakobho ataamwikiririrya Bhenjamini,
omuke wa Yusufu,
agye hamwi na abharikyaye,
kwa okubha yoobhohanga ega,
akaanyooreri enyanko.
5 Mbe,
hanú abhamura bha Yakobho bhaahika Misiri,
bhaaringa gati ya abhantu abhaaru bhanú bhaaringa bhagiiri okugura ebhyakurya,
kwa okubha ekyaro kya Kanaani kyonsego,
kyaringa na enjara.
Yusufu arasakya abhakuru bhaaye
6 Kwibhaga riyo,
Yusufu yaaringa omutungi omukuru wa Misiri.
Na ngʼo yaaguriryanga abhantu bhonsego ebhyakurya.
Abhamura bhaabho bhayo,
bhakamuseeta,
bhakatema hansi ebhiru,
bhakahiinya obhusu bhwabho bhukahika hansi.
7 Yusufu hanú yaabharora,
akabhamanya,
nawe akeekorya ega,
atabhamanyiri,
akahaira nabho kwa obhuhaari.
Akabhabhuurya ega,
“Bheenyu murwiriri-ha?”
Bhakamukyukya ega,
“Turwiriri Kanaani,
tuujiri okugura ebhyakurya.”
8 Onyoora Yusufu yaamanya abhamura bhaabho bhayo,
nawe,
bheeki bhataamumanya.
9 Nho akahiituka ebhirooto bhirya yaaringa arooteri eguru yaabho.
Kimwi akabhabhuurya ega,
“Bheenyu m-babhuririrya!
Muujiri okumanyiirirya ahasi hanú hataana obhwangarariri mukyaro kyetu.”
10 Bhakamukeerya ega,
“Omukuru weetu,
tiigo-ha!
Bheetu abhagaya bhaaho,
tuujiri okugura ebhyakurya.
11 Bheetu bhonsego m-baana bha omuntu umwi,
bheetu m-baheene,
bheetu abhagaya bhaaho,
tutaringi abhabhuuririrya.”
12 Nawe,
akabhakeerya ega,
“Tiigo-ha!
Muujiri okumanyiirirya ahasi hanú hataana obhwangarariri mukyaro kyetu.”
13 Bhakamukyukya ega,
“Bheetu abhagaya bhaaho,
turingi abhantu ekumi na bhabhiri,
abhaana bha omuntu umwi,
wa mukyaro kya Kanaani.
Omukokoti weetu atamiri na taata iika,
na omuke weetu oundi,
atariho.”
14 Nawe,
Yusufu akabhakeerya ega,
“N-kya ego mbakeererye ega,
bheenyu m-babhuririrya!
15 Muribhuurika kwa enjira inu,
mutakurwa hanú okuhikira omukokoti weenyu yaaje.
Ndateena kuriina rya omukama wa Misiri,
niigo eribha.
16 Mutume oumwi weenyu,
agye areete omuke weenyu,
abhandi bhonsego mutame mwigereja hanu.
Hayo nho amangʼana geenyu garibhuurika ega,
n-ga maheene.
Nyoore tiigo,
kuriina rya omukama wa Misiri,
bheenyu m-babhuririrya!”
17 Kwa ego,
akabhasiikira mwigereja kwa eribhaga rya eginsiku esatu.
18 Orusiku rwa kasatu,
Yusufu akabhakeerya ega,
“Kwa okubha oni ndamwigwa OMUKURU,
mukore kinú ndaabhakeerye,
naho muhone.
19 Nyoore bheenyu m-baheene,
oumwi weenyu atame mwigereja,
abhandi bhahire ebhyakurya kubhahiiri bheenyu bhanú bharanyanka na enjara.
20 Kimwi mureete omukokoti weenyu kuoni.
Kwa okukora ego,
nho obhuheene bhwa amangʼana geenyu,
bhuribhuurika na bheenyu mutariitwa.”
Bhonse bhakeekirirya okukora kya ego yaabhakeerya.
21 Kimwi bhakaragiriranʼya ega,
“Maheene bheetu,
twasarirya omuke weetu Yusufu.
Onyoora twarora kya ego yaaringa asurumbeeri,
hanú yaatukomereryanga okuhonʼya obhuhoru bhwaye,
nawe bheetu tutaamwitegeerera.
Kiyo nkyo kikoreri tunyooreri enyanko inu yonsego.”
22 Mbe,
Rubheni akabhakeerya ega,
“Ntaabhakeerya ega,
tutasarirya omuke weetu unu?
Nawe,
bheenyu mutaanyitegeerera!
Bhoono turajibhibhwa kurusumo rwa amanyinga gaaye.”
23 Bheeki,
bhataamanyanga ega,
Yusufu areegwa ganú bharagamba,
kwa okubha hanú yaahairanga nabho,
yaahunjurirwanga na omuhunjuri.
24 Kimwi Yusufu akagya embarika,
akakuura.
Hanú yaakira,
akahunjuka okuhaira nabho kweki.
Akaamura ega,
Simeoni agwatwe,
abhohwe na ebhirangʼani embere ya ameeso gaabho,
amare atuurwe mwigereja.
Abhamura bhaabho Yusufu bharahunjuka Kanaani
25 Mbe,
Yusufu akaamura ega,
abhagaya bhaaye,
bheejurye ebhyakurya mumagunira ga abhamura bhaabho,
na okuhunjukirya kira oumwi,
egimbirya gyaye mwigunira ryaye,
na okubhahaana ebhyakurya bhya okurya munjira.
Kimwi bhakakora gayo gonsego.
26 Abhamura bhaabho Yusufu,
bhakariinʼya ebhyakurya bhyabho kuntikiri gyabho,
bhakeemuka.
27 Bhakahika ahasi ha eginyumba gya okuraara abhageni,
oumwi waabho akasibhura erigunira ryaye,
naho ahaane entikiri yaaye ebhyakurya.
Akanyoora egimbirya gyaye gituurirwe mumunwa gwa erigunira ryaye.
28 Akakeerya abhamura bhaabho ega,
“Egimbirya gyani bhaginhunjukirye!
Murore n-ginu nginyooreri mwigunira ryani.”
Hanú bheegwa ego,
bhakatungʼaara.
Kira oumwi akamaahirira omurikyaye enu bhararigita na okubhuuranʼya ega,
“Ni-ngʼana-ki inú Waryubha atukoreeri?”
29 Mbe,
hanú bhaahika mukyaro kya Kanaani kwisewaabho,
bhakamutondera gonsego ganú gaabhanyoora.
30 Bhakamukeerya ega,
“Omukuru wa ekyaro kya Misiri yaaringa arahaira na bheetu kwa obhuhaari na okutwiganirirya ega,
turabhuririrya ekyaro kyabho.
31 Nawe bheetu,
tukamukeerya ega,
‘Bheetu m-bantu abhaheene,
tutaringi abhabhuuririrya.
32 Bheetu turingi ekumi na abhabhiri na m-baana bha omuntu umwi.
Omukokoti weetu yaatama iika kutaata,
na omurikyetu oundi atariho.’
33 “Nho omukuru wa ekyaro kya Misiri uyo,
akatukeerya ega,
‘Ndimanya ega,
bheenyu m-bantu abhaheene,
kwa okukora ega,
mutige omumura weenyu hanu,
abhandi mugende muhire ebhyakurya kubhahiiri bheenyu bhanú bharanyanka na enjara.
34 Kimwi mureete omukokoti weenyu uyo kuoni,
hayo nho ndimanya ega,
bheenyu mutaringi abhabhuuririrya,
nawe m-bantu abhaheene.
Nho ndihaatira omumura weenyu,
na bheenyu murinyoora omweya gwa okukora ebhyasara mukyaro kinu.’”
35 Mbe,
hanú bhaaringa bharahuma ebhyakurya okurwa mumagunira gaabho,
bhakaruguura okurora kira oumwi ahunjukiriibhwe egimbirya gyaye munsaho yaaye,
gituurirwe mwigunira ryaye.
Hanú abheene hamwi na esewaabho bhaarora ego,
bhonsego bhakoobhoha.
36 Yakobho akabhakeerya ega,
“Mungegeeri abhaana bhaani!
Yusufu atariho,
Simeoni atariho,
na Bhenjamini wonse,
mureenda okumugega,
kira eringʼana riranyoora oni!”
37 Nho Rubheni akakeerya esewaabho ega,
“Ngwatya oni Bhenjamini,
oni ndimwangarira na okumuhunjukya kuuwe.
Nyoore ntarimuhunjukya,
wite abhaana bhaani abhabhiri!”
38 Nawe,
esewaabho akamukyukya ega,
“Omwana waani atakugya na bheenyu,
omumura waabho yaamara okukwa,
unu ngʼo omwene yaatama.
Oni naamara okugota,
nyoore omwana waani arinyoorwa na amabhiibhi kurugendo,
murikora nsurumbare bhukongʼu okuhikira nkwe.”