Yusufu aroonjoora ebhirooto bhya abhabhohwa
40
Hanú amangʼana gayo gaahwa,
abheemiririri abhabhiri bha omukama wa Misiri,
bhakamusarirya omukama.
Abheemiririri bhayo bhaaringa omukarangi omukuru wa emikaate na omwimiririri omukuru wa ebhya okunywa.
2 Omukama akabhajimira abhaangarariri bhaaye bhayo,
3 akabhabhoha mwigereja,
munyumba ya omukuru wa abhasirikare,
munú Yusufu yaaringa abhoherwe.
4 Omukuru wa abhasirikare,
akabhagwatya ku Yusufu,
wonse akabhakorera emirimu.
Bhonse bhakabha mukibhohe kwa eribhaga nyabhurebhe.
5 Orusiku rumwi obhutiku,
omwimiririri wa ebhya okunywa na omukarangi wa emikaate,
bhakaroota ebhirooto,
na kira omuntu na ekirooto kyaye,
kyaringa na ensonga yaaye.
6 Nyenkyo wendeko,
Yusufu akagya okubharora,
akabhanyoora bhasurumbeeri.
7 Akabhabhuurya ega,
“Ndora reero obhusu bhwenyu bhusurumbeeri?”
8 Bhakamukyukya ega,
“Twarooteri ebhirooto,
nawe,
atariho unú aranagya okutonjoorera ebhirooto bhyetu.”
Yusufu akabhakeerya ega,
“Okoonjoora ebhirooto,
m-mirimu gya Waryubha.
Mbe bhoono,
munkeerye ebhirooto bhyenyu.”
9 Omwimiririri omukuru wa ebhya okunywa,
akamutondera ekirooto kyaye ega,
“Mukirooto kyani,
naaruuji omujabhibhu embere yaani,
10 gwaringa na amasagi gasatu.
Eribhaga ekego,
gukaamba okusebhuka,
gukatuura-ko obhuuja,
kimwi gukaama egijabhibhu ginú gitobheri.
11 Na mukubhoko kwani,
naaringa na ekikombe kya omukama,
nkagega egijabhibhu nkamitira mukikombe muyo,
nkamara nkahaana omukama mukubhoko kwaye.”
12 Yusufu akamukeerya ega,
“Ensonga ya ekirooto kyaho ngʼ-inu.
Amasagi agasatu garya ni-ginsiku esatu.
13 Hanú eginsiku esatu giraahwe,
omukama arikuruusya mwigereja na okukuhunjukya kumirimu gyaho kweki.
Oribhanga oramuhaana ekikombe mumabhoko gaaye,
kya ego waaringa orakora,
hanú waaringa omwimiririri waaye wa ebhya okunywa.
14 Nawe,
hanú amangʼana garikugiira bhujomu,
unhiituke na oni kwa okunkorera amajomu,
ndakusabha obhenga orangamba bhujomu kumukama,
naho oni nonse ndwe mwigereja munu.
15 Ndakusabha gayo,
kwa okubha,
oni naaruusibhwa mukyaro kya Abhaebhurania kwa eginguru,
kweki hanú ndingi ntaasarya ekintu kyokyonse kya okukora ntuurwe mwigereja.”
16 Omukarangi omukuru wa emikaate urya,
hanú yeegwa ensonga ya ekirooto kiyo ngʼ-ya amajomu,
wonse akakeerya Yusufu ega,
“Oni nonse naarooteri ega,
naaringa ngegeri kumutwe gwani,
eginhungo esatu gya emikaate.
17 Muruhungo rwa eguru,
bhyaringa-mo ebhyakurya amanga gonsego ebhya omukama.
Nawe,
ebhinyonyi bhyaringa bhirarya ebhyakurya bhinú naaringa ngegeri kumutwe gwani.”
18 Yusufu akamukeerya ega,
“Ensonga ya ekirooto kyaho ngʼ-inu.
Eginhungo esatu girya,
ni-ginsiku esatu.
19 Hanú eginsiku esatu giraahwe,
omukama arikuruusya mwigereja,
arikubhutura omutwe gwaho,
amare akusunge kumuti,
na ebhinyonyi bhirirya omubhiri gwaho.”
20 Mbe,
orusiku rwa kasatu,
rwaringa orusiku rwa okwibhurwa kwa omukama wa Misiri,
akakorera abhagaya bhaaye bhonsego enyangi.
Akabharuusya mukibhohe,
omwimiririri omukuru wa ebhya okunywa hamwi na omukarangi omukuru wa emikaate,
akabhatuura embere ya abhatungi bhaaye.
21 Kimwi akamuhunjukya omwimiririri omukuru wa ebhya okunywa kumirimu gyaye,
naho ature okuhaananga omukama ekikombe.
22 Nawe,
omukarangi wa emikaate weeki,
yeetwa akamara akasungwa kumuti,
kya ego Yusufu yaaringa abhoonjooreeri ebhirooto bhyabho.
23 Nawe,
omwimiririri omukuru wa ebhya okunywa uyo,
akamurabhirwa Yusufu,
ataamuhiituka kweki.