OMUKURU aramunonka Potifa okuhitira ku Yusufu
39
Abhaishimaeri bharya,
hanú bhakamuhikya Yusufu mukyaro kya Misiri,
bhaaringa bhamugurirye ku Potifa,
omutungi wa omukama wa Misiri.
Uyo yaaringa omukuru wa abharindi.
2 OMUKURU Waryubha akabha hamwi na Yusufu,
akanyeregeta bhukongʼu,
enu areekara munyumba ya omukuru waaye Omumisiri urya.
3 Potifa akarora kya ego OMUKURU aringi hamwi na Yusufu,
na ngʼo aramuhaana obhuturo bhwa okunyoora gonsego ganú yaakoranga.
4 Potifa akamuhanja bhukongʼu Yusufu,
na akamutuura okubha omwimiririri wa enyumba yaaye na ebhintu bhyaye bhyonsego.
5 Okurwa orusiku runú Potifa yaatuura Yusufu okubha omwimiririri wa enyumba yaaye,
na ebhintu bhyaye bhyonsego,
OMUKURU enyumba ya Omumisiri uyo,
okuhitira ku Yusufu.
Enonkwe ya OMUKURU,
ekabha kukira ekintu kinú yaaringa nakyo munyumba na mumigunda.
6 Kwa ego,
Potifa yaahaana Yusufu obhwimiririri eguru ya ebhintu bhyaye bhyonsego,
weeki omwene ateenyankya na gayo gonsego.
Eringʼana rinú yaaringa naryo,
ryaringa n-kusora ebhyakurya bhyaye ebhyenego.
Yusufu na omukari wa Potifa
Yusufu yaaringa omumura omujomu bhukongʼu.
7 Mbe,
hanú eginsiku nkego gyahita,
omukari wa Potifa akamuhanja Yusufu,
akamukeerya ega,
“Raara na oni!”
8 Nawe Yusufu akaanga.
Akamukeerya ega,
“Omukuru waani yaangʼaana obhwimiririri bhwa kira ekintu munyumba munu,
weeki atakunyanka kweki na ekintu kyokyonse.
9 Na iika hanu atariho omukuru oundi,
okunkira oni.
Weeki atankanʼya ekintu kyokyonse iika hanu,
nawe,
uuwe nuuwe yankanʼya,
kwa okubha uuwe m-mukari waaye.
Bhoono nintura egaki,
okukora obhusarya obhunene kya bhuyo,
mmusarirye Waryubha?”
10 Omukari uyo,
akabha aragendererya okungʼeenererya Yusufu eginsiku kwa eginsiku,
naho yeekirirye okuraara nawe.
Nawe Yusufu akabha araanga okumwitegeerera kora okuraara nawe.
11 Orusiku rumwi,
Yusufu akasoha munyumba ya Potifa,
naho akore emirimu gyaye kya ego yaaringa anariri.
Eribhaga riyo,
omukori wa emirimu wowonse ataaringa munyumba muyo.
12 Mbe,
omukari wa Potifa,
akeebhamba engibho ya Yusufu,
akamukeerya ega,
“Raara na oni!”
Nawe,
Yusufu akamutigira engibho iyo,
mumabhoko gaaye,
akakenyera kibhara.
13 Hanú yaarora ega,
Yusufu amutigiiri engibho mumabhoko gaaye,
na okukenyera kibhara,
14 akabhirikira abhakori bha emirimu abhandi bha owaaye,
akabhakeerya ega,
“Mumaahe omugaya wa Ekiebhurania unú twareeteerwe,
atukoreeri amangʼana ga eginsoni!
Asoheri mwani naho araare na oni.
Nawe naatema ekituri!
15 Hanú yeegwiri ndatema ekituri,
yaatiga engibho yaaye,
yaakenyera kibhara.”
16 Nho omukari uyo,
akabhiika engibho iyo,
okuhikira hanú omukuru waaye yaahunjuka iika.
17 Hanú yaahika,
akamutondera ega,
“Omugaya wa Ekiebhurania unú waatureetera,
asoheri mwani naho yaankorere amangʼana ga eginsoni.
18 Nawe,
hanú ntemeri ekituri,
yaatiga engibho yaaye,
yaakenya akahuruka kibhara!”
19 Hanú Potifa yeegwa amangʼana ganú omukari waaye yaamukeerya,
ega,
gayo ngo omugaya waaye amukoreeri,
akajima bhukongʼu.
20 Kwa ego,
akagwata Yusufu,
akamutuura mwigereja rinú abhabhohwa bha omukama,
bhaabhohwanga.
OMUKURU aramuserenʼya Yusufu mwigereja
21 Nawe,
OMUKURU yaaringa hamwi na Yusufu,
akamuserenʼya na okukora ahanjwe na omukuru wa erigereja.
22 Ego,
omukuru uyo,
akatuura Yusufu okubha omukuru wa abhabhohwa bhonsego mwigereja.
Na kira ekintu kinú kyakorekanga muyo,
kyakorekanga kwa obhwimiririri bhwaye.
23 Omukuru wa erigereja uyo,
hanú yaamara okuhaana Yusufu obhwimiririri bhwa kira ekintu,
weeki ateenyankya kweki na omurimu gogonse,
kwa okubha OMUKURU Waryubha yaaringa hamwi na Yusufu na ngʼo yaamuhaananga obhuturo bhwa okunyoora gonsego ganu yaakoranga.