Obhwambiro 37

Ebhirooto bhya Yusufu

Mbe, Yakobho yaagendererya okumenya mukyaro kya Kanaani, munú esewaabho yaaringa amenyeri kya omugeni. 2 Ganu ngo amangʼana ga abhamura bha Yakobho. Omwana waaye Yusufu, hanú yaaringa omumura wa emyaka ekumi na muhungati, yaaringa aragya okuriisya amahijo ga egimburi na amangʼondi. Yaagyanga hamwi na abhamura bhaabho, abhaana bha Bhiriha na Jiripa, abhakari bha esewaabho. Akabha arareetera esewaabho amangʼana eguru ya enteemo embiibhi ya abhamura bhaabho.

3 Yakobho akabha aramuhanja okukira abhaana bhaaye bhonsego, kwa okubha yaamwibhura agoteri bhukongʼu. Akamutumira enkanju enjomu. 4 Abhamura bhaabho hanú bhaarora ega, esewaabho amuhanjiri okubhakira, bhakamujimira na bhataahairanga nawe bhwaheene.

5 Orusiku rumwi obhutiku, Yusufu yaaroota ekirooto, nawe hanú yaatondera abhamura bhaabho, bhakoongerya okumujimira bhukongʼu. 6 Hanú yeenda okubhatondera ekirooto, akabhakeerya ega, “Mwitegeerere ekirooto kinú naarooteri. 7 Naarooteri ega, bheetu bhonsego twaringa mumugunda turabhoha emiseeri gya obhuro. Rumwigo, omuseeri gwani gukeemirira, emiseeri gyenyu gikagwinaara na okugwihiinyira.” 8 Abhamura bhaabho bhakamubhuurya ega, “Bhoono heene oritutunga bheetu? Kasi oribha na obhuturo okutukira bheetu?” Ekirooto na amangʼana gaaye gayo, gakakora bhakoongerya okumujimira bhukongʼu.

9 Yusufu akaroota ekirooto ekindi, akakeerya abhamura bhaabho ega, “Mwitegeerere, naarooteri ekirooto ekindi. Mukirooto kiyo, naaruuji eryubha, omweri na eginjota ekumi na eimwi, bhiranyihiinyira.” 10 Hanú yaatondera esewaabho na abhamura bhaabho ekirooto kiyo, esewaabho akamukemera, akamukeerya ega, “Nkirooto-ki kiyo? Maheene oni, ngʼina weenyu na abhamura bheenyu bhonsego turikutemera ebhiru, tukuhiinyire obhusu bhukahika hansi?” 11 Abhamura bhaabho bhayo, bhakamurorera orwango, nawe esewaabho akabha areeganirirya eguru ya ekirooto kiyo.

Yusufu araguribhwa na abhamura bhaabho

12 Orusiku rumwi, abhamura bhaabho Yusufu bhaagya okuriisya egintugo gya esewaabho, haangʼi na omugi gwa Shekemu. 13 Mbe, Yakobho akakeerya Yusufu ega, “Omanyiri ega, abhamura bheenyu bharariisya Shekemu erya. Bhoono ndeenda nkutume kubheene.” Yusufu akamukyukya ega, “Ntuma.” 14 Esewaabho akamukeerya ega, “Genda omaahe abhamura bheenyu na egintugo nyoore giringi bhwaheene. Omare uuje unkeerye.” Mbe, akamutuma okurwa mwiteka rya Hebhuroni.

Yusufu hanú yaahika haangʼi na Shekemu, 15 omuntu umwi akamunyoora, arataamataama mwisisi. Omuntu uyo, akamubhuurya ega, “Oratuna-ki?” 16 Wonse akamukyukya ega, “Ndatuna abhamura bheetu. Ndasabha unyorokye hanú bharariisirya.” 17 Omuntu uyo, akamukeerya ega, “Bharwiri hanu, nigwiri bharagamba ega, ‘Tugende Dotani.’” Nho, Yusufu akabhaseeta akabhanyoora Dotani eyo.

18 Abhamura bhaabho bhakamurora akyari ahare, bhakarya eniku ya okumwita. 19 Bhakaragiriranʼya ega, “Mumaahe omurooti wa ebhirooto ngʼ-urya araaja. 20 Bhoono, tugende tumwite, tumwese mwituko erimwi. Twakagambe ega, entyenyi emuriiri. Kimwi turore ebhirooto bhyaye bhiyo, bhiribha egaki!”

21 Nawe, Rubheni hanú yeegwa amangʼana gayo, akatuna enjira ya okumutuurya okurwa mumabhoko gaabho. Akagamba ega, “Tutamwita. 22 Muteetira amanyinga gaaye, mumwese mwituko rinu erya kukiribho kinu, nawe mutamukunʼya.” Yaagamba ego, kwa okubha yeendanga amutuurye okurwa mumabhoko gaabho, kimwi amuhunjukye kwisewaabho.

23 Mbe, hanú Yusufu yaabhahikiira, bhakamuruusya enkanju yaaye enjomu inú yaaringa yeebhoheri, 24 bhakamara bhakamwesa mwituko riyo, nawe erituko riyo ritaaringa na amanji. 25 Kimwi bhakeekara okurya ebhyakurya, bhakatiirura ameeso gaabho, bhakarora omuganda gwa Abhaishimaeri bhararwa Gireadi bharagya Misiri. Egingamia gyabho gyaringa gigegeri ekurusu, ejeeri na manemane. 26 Yuda akakeerya abhamura bhaabho ega, “Nyoore tureete omuke weetu na okwitira amanyinga gaaye, turanyoora obhwera-ki? 27 Nyakara tumugurye ku Bhaishimaeri bharya bharaaja. Nawe tutamwita, kwa okubha weeki m-mumura weetu na amanyinga gaaye n-gamwi na bheetu.” Abhamura bhaabho bhakeekiriranʼya nawe. 28 Abhaishimaeri abhakori bha ebhyasara bhayo, hanú bhaahika hayo, abhamura bhaabho Yusufu, bhakamuruusya mwituko, bhakamugurya kwa obhuguri bhwa ebhibhaara bhya ebhigera bhya egimbirya mirongo ebhiri. Abhaishimaeri bhayo, bhakagya nawe Misiri.

29 Eribhaga rya okumugurya Yusufu, Rubheni ataaringa-ho. Hanú yaahunjuka mwituko harya, ataamunyoora-mo, akeetakya okunyoora Yusufu atarimo! Hayohayo, akataamura emyenda gyaye kwa obhururu. 30 Kimwi akahunjuka kubhamura bhaabho, akabhakeerya ega, “Mwituko murya, Yusufu atarimo! Bhoono oni ningya-ha?” 31 Mbe, bhakagooga emburi, bhakagega enkanju ya Yusufu, bhakaitobheka mumanyinga. 32 Kimwi bhakaihira kwisewaabho. Hanú bhaahika bhakamukeerya ega, “Tubhoojeri enkanju inu. Iikomye bhwaheene, orore nyoore ngʼ-ya omwana waaho, kasi-ha.” 33 Esewaabho akaimanya, akagamba ega, “Enkanju inu, ngʼ-ya omwana waani! Entyenyi emuriiri. Heene, Yusufu atabhwirwe ebhibhaara ebhibhaara!” 34 Yakobho akataamura emyenda gyaye kwa obhururu, akeebhoha emyenda gya amagunira mubhukende na okukuurira omwana waaye kwa eginsiku njaaru. 35 Abhaana bhaaye bha ekimura na abha ekikari bhonsego, bhakagya okumukirya, nawe akaanga okukiribhwa. Akagamba ega, “Muntige, oni ndagendererya okufumbira omwana waani, okuhikira hanú ndikwa ngye enú aringi.” Ego, esewaabho akagendererya okumukuurira.

36 Hanú Abhaishimaeri bhaahika Misiri, bhakamugurya Yusufu kumuntu unú yaabhirikirwanga Potifa. Weeki ngʼo yaaringa omukuru wa abharindi bha omukama wa Misiri.