Waryubha arahikya eriragano ryaye ku Yakobho
35
Orusiku rumwi,
Waryubha yaakeerya Yakobho ega,
“Nooni Waryubha unú naakwibhukira eribhaga waaringa oramwibhisa omumura weenyu Esau.
Imuka ogende Bheteri,
omenye eyo,
na unhagaajire ahasi ha okumwensera.”
2 Mbe,
Yakobho akakeerya abhahiiri bhaaye hamwi na abhandi bhonsego bhanú yeekaranga nabho ega,
“Mwese ebhisusano bhyonsego bhya ekigeni bhinú muunabhyo.
Mwiraame na muruusye emyenda gyenyu,
mwibhohe egindi.
3 Nho,
turaagye Bheteri,
na oni ndimuhagaajira Waryubha ahasi ha okumwensera eyo,
kwa okubha ngʼo yaantuurya orusiku rwa enyanko yaani.
Na yaabheri hamwi na oni kira ahasi hanú ndagya.”
4 Bhonse bhakamuhaana ebhisusano bhya ekigeni bhyonsego bhinú bhaaringa nabhyo,
hamwi na ebhijingiji bhinú bhaaringa bheebhoheri kumatwi.
Wonse akabhisimbira hansi wa omuti gwa omwaroni,
haangʼi na omugi gwa Shekemu,
5 nho Yakobho na abhaana bhaaye bhakeemuka.
Hanú bhaaringa kurugendo,
Waryubha akabhoobhohya abhantu bha mumigi ginú gyaringa gibheenaariri,
kora bhataasakya okubhaseeta.
6 Kwa ego,
Yakobho hamwi na abhantu bhaaye bhonsego,
bhakahika Ruju,
mukyaro kya Kanaani.
Eriina erindi rya Ruju m-Beteri.
7 Hanú bhaahika hayo,
akahagaaja ahasi ha okumwensera,
akahatoga ega,
Eri-Bheteri,
a kwa okubha hayo nho Waryubha yaamwibhukira,
hanú yaaringa aramwibhisa omumura waabho Esau.
8 Eribhaga riyo,
omureri wa Rebheka,
unú yaabhirikirwanga Debhora,
yaakwa.
Akabhiikwa hansi wa omuti gwa omwaroni,
haangʼi na Bheteri.
Kwa ego,
Yakobho akatoga ahasi hayo ega,
Aroni-Bhakuti.b
9 Hanú yaahinda okurwa Padani-Aramu,
Waryubha akamwibhukira kweki,
na okumunonka,
10 aragamba ega,
“Eriina ryaho,
nuuwe Yakobho,
nawe otakubhirikirwa Yakobho kweki,
oraabhirikirwenga ega,
Isiraeri.”
Niigo Yakobho yaabhirikirwa Isiraeri.
11 Waryubha akagendererya okumunonka aragamba ega,
“Oni nooni Waryubha wa Obhuturo bhonsego.
Obhe na orwibhuro orwaru okukira hayo.
Okurwa murwibhuro rwaho,
riribhuka-mo erikabhira erinene,
na ebhyaro ebhyaru,
hamwi na abhakama.
12 Ekyaro kinú naahaana Abhurahamu na Esaaka,
ndikuhaana uuwe na hanú orirwa-ho,
ndikihaana orwibhuro rwaho.”
13 Hanú Waryubha yaamara okuhaira na Yakobho,
akamutiga hayo,
akagya eguru.
14 Kimwi,
Yakobho akeemirirya entimu ya erigina,
okumuhiitukya ega,
ahasi hayo,
nho Waryubha yaahaira nawe.
Akaitirira ekimwenso kya ekyokunywa na amaguta.
15 Kwa ego,
ahasi hayo,
Yakobho akahatoga ega,
Bheteri.
Raheri arakwa na okwibhura
16 Yakobho na abhantu bhaaye bhonsego,
bhakagendererya na orugendo rwabho okurwa Bheteri.
Hanú bhaaringa kunjira bhatarahika Efurata,
obhusungu obhuhaari bhwa okwibhura bhukaruma Raheri na okumunyankya.
17 Na eribhaga yaaringa akyarumwa obhusungu bhukongʼu,
omwibhurya waaye akamukeerya ega,
“Otoobhoha,
kwa okubha wibhwiri omwana oundi wa ekimura.”
18 Raheri hanú yaaringa ararwanira omooyo,
akatoga omwana uyo ega,
Bhenoni.
c Nawe,
esewaabho akamutoga Bhenjamini.d
19 Kimwi,
Raheri akakwa,
akabhiikwa kunjira inú eragya Efurata.
Efurata eginsiku ginu omugi guyo gurabhirikirwa Bhetereheemu.
20 Yakobho akeemirirya entimu ya erigina kumbihira ya Raheri okubha ekimanyiiriryo.
Entimu iyo,
eroorokya embihira ya Raheri okuhikira reero.
Abhaana bha Yakobho
21 Kimwi,
Yakobhoe akagendererya na orugendo rwaye,
na okuhagaaja amabhuru gaaye embere ya ekinsongyo kya Ederi.
22 Yakobho hanú yaaringa amenyeri hayo,
omwana waaye Rubheni akataara na Bhiriha omumeega wa esewaabho.
Esewaabho akeegwa amangʼana gayo.
Yakobho yaaringa na abhaana ekumi na abhabhiri.
23 Abhamura bha Reya bhaaringa,
Rubheni,
Simeoni,
Raawi,
Yuda,
Isakari na Jabhuroni.
Rubheni ngʼo yaaringa omutangi ku Yakobho.
24 Abhamura bha Raheri bhaaringa,
Yusufu na Bhenjamini.
25 Abhamura bha Bhiriha,
omugaya wa ekikari wa Raheri bhaaringa,
Daani na Nafutari.
26 Abhamura bha Jiripa,
omugaya wa ekikari wa Reya bhaaringa,
Gadi na Asheri.
Bhayo mbo bhaaringa abhamura bha Yakobho bhanú bheebhurirwa mukyaro kya Padani-Aramu.
Oruku rwa Esaaka
27 Yakobho akahunjuka Mamure,
kwi Esaaka esewaabho,
haangʼi na omugi gwa Kiriati-Aribha.
Kiriati-Aribha eginsiku ginu,
ngo Hebhuroni.
Hayo nho Abhurahamu na Esaaka bhaaringa bhamenyeri kya abhageni.
28 Esaaka yeekara emyaka egana rimwi na mirongo munaane.
29 Kimwi akakwa abheeri omukaruka wa emyaka emyaru,
akahimbana na bhajaaji waabho.
Abhaana bhaaye Esau na Yakobho bhakamubhiika.