Simeoni na Raawi bhararihira omuhara waabho ekisiiyomba
34
Orusiku rumwi,
Dina omuhara wa Yakobho na Reya,
yaagya okutaarira abhahara bha mukyaro kya Kanaani.
2 Amoori wa erikabhira rya Abhahibhi ngʼo yaaringa omutungi wa ekyaro kiyo,
Shekemu yaaringa omwana waaye.
Mbe,
Shekemu hanú yaarora omuhara uyo,
akamugwata akamutimba akamwatya,
akasarya obhuhara bhwaye.
3 Kimwi,
Shekemu akamujomererwa,
akamuhanja bhukongʼu,
akaamba okumwisasaama kwa amangʼana amajomu.
4 Kwa ego,
Shekemu akakeerya esewaabho ega,
“Taata,
ndakusabha undombere obhuko kumuhara unu,
abhe mukaani.”
5 Mbe,
Yakobho akanyoora amangʼana ega,
omuhara waaye,
atimbirwe na Shekemu.
Nawe kwa okubha abhaana bhaaye bhaaringa mukiriisyo,
akakira okuhikira hanú bhaahunjuka.
6 Amoori na omwana waaye Shekemu,
bhakagya okuhaira na Yakobho.
7 Kwibhaga riyo,
abhaana bha Yakobho bhakabha bharwiri okuriisya.
Hanú bheegwa kya ego Shekemu yaaringa akoreri,
bhakabhiihirwa na okujima bhukongʼu.
Bhaajima kwa okubha Shekemu yaaringa akoreeri Isiraeri,
eringʼana rya eginsoni.
Kweki eringʼana riyo,
ryaringa m-mugiro.
8 Nawe,
Amoori akabhakeerya ega,
“Omwana waani Shekemu ahanjiri bhukongʼu omuhara weenyu.
Ndabhakomererya,
mwikirirye amutete.
9 Mutige tutetanenga,
bheenyu mututetyenga abhahara bheenyu,
na bheetu tubhatetyenga abhahara bheetu.
10 Mumenye hamwi na bheetu,
na muraakorenga ekyaro kinu,
kya ego mureenda.
Na muraakorere munu ebhyasara,
munyoore ebhintu.”
11 Kimwi,
Shekemu wonse,
akakeerya esewaabho Dina na abhahiiri bhaaye ega,
“Bhamure!
Ndabhakomererya munyikiririrye!
Kyokyonse kinú muraagambe ndaruusya.
12 Munkeerye,
ebhintu na emituho,
kora nyoore bhikaabha ebhyaru bhukongʼu,
kyokyonse kinú muraagambe,
oni ndiruusya.
Ekinene n-kungʼana omuhara unu,
abhe mukaani.”
13 Mbe,
abhaana bha Yakobho,
bhakakyukya Shekemu na esewaabho Amoori kwa okubhangʼeenererya,
kwa okubha Shekemu yaaringa amariri okusarya omuhara waabho.
14 Bhakabhakeerya ega,
“Tutakutura okwikirirya eringʼana riyo.
Omuhara weetu tutakumutetya kumuntu unú atasaarirwe.
Okukora ego,
ni-ginsoni kubheetu.
15 Nawe,
tureekiriranʼye na bheenyu muraakore eringʼana rimwi.
Eringʼana riyo,
n-kubha kya bheetu,
kwa okusaara kira omusaaja gati yeenyu.
16 Hayo nho turaabhatetyenga abhahara bheetu,
na bheetu turaatetenga abhahara bheenyu.
Turaamenye hamwi na okubha abhamwi.
17 Nawe,
nyoore muraange okusaarwa,
turagega omuhara weetu twimuke.”
18 Mbe,
amangʼana gaabho gakajomera Amoori na omwana waaye Shekemu.
19 Omumura uyo Shekemu,
ataatigita okukora eringʼana riyo,
kwa okubha yaaringa ahanjiri bhukongʼu omuhara wa Yakobho.
Weeki yaaringa arasuukwa okukira bhonsego owaabho.
20 Mbe,
Amoori na omwana waaye uyo,
bhakagya mukiita kya omugi gwabho,
ahasi ha ebhiikaro,
bhakahaira na abhasaaja bha mumugi guyo ega,
21 “Abhantu bharya m-basaani bheetu.
Tubheekiririrye bhamenye mukyaro kyetu,
na bhakorere-mo ebhyasara,
kwa okubha ekyaro kinu n-kinene,
kireesa.
Turaatetenga abhahara bhaabho,
na bhonse bharaatetenga abhahara bheetu.
22 Nawe,
bheeki bhareekirirya okwikara na bheetu tubhe obhumwi,
kwa okukora eringʼana rimwi ego.
Eringʼana riyo,
n-kubha kya abheene kwa okusaara abhasaaja bhonsego gati yeetu.
23 Mutakurora ega,
egintugo gyabho na ebhintu bhyabho bhyonsego bhiribha bhyetu?
Bhoono,
twikiriranʼye nabho,
naho tumenye hamwi.”
24 Mbe,
abhasaaja bhonsego bhanú bhaaringa bheekumeenʼye mukiita hayo,
bhakeekiriranʼya na Amoori na Shekemu,
kwa ego,
bhakasaarwa.
25 Gikahita eginsiku esatu,
abhasambaya bhakyari na obhururu obhuhaari.
Nho abhaana abhabhiri bha Yakobho,
Simeoni na Raawi,
abhamura bhaabho Dina,
bhakabhanura amapanga gaabho,
bhakagya bhakatumbarira omugi guyo gunú gutaringa gwiseemerye kwa eriihe,
bhakeeta abhasaaja bhonsego chwe,
26 hamwi na Amoori na omwana waaye Shekemu.
Hanú bhaamara,
bhakagega omuhara waabho Dina,
okurwa munyumba ya Shekemu,
bhakagya nawe.
27 Kweki abhaana abhandi bha Yakobho bhakagya,
bhakanyoora abhasaaja bhonsego bheetirwe,
bhakagega ebhintu bhyonsego mumugi muyo,
kwa okubha,
omuhara waabho yaaringa atimbirwe.
28 Bhaagega amangʼondi,
egimburi,
egingʼombe,
egintikiri,
na kira ekintu kinú kyaringa mumugi muyo na mumigunda.
29 Bhaagega ebhintu bhyabho bhyonsego,
abhaana na abhakari bhaabho bhonsego,
na kira ekintu kinú kyaringa munyumba gyabho.
30 Mbe,
hanú Yakobho yaarora ego,
akakeerya Simeoni na Raawi ega,
“Bhamure!
Bheenyu munkoreeri enyanko enene.
Bhoono ndaakorerwe ekisorooro na abhamenyi bha mukyaro kinu,
ekya Abhakanaani na Abhaperiji.
Na oni ntaana abhantu abhaaru,
nyoore bhareekumanʼye hamwi na okundwanʼya,
oni ndisikibhwa hamwi na abhantu bhaani bhonsego!”
31 Nawe,
bhakamukyukya ega,
“Bhoono yaakora bhujomu okukora omuhara weetu kya omusimbe?”