Yakobho arasikana na Esau
33
Kimwi,
Yakobho akatiirura ameeso gaaye,
akarora Esau araaja hamwi na abhantu magana gane.
Hanú yaabharora,
akagabha abhaana bhaaye ku Reya,
Raheri na kubhagaya abhabhiri bharya Jiripa na Bhiriha.
2 Akakangatya embere abhagaya bhayo,
na abhaana bhaabho,
akaaja Reya na abhaana bhaaye,
na enyuma waabho,
akaaja Raheri na omwana waaye Yusufu,
bhakamariisya.
3 Kimwi,
Yakobho omwene akakangata embere,
akabhanga aratema ebhiru,
arahiinya obhusu bhukahika hansi,
mara muhungati kwa okumusuuka,
okuhika hanú yaasuntarira omumura waabho.
4 Nawe,
Esau akamukenyerera okumuturuungʼana.
Hanú yaahika,
akamuhumbata kwa okumugwata mwigoti,
bhonsego bhabhiri bhakakuura.
5 Esau akatiirura ameeso,
akarora abhakari na abhaana bharya,
kimwi akamubhuurya ega,
“M-bawi bhanu uunabho hamwi?”
Yakobho akamukyukya ega,
“Bhanu m-baana bhanú Waryubha yaangʼaana oni omugaya waaho kwa eriruguto ryaye.”
6 Nho,
abhagaya bha ekikari bharya,
hamwi na abhaana bhaabho,
bhakamusuntarira haangʼi,
bhakeehiinya kwa okumusuuka.
7 Reya wonse na abhaana bhaaye,
bhakasuntara,
bhakeehiinya.
Raheri na omwana waaye Yusufu bhonse,
bhakasuntara bhakeehiinya.
8 Esau akabhuurya ega,
“Ensonga yaaho niki,
eguru ya amahijo gonsego ganú nsikeeni nago kunjira?”
Yakobho akamukyukya ega,
“Amahijo gayo,
m-mutuho gwaho omukuru waani,
naho unyikirirye.”
9 Nawe,
Esau akagamba ega,
“Omumura weetu,
niina ebhintu bhya okunyisa.
Ebhintu bhyaho,
bhibhe bhyaho omwene.”
10 Wonse akamukyukya ega,
“Tiigo-ha!
Nyoore heene unyikiririrye,
ndakusabha ogege omutuho gwani.
Maheene okurora obhusu bhwaho,
n-kya okurora obhusu bhwa Waryubha kwa okubha unturungʼeni bhujomu.
11 Ndakusabha ogege omutuho gwani gunú nkutumiiri,
kwa okubha Waryubha yannonkeri na niina ebhintu ebhyaru.”
Ego,
niigo Yakobho yaamukomererya Esau,
okuhikira akagega omutuho gwaye.
12 Kimwi,
Esau akamukeerya ega,
“Bhoono tugendererye na orugendo rwetu,
na oni nkukangatire.”
13 Nawe,
Yakobho akamukyukya ega,
“Omukuru waani,
omanyiri ega,
abhaana bhanu m-barera.
Na egingʼombe na amangʼondi ginú niinagyo giraneenʼya.
Nyoore giraasendwe bhwangubhwangu kwa orusiku rumwi,
girakwa chwe.
14 Kwa ego,
ndakusabha okangate omukuru waani,
oni omugaya waaho ndaaja ngʼorangʼora okuringʼaana na orugendo rwa egintugo na abhaana,
okuhikira runú ndikuhikiira mukyaro kya Seiri.”
15 Esau wonse akamukeerya ega,
“Nyakara nkutigire abhantu bhaani abhandi.”
Nawe,
Yakobho akamubhuurya ega,
“Kwaki okore ego?
Okunyikirirya okwenego kureesa,
omukuru waani.”
16 Mbe,
orusiku ruyoruyo,
Esau akaamba orugendo okuhunjuka Seiri.
17 Nawe,
Yakobho akagya Sukoti.
Eyo,
akahagaaja enyumba na ebhihuuna bhya egintugo gyaye.
Nkyo kirakora ahasi hayo,
hakatogwa Sukoti.a
18 Hanú Yakobho yeebhisa Rabhani okurwa Padani-Aramu,
yaahika bhwaheene mumugi gwa Shekemu,
mukyaro kya Kanaani.
Hanú yaahika,
akeemirirya amabhuru gaaye haangʼi na omugi guyo.
19 Akagura ahasi hayo yaaringa yeemirirye amabhuru,
kwa ebhigera bhya egimbirya egana rimwi,
okurwa kubhaana bha Amoori,
esewaabho Shekemu.
20 Akahagaaja ahasi hayo,
ahasi ha okumwensera,
akahatoga ega,
Eri-Erohe-Isiraeri.b