Obhwambiro 32

Yakobho areeseemya okusikana na Esau

Yakobho akagendererya na orugendo rwaye. Hanú yaaringa kunjira, akeebhukirwa na bhamaraika bha Waryubha. 2 Yakobho hanú yaabharora, akagamba ega, “Bhanu m-basirikare bha Waryubha!” Kwa ego, ahasi hayo akahatoga ega, Mahanayimu.

3 Yakobho akatuma abhachaama bhaaye, bhamukangatire okugya kumumura waabho Esau unú yaaringa Seiri mukyaro kya Edomu. 4 Akabharagirirya ega, “Mukeerye omukuru waani Esau ega, ‘Omugaya waaho Yakobho, aragamba ega, “Nekeeri mubhugeni owa Rabhani, naatigita okuhikira bhwangu hanu. 5 Niina egingʼombe, egintikiri, amangʼondi, egimburi, na abhagaya bha ekisaaja na abha ekikari. Bhoono, nkutumiiri abhachaama bhakuhaane amangʼana, eguru ya orugendo rwani, naho unyikirirye.”’”

6 Abhachaama bhayo bhakagya, bhakamara bhakahunjuka ku Yakobho, bhakamukeerya ega, “Twagya okumaahana na omumura weenyu Esau. Bhoono araaja okukuturungʼana hamwi na abhantu magana gane.” 7 Yakobho hanú yeegwa ego, akoobhoha bhukongʼu na okusurumbara. Akagabha abhantu bhanú yaaringa nabho, hamwi na amangʼondi, egimburi, egingʼombe na egingamia, naho bhibhe amahijo gabhiri. 8 Yeeganirirya ega, “Nyoore Esau araaje asikye erihijo erimwi, erindi ritame.”

9 Kimwi, akasabha Waryubha ega, “Ee Waryubha wa jaaji weetu Abhurahamu, na Waryubha wa taata Esaaka! Ee OMUKURU unú waankeerya ega, ‘Hunjuka ogye mukyaro kyaho, na kubhahiiri bhaaho. Oni ndikukorera amajomu.’ 10 Oni ntakwenderwa okukorerwa amajomu kora hake, kya amajomu ganú waankorera kwa obhuheene oni omugaya waaho. Hanú naambuka oruuji rwa Yorodani ruyo, ntaaringa na ekintu, nawe engʼimbo eyenego. Nawe bhoono, niina amahijo gabhiri ganu. 11 Ndakusabha untuurye okurwa mumabhoko ga Esau, kwa okubha ndoobhoha ega, araaja okundwanʼya, na okunyita hamwi na abhakari na abhaana bhaani. 12 Nawe uuwe waagamba ega, ‘Maheene ndikukorera amajomu, na oni ndikora orwibhuro rwaho rubhe kya omusenyi gwa kunyanja, gunú gutakuturika okubharwa kwa obhwaru bhwago.’ ”

13 Mbe, obhutiku bhuyo, Yakobho akaraara hayo. Kimwi akaahura egintugo ginú giraabhe omutuho kumumura waabho Esau.

14 Akaahura egimburi eginkari magana gabhiri,

amagorohe mirongo ebhiri,

amangʼondi amakari magana gabhiri,

amaguruki mirongo ebhiri,

15 egingamia ginú giraneenʼya mirongo esatu, hamwi na ebhimoori bhyagyo,

egingʼombe eginkari mirongo ena,

na egigeeni ekumi,

egintikiri eginkari mirongo ebhiri,

na eginsaaja ekumi.

16 Akagwatya abhagaya bhaaye, kira oumwi erihijo ryaye, akabhakeerya ega, “Mukangate, na mubhenga muratigirana omweya, gati ya amahijo geenyu.” 17 Akaragirirya unú yaaringa akangatiri ega, “Hanú wakasikane na omumura weetu Esau, akubhuurye ega, ‘Uuwe m-mugaya wawi? Oragya-ha? Na egintugo ginu n-gyawi?’ 18 omukyukye ega, ‘Egintugo ginu n-gya omugaya waaho Yakobho. M-mutuho gunú arakureetera uuwe Esau omukuru waaye. Na omwene aringi enyuma eyo, araaja.’” 19 Kweki akaragirirya egoego, owa kabhiri, na owa kasatu na abhandi bhonsego, aragamba ega, “Amangʼana gayo ngo mwakakeerye Esau, hanú mwakasikane nawe. 20 Kweki mutarabhirwa okumukeerya ega, ‘Omugaya waaho Yakobho, omwene aringi enyuma eyo, araaja.’” Yakobho yaagamba ego, kwa okubha yeeganirirya ega, “Hamwi nintura okumuteremya kwa emituho ginú ndakangatya, naho hanú ndamaahane nawe, hamwi naatura okunyikirirya.” 21 Kwa ego, akakangatya omutuho gwaye, nawe omwene, akaraara haryaharya obhutiku bhuyo.

Yakobho arakindigana na Waryubha

22 Obhutiku bhuryabhurya, Yakobho akeemuka, akagega abhakari bhaaye abhabhiri, na abhagaya bhaaye abhabhiri bha ekikari, na abhaana bhaaye ekumi na oumwi, akabhambukirya kukyambuko kya Yabhoki, 23 hamwi na ebhintu bhyaye bhyonsego.

24 Weeki akatama hayo omwenego. Nho, omuntu umwi akaaja, akakindigana nawe okuhikira nyenkyo juri. 25 Omuntu uyo, hanú yaarora ega, atakunagya okumuhiga, akamukuunʼya kurubhaajwa. Yakobho akabhejuka orubhaajwa. 26 Nho, omuntu uyo akagamba ega, “Ntiga ngende, kwa okubha bhurakya.” Nawe, Yakobho akamukyukya ega, “Ntakukutiga nyoore otaannonke!”

27 Omuntu uyo, akamubhuurya ega, “Eriina ryaho, nuuwe-wi?” Yakobho akamukyukya ega, “Nooni Yakobho.”

28 Omuntu uyo, akamukeerya ega, “Otakyabhirikirwa Yakobho kweki, bhoono oraabhirikirwenga Isiraeri, kwa okubha osongeeni na Waryubha na abhantu, na uuwe ohigiri.” 29 Nho, Yakobho wonse akamubhuurya ega, “Ndasabha unkeerye eriina ryaho?” Nawe omuntu uyo, akamukyukya ega, “Kwaki orambuurya eriina ryani?” Kimwi akamunonka eyo. 30 Kwa ego, Yakobho akatoga ahasi hayo ega, Penweri, aragamba ega, “Mmaaheeni na Waryubha ameeso kwa ameeso, ntuurikiri!”

31 Yakobho hanú yaarwa Penweri, eryubha ryaringa rimariri okutura, akabha abhejukiri orubhaajwa rwaye arasugura. 32 Nkyo kirakora Abhaisiraeri bhatakurya emiki gya kurubhaajwa okuhikira reero, kwa okubha omuntu urya, yaakunʼya Yakobho kumuki gwa obhugwataniro bhwa orubhaajwa na obhukende.